Atoqqiinermut containerinik nuussineq: Atoqqiinermut containerit Piorsaavimmit Aamma Kofoeds Skolemit akisussaaffigineqalissapput

Nuuk: Atoqqiinermut containerit atorneqarluaqisut Piorsaavimmit Kofoeds Skole suleqatigalugu novembarip aallaqqaataaniit akisussaaffigineqalissapput. Containerit Eqqakkanik Tigooraaviup/Ikuallaaviup silataanni maannamut inissisimapput.

Kommuneqarfik Sermersuup avatangiisinik eriaginninneq pingaartippaa kissaatigalugulu atoqqiinerusalerlutalu igitassanik immikkoortiterinerusalissasugut. Taamaammat containerit marluk 20 fodsiusut – pequtinik toqqaannartumik atoqqinneqarsinnaasunik suliffeqarfinnit aamma innuttaasunit tunniussivigineqarsinnaasut – Eqqakkanik Tigooraaviup silataani inissisimapput.

Atoqqiinermut containerit tunniussivigineqarluartarput. Pequtit angisuut assigisaallu amerlasuut ullut tamaasa tunniunneqartarput. Taamaattumik atoqqiinermut containereqarfiup eqqaa annertuumik angallaffiusarpoq, tassami eqqakkat 60 tonsit missaat ullut tamaasa sumiiffimmi isumagineqartarmata.

”Containereqarfiup eqqaani angallanneq isumannaallisaanerup peqqissutsillu tungaatigut ajornartorsiortitsisarpoq, biilimmi eqqakkanik oqimaatsunik usilit tunniussiartortut angallattarput. Tamatuma saniatigut ilaqutariippassuit meerartallit pequtinik aallinngikkunik tunniussiartortarput. Taamaammat sorpassuit soorlu pequtit atoqqinneqarsinnaalluartut igitassat eqqaanni inissisimasarput. Tamanna takussunarpoq, atoqqinneqarsinnaalluartullu pitsaanerusumik isumagineqartariaqarput. Isumaqarpugut akisussaaffik tamanna Piorsaavimmit aamma Kofoeds Skolemit ingerlalluarneqarsinnaasoq,” Frank Rasmussen Kommuneqarfik Sermersuup Sanarfinermut Avatangiisinullu Ingerlatsiviani ingerlatsisoq oqarpoq.

Atoqqiinermut containerit Piorsaaviup aamma Kofoeds Skolep silataannut novembarip aallaqqaataani nuunneqassapput. Piorsaaviup aamma Kofoeds Skolep adresseraat: Industrivej 2A aamma 2B. Taamaattumik atoqqinneqarsinnaasut igitassallu siunissami immikkoortiterluarneqartalertussanngorput.

”Atoqqiinermut containerinik isumaginninnermik akisussaaffiup Piorsaavimmut aamma Kofoeds Skolemut tunniunneqarnera isumatusaarneruvoq, taakkununngalumi orniguttartut ataavartumik suliassaqarnissaannut aamma iluaqutaassammat. Taakkununnga orniguttartut pequtinik igiinnarneqartussaagaluanik iluarsaasinnaammata atoqqiisarnerput taamaalilluta annertusisinnaanngussavarput. Tamanna Kommuneqarfik Sermersuup avatangiisinik eriaginninnermik pingaartitsineranut naapertuulluinnarpoq, aamma Eqqakkanik Tigooraviup eqqagalerineq taamaallaat ukkatarilersinnaanngussavaa,” Sanarfinermut Avatangiisinullu Ataatsimiititaliami siulittaasoq Malene Lynge (IA) oqarpoq.

Atoqqiinermut containerit ammasarfissaat qaqugukkullu tunniussivigiartorneqarsinnaajumaarnersut Piorsaavimmit aamma Kofoeds Skolemit nammineq aalajangerneqarumaarput. Tunniunneqartut igitassatut nalilerpatigit tigunissaannut itigartitsinissaminnut pisinnaatitaaffeqassapput. Igitassatullu nalilikkat Eqqakkanik Tigooraavimmut tunniukkiartorneqartassapput.