Tasiilaq: Sanaluttarfittaaq ammartoq

Najukkami sanaluttartut tunumiut sanaluttarneranik pilersitsinissaminnut, attassinissaminnut ingerlatsitseqqinnissaminullu sannavigissaarnerulerput.

Aningaasat 2 millionit koruunit sanaluttarfik Stunkenip Tasiilamiittup nutarterneranut nuunneranullu atorneqartut. Aningaasat taakku ukioq kingulleq Kommuneqarfik Sermersuumi missingersuinermi Kommunalbestyrelsimit illikartinneqarsimapput.

Tasiilami sanaluttarfik nutaaq

Ataasinngormat sanaluttartut pitsaanernik nutartersimasunillu inissaqalersimanerat, sanalugassanik nutaanik atortunillu peqalersimanerat takussutissaqalerpoq. Sanaluttarfik nutaatut ivertinneqarpoq.

Stunken illoqarfimmi Eqqartuusiviusimasumut nuunneqarpoq.

Eli Abelsen, Tasiilami Majoriami sullissivimmi aqutsisoq sanaluttarfimmullu akisussaasuusoq, Knud Mathiassenilu (IA), najukkami kommunalbestyrelsimut ilaasortaq, ammaanersiornermi oqalugiarput.

“Sanaluttarfiup Stunkenip nutaanik avatangiiseqalernerata najukkatsinni immikkuullarittumillu sanaluttarnitta attatiinarnissaanut iluaqutaanissaa neriuutigilluaqaara. Ileqqutoqqat sanaluttarnerullu inuusuttunut kinguaariinnullu nutaanut tunumiut eqqumiitsuliarisartagaat ingerlateqqinnissaanut puigorneqannginnissaanullu iluaqutaassasoq. Tamanna pingaaruteqartorujussuuvoq,” Eli Abelsen taama oqarpoq.

Inini ilaatigut tunumiut tupilaannik tuttup nassuinik sanaanik qilaatinillu sanasoqartarpoq.

Stunkenip nutarterneranut najukkami sanaluttartunut aammali takornarianut Tasiilamut tikeraartunut pissutsit pitsanngorsarnissaanik siunertaqarpoq. Ulloq manna tikillugu Tunumi illoqarfiup annersaani sanaluttartut matut naasarlugit imaluunniit takornarissanut pisiniarfiup Skævenip silataani tuniniaanikkut.

”Siunissami sanaluttarfittaamiit sanalukkanik tuniniaasarnissaq siunertaavoq. Stunken ilisivinnik igalaartalinnik tuniniakkanik saqqummersitsiviusussanik sanaluttartunullu toqqaannaq tuniniaanissamik ilaatigut takornarianut  periarfissaalissaaq. Illoqarfimmilu najugaqartut soorunami alakkaanissamik pisinissamillu periarfissaqassapput” Eli Abelsen oqarpoq.

Eli Abelsenip Nuummi aqutsisoqarfik suleqatigalugu sanaluttarfik siunissami qanoq ingerlanneqassanersoq misissuleruttorlugu oqaatigaa. Ilaatigut Kitaani sanaluttarfiit qanoq ingerlanneqarnersut misissorneqassaaq.

”Oqareernittut inuusuttunik soqutiginnittoqalernissaa soqutigaarput. Ataatsikkullu najukkami sanaluttartut peqatigiiffimmi aallartitsinissaat neriuutigaara taamaasillutik ulluinnarni ingerlanneqarneranut sunniuteqaqataaniassammata. Saniatigut inini pikkorissartitsinissamut periarfissanik arlalinnik misissuilluta aallartippugut taamaasilluni sanaluttarneq aalluttuaannarneqarniassammat.”

Massakkuugallartoq Stunken ulluinnarni nal. 8-niit nal. 16-imut ammasassaaq.