Innuttaasunut

Nipilersornermik unammisitsinermi sakkortuumik nipilersortartut ajugaasuupput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

NUIF-imi nipilersornermik unammisitsineq: Sound of The Damned Aalborgimi Ungdomsringens Musikfestivalimi tusarnaartitsiartorluni angalanissamut ajugaapput.

Rock, rap sakkortuumillu nipilersorneq. Ornittakkap NUiFip (Nuummi Inuusuttut Siuarsartut) ukiumoortumik nipilersornermik unammisitsinerani nipilersoriaatsit sammiviillu assigiinngitsorpassuupput.

Meeqqanut inuusuttunullu nipilersornermik nuannarisalinnut unammisitsineruvoq. Nipilersornermik erinarsornermik rappernermillu nammineq erinnianik taallianillu tusarnaartitsisoqarpoq.

”Peqataasut unamminissap tungaanut sungiusarlutik ulapissimapput. Aaqqissuussineq iluatsilluaqaaq, peqataasunillu illersuiartortunik aggiasoqarluarluni.

Nipilersorneq qitiutillugu – inuusuttut siuariartornissaat NUiFimi pingaartinneqarmat aaqqissuivugut. Meeqqanut inuusuttunullu sammisunik ukioq kaajallallugu suliniuteqartarpugut” Carla Villadsen, NUiFimi pitsaaliuinermut siunnersorti oqarpoq.

Peqataasut nipilersornikkut ilisarisimaneqarluartunit nalilersorneqarput – Siiva Fleischer, Zikazakkunni erinarsortoq, Katsi Kleist aamma Inunnguaq Petrussen, sakkortuumillu nipilersoriaasillit Sound of The Damned-ikkut pitsaanerpaamik inissipput, aappaagulu januaarimi pisussami Aalborgimi Ungdomsringens Musikfestivalimut peqataajartortussanngorlutik.

Pitsaanerit pingasut
Ajugaasoq: Sound of The Damned
Tullia: Rapper Philip Knudsen
Pingajuusoq: Igimaq

Peqataasut tamarmik diplominnallutillu ruusannapput.

Nipilersornermik unammisitsisoqanngikkaangat meeqqat inuusuttullu nipilersornermik soqutigisallit NUiFip nipilersornermut sungiusartarfiutaani pingasuusuni sungiusarsinnaatitaapput. NUiFi aamma nipilersornermik immiussisarfeqarpoq.