Asiip nalunaarut atsiorpaa

Kommuneqarfik Sermersuumi borgmesterip, Asii Chemnitz Narup, sapaatip akunnerata naanerani Arctic Circle ingerlanneqarnerani iluatsillugu Arctic Mayors Declaration atsiorpaa.

Issittumi illoqarfinni borgmesterit katillugit qulit nalunaarummi Issittup ineriartortinneqarnissaannut assigiinngitsunik kajumissaaruteqarput saniatigullu naalagaaffiit nunat assigiinngitsullu akornanni issittumi periusissiorniaraangata isumasioqatigiinnermut ilanngunneqartarnissaat kissaatigalugu.

Issittumi illoqarfiit silap pissusaata allanngoriartorneranut akiuussinnaasut ineriartortinneqarnissaat oqallisigineqarneranni sapaammi atsioqatigiittoqarpoq.

Asii Chemnitz Narup sapaatip-akunnerata naanerata ingerlanerani aaqqissuussani marlunni, Issittup ineriartornera pillugu aggerfimmit isigineqarnera aallaavigalugu sammineqartuni, oqalugiartuuvoq. Siulleq tallimanngornermi unnukkut pivoq, tassanilu issittumi illoqarfinni suliassanut tunnganerusut eqqartorneqarput.

”Issittumi illoqarfiit tamarmik assigiinnik suliassaqartitertut erseqqissumik paasivara. Assersuutigalugu tamatta inuusuttut allanut nussortarnerat sulisussanillu pissarsiniarnissamut imaannaanngissinnaasut nalaattarpavut, saniatigulli suliassat assigiinngitsut immikkoortumit immikkoortumut allaanerusinnaasarput,” oqarpoq Asii Chemnitz Narup, oqaatigalugulu Issittumut atatillugu pilersaarusiornermi najukkami nukiit pioreersut peqataatinneqarnissaat pisariaqartoq.

Sapaatip akunnerata naanerani issittumi suleqatinilu ineriartorneq oqallisigereerlugu Kommuneqarfik Sermersuumi borgmesterip uppernarsivaa, illoqarfiit pingaarnersaanni periusissiaq kommunalbestyrelsimit tamarmiusumit aalajangiunneqarsimasoq eqqortuusoq.

”Kommuneqarfik Sermersuumi Nuummilu ineriartornerup naammagisimaarnissaanut tunngavissaqarluarpugut. Ineriartornermi ajornartorsiutigut assigiinngitsut – soorlu inissianik attaveqaatinillu amigaateqarnerit – aaqqiiviginiarlugit iliuuseqarsimavugut, illoqarfiilli amerlanerpaat suli qanoq aaqqiissuteqartoqassanersoq eqqarsaatigigaat.  Taamaattumik borgmesterinut allanut kajumissaarutigaara, allat ajornartorsiutinik aaqqiinissaat utaqqinagu, namminneq unamminarsinnaasut aaqqiiviginiarlugit iliuuseqassasut,” oqarpoq Asii Chemnitz Narup.

Borgmesterit qulingiluat sinneruttut ukioq manna maajip aallaqqaataanni Anchorage, Alaskami Arctic Mayors Declaration atsiorpaat.