Siunertaq
Kommuneqarfik Sermersuup nikanarsaalluni tiingaffiginninneq akuersaanngilaa
Nikanarsaalluni tiingaffiginninneq pillugu politikki:
- Sullivimmi pitsaasunik peqqinnartunillu avatangiiseqarnissamut siuarsaassaaq
- Nikanarsaalluni tiingaffiginninnermik pinaveersaartitsissaaq
- Nikanarsaalluni tiingaffiginnittoqarsimatillugu suliaqartarnissamut tunngaviliissaaq
Tassa imaappoq:
- Kikkut tamarmik suliffimmi pitsaasunik peqqinnartunillu avatangiiseqarnissamut siuarsaaqataassapput. Aqutsisut suleqatillu suliffimmi nikanarsaalluni tiingaffiginninnernik suugaluartunilluunniit pinaveersaartitseqataanissaat naatsorsuutigineqarpoq
- Immitsinnut assigiinngissutsitsinnullu ammasuunermik, ataqqinninnermik tatiginninnermillu takutitsissaagut.
Nikanarsaalluni tiingaffiginninnermut illersuut pitsaanerpaaq tassaavoq inuup assigiinngissutaanik suleqatillu ataasiakkaat nammineersinnaassusaannik ataqqinnippalaartuuneq.
Nikanarsaalluni tiingaffiginninnerup nassuiaataa
Inuk kinguaassiuutinut attuumassuteqartunik pissusilersuutinik piumassuserinngisaanik nalaataqartinneqaraangat, inuup pineqartup kanngunarsarnissaanik, nikanarsarnissaanik, assigiinngissinneqarnissaanik imaluunniit nukillaarsarnissaanik sunniuteqartumik siunertaqartumilluunniit, nikanarsaalluni tiingaffiginnittoqartarpoq.
Nikanarsaalluni tiingaffiginninneq sunaanersoq aamma inoqammut pissutsit suut akuerisaanersut tamanut atuuttumik killisiorneqarsinnaanngillat. Nikanarsaalluni tiingaffiginnittarnerup killinga nikerartuuvoq, pissutigalugu inummiit inummut paasinnittariaaseq assigiinngimmat. Arnat angutillu nikanarsagaallutik tiingaffigineqarsinnaapput.
Nikanarsagaallutit tiingaffigineqarsoriguit nuannarinnginnera kissaatiginnginneralu nikanarsaasumut ilisimatinnissaa pingaaruteqarpoq. Taamatut iliortup tamanna ataqqinngippagu, nikanarsaalluni tiingaffiginnittoqartarpoq.
Nikanarsaalluni tiingaffiginninnermut assersuutit:
- Oqaatsikkut timikkullu pissusilersuutikkut atoqatigiinnermut tunngasut kissaatigineqanngitsut, ajuallannartut, annernartut utertitsiffigineqanngitsullu. Assersuutigalugu aparsineq, killissamik qaangiilluni attuinerit patitsinerillu.
- Oqaatsit, apeqqutit kaammattuutillu atoqatigiinnermut tunngasut. Oqarasuaatikkut sianertarnerit e-mailit allakkallu atoqatigiinnermut tunngasut.
- Quiasaarutit peqqarniitsut, assit atoqatigiinnertallit allallu nikanarsagaasup kissaatiginngippagit tatisimassutigippagillu tassunga ilaapput.
Pissutsit iliuuseqarnissamut tunngasut
Nikanarsaalluni tiingaffiginninnernik pinaveersaartitsineq
Immikkoortumi tullinnguuttumi nikanarsaalluni tiingaffiginnittarnermut pinaveersaartitsinissamut taamaaliornikkullu suliffimmi pinngitsoortitsinissamut ilitsersuut atuarsinnaavat. Atuaqqissaarnerani maluginiassavat Kommuneqarfik Sermersuup qitiusumik allaffeqarfiani assigiinngitsunik kultureqarsinnaanera.
Inunnut ataasiakkaanut nikanarsaalluni tiingaffiginninnermik pinaveersaartitsineq
Nikanarsaalluni tiingaffiginninneq pinaveersaartinnissaanut pingaaruteqarpoq:
Naaggaarsinnaaneq
- Iliuutsit nuannarinngisatit killissannillu qaangiisut pillugit ersarissumik oqaaseqarfigikkit. Suleqatip nikanarsarlutit tiingaffiginngippatit peqqusiileqitinneqarneq unissaaq.
- Aallaqqaammut nersualaarinninnerit, timikkut attuinerit nikanarsaanerillu immikkoortikkuminaassinnaammata, nikanarsaalluni tiingaffiginninnerit amerlanertigut unitsinniarneqarneqajaarneq ajorput.
- Nikanarsaalluni tiingaffiginninneq qaqutiguinnaq sakkortuumik aallartittarpoq, kigaatsumilli annertusiartortarluni.
Suleqatit ataqqiguk
- Suleqatit allat illilluunniit iliuuserisanut naaggaarsimappat ataqqiguk. Aamma iliuutsit soqutaanngitsutut quiasaarutitulluunniit isigigaluarukkit.
Suleqatinnik tapersersuineq
- Nikanarsaalluni tiingaffiginnittarnermik naammattuuiguit taamaatinnissaa ersarissumik oqaatigissavat peqqusiileqitinneqartorlu illersorlugu. Suleqatinnut tapersersuineq pingaaruteqarluinnarpoq, suliap ingerlaneranut suleqatinnullu.
Nikanarsaalluni tiingaffiginnittarnermik aqutsisutut pinaveersaartitsineq
Nikanarsaalluni tiingaffiginnittarnermik aqutsisutut pinaveersaartitsinissamut pingaaruteqarpoq:
Nikanarsaalluni tiingaffiginninneq pillugu ersarissumik isummersornissat
Nikanarsaalluni tiingaffiginninnermut akuersaannginnermik aqutsisutut oqariartuuteqartariaqarputit. Periuseq pitsaanerpaaq tassaavoq suleqatigiit akornanni paasissutissat eqqartuinerillu ataatsimoortillugit ingerlannerat.
Suleqatitit politikki pillugu sumilu nassaassaanersoq oqaluttuutikkit.
Suliffimmi tarnikkut atugarisat atugarissaarnerlu pillugit suliat
Suliffimmi atugassarititaasut pillugit misissuinerit aamma inatsisitigut pisussaaffik Suliffimmik Nalilersuineq (APV) qitiusumik ingerlannerisigut suliffimmi tarnikkut atugarisat atugarissaarnerlu pillugit pilersaarusiarineqartarput. Pilersaarusiat malillugit angusaqarnissamut aqutsisutut sulissuteqarnissap qulakkeernissaa pingaaruteqarpoq.
Suleqatit pimoorussiffigalugu tusaanissaa
Sulisoq ajortumik pineqartutut peqqusiileqitinneqartutulluunniit misigisimappat aqutsisutullu ilinnut apuunneqarpat pimooruttuassavat.
Sulisut nikanarsagaallutik tiingaffigineqarneq pillugu ajornartorsiuteqarpata apuussivigineqarsinnaanerit takutiguk.
Nikanarsaalluni tiingaffiginnittoqarsimatillugu suleriaaseq
Tullinnguuttumi nikanarsaalluni tiingaffiginnittoqarsimatillugu qanoq suliassaanera atuarneqarsinnaavoq.
Nikanarsaalluni tiingaffigineqarneq imatut suliarineqassaaq:
Nikanarsagaallutit tiingaffigineqarsimaguit toqqortissanngilat
- Nikanarsaasoq ersarissumik oqarfigiuk nuannarinagu. Qanorluunniit pisoqaraluarpat nikanarsaasup kissaataanut tunniutiinnassanngilatit.
- Suleqatit, sinniisut aamma/imaluunniit aqutsisut akornanni nikanarsaaneq ingerlaannaassappat ikiortissarsiorit.
Nikanarsaaneq illit inuttut ajornartorsiutitut isiginagu suliffimmi avatangiisinut ajoqutaasutut isigissavat:
- Suleqat ataaseq nikanarsaalluni tiingaffiginninnermut atatillugu ajornartorsiuteqarpat kikkut tamarmik ajornartorsiutigissavaat.
- Aqutsisut imaluunniit sinniisut ammaffigalugit oqaloqatigikkit. Suleqatit allat nikanarsaalluni tiingaffiginninnermut atatillugu ajornartorsiuteqarnersut ajornartorsiuteqarsimanersulluunniit paasiniaruk.
- Inuit tatigisatit oqaluttuuteqqissaakkit.
- Ajornartorsiut suliffimmi ilisimaneqarpat suliassaq qanoq suliarineqassanersoq eqqartorsiuk, tassani sinniisut peqataasinnaapput.
Nikanarsaalluni tiingaffiginnittoqarsimatillugu sinniisoq imatut suliaqassaaq:
Qisuariapallattarit malunnaarsaartuullutillu
- NIkanarsaalluni tiingaffiginnittoqarneranik pasillernermi qisuariapallattassaatit. Eqqugaasup ikiorneqarnissaa pingaarnerpaavoq. Malugiuk, nikanarsaalluni tiingaffiginninneq suleqatip eqqumiitsumik pissuseqalerneranut, napparsimalluni sulinngitsoortarneranut imaluunniit, soraarnernut/soraarsitaaneranut pissutaasinnaammat.
- Suleqatip saaffigippatit malunnaarsaartuugit. Suleqatit kinaassutsiminik isertuussisinnaatitaavoq aamma suliaq qanoq suliarineqartigissanersoq saaffiginnittup aalajangissavaa.
- Nikanarsaasoq oqaloqatigineratigut imaluunniit aqutsisut oqaloqatiginerisigut ajornartorsiutip aaqqinnissaa pitsaanerpaavoq.
- Pisariaqassappat suliamik pilersitseqataassaatit. Tassa imaappoq nikanarsaanerup suussusaa, qanga sumilu pisimaneri nalunaarsukkit. Takunnissimasinnaasunik ujarlerit. Sulisut peqatigiiffianit peqataasinnaasumik pissarsiorit.
Nikanarsaalluni tiingaffiginnittoqarsimatillugu aqutsisutut imatut suliaqassaatit:
Akuliutissaatit
- Nikanarsaalluni tiingaffiginnittoqarneranik malussartoqartillugu imaluunniit nikanarsaalluni tiingaffiginninneq pillugu saaffigineqaruit nikanarsaasoq oqaloqatigineqassaaq nikanarsaasup pissusaa paasiniarneqarluni.
Malunnaarsaartuugit
- Eqqugaasunut iliuuseqartutullu pasineqartunut malunnaarsaartuugit. Inerniliipallannaveersaarit.
- Illuatungeriit oqaloqatigiitsinniakkit.
- Suliffimmi sulisut tamarmik paasinnginniassammassuk oqaloqatigiinneq pingaartorsiortinnaveersaaruk. Aallaqqaasiutitut illuatungeriit immikkut oqaloqatigineqarsinnaapput kingornalu oqaloqatigiitsinneqarsinnaallutik. Oqaloqatigiinnermi taamaattumi illuatungeriit illersuisoqarsinnaanissaat (soorlu sinniisoq) isumassarsiatsialaasinnaavoq.
- Nikanarsaalluni tiinganiartoqartillugu atorfimmi pineqaatissiinerit atorneqarsinnaapput.
Pisoq nalilersoruk periarfissallu eqqarsaatigalugit
- Aaqqiissutissat tulluartut ajornaatsullu ujartukkit. Pisumi tassani aaqqiissut sorleq pitsaanerpaassanersoq eqqarsaatigiuk.
- Imaassinnaasoq paatsoortoqarsimasoq suleqatigiinnerlu aaqqinneqarsinnaalluni.
- Ilaanni suleqatigiinneq aaqqinneqarsinnaasarpoq.
- Ilaanni paatsoortoqarsimanerata kingorna suleqatigiinnissaq ajornakusoorsinnaavoq. Taamaattoqassappat illuatungeriinni arlaat allamut nuunneqarsinnaanerata iluaqutissartai eqqarsaatigineqarsinnaapput.
Atuutilerfia
Nikanarsaalluni tiingaffiginninnermut politikkip politikkit allat tassunga attuumassuteqartut taarsissavai.
Nikanarsaalluni tiingaffiginninneq pillugu politikki Suleqatigiinnissaq pillugu ataatsimiititaliamit (HSU) ullormi oqallisigineqarfianiit atuutilissaaq.