Kommunimi aalajangiinermik, sullissinermik imaluunniit ingerlataqarnermik naammaginninngikkuit innuttaasutut naammagittaalliornissamut pisinnaatitaaffeqarputit. Qanoq naammagittaalliornissannut suna pillugu naammagittaalliorniarnersutit apeqqutaavoq. Ataani naammagittaalliornernut assigiinngitsunut ilitsersuutit attaveqarfissallu takusinnaavatit:
Aalajangiinerit sullissinerillu
Aalajangiineq, sullissineq ingerlatsinerluunniit pillugit naammagittaalliorniaruit aallaqqaammut Kommuneqarfik Sermersuumut attaveqassaatit. Allakkatigut naammagittaalliornissaq saaffiginninnivillu uppernarsaataanik toqqorsinissat innersuussutigineqarpoq, taamaasilluni suliaq pitsaanerpaamik suliarineqarsinnaassammat.
Kommunip akissutaa naammaginngikkukku, naammagittaalliornerni amerlanerni naammagittaalliorfinnut attuumassuteqartunut ingerlatitseqqiisinnaavutit. Kommunip akissutaa nalinginnaasumik qanoq kimullu naammagittaalliussanersutit pillugu paasissutissanik imaqartarpoq. Taamaattoqanngippat ilitsersuunneqarnissamut kommunimut attaveqarnissamut tikilluaqqusaajuaannarputit.
Isumaginninnermut suliassaqarfik
Utoqqarnik suliassaqarfiup, inunnut innarluutilinnut tarnimikkullu nappaatilinnut suliassaqarfimmut imaluunniit suliffeqarnermut isumaginninnermullu sullissivimmut tunngasuni aalajangiineq naammaginngikkukku naammagittaalliornissamut periarfissaqarputit. Naammagittaalliornissamut ilitsersuutit tamatigut aalajangiinermut atatillugu ilanngunneqartarpoq.
Taamatuttaaq suliassaqarfimmut aalajangersimasumut suliat pitsaassusissaata allaaserineqarnerini kommunimi suliat pitsaassusissaata allaaserineqarneri pisinnaatitaaffitillu pillugit paasissutissat takusinnaavatit.
Inunnut innarluutilinnut aamma Tarnimikkut nappaatilinnut Immikkoortortaqarfik
Suliffeqarnermut Isumaginninnermullu Sullissivik
Meeqqanut tapiissutit
Kommunip aalajangiinera isumaqatiginngikkukku tamanna Isumaginninnermi Naammagittaalliuuteqartarfimmut naammagittaalliuutigisinnaavat, aalajangiinerup tigunerata kingorna sapaatip akunneri arfinillit qaangiutsinnagit.
Attavissat:
Isumaginninnermi Naammagittaalliuuteqartarfik
Imaneq 29, 1. sal
Postboks 689
3900 Nuuk
Oqarasuaat: 32 80 33
E-mail: aua@nanoq.gl
Naammagittaalliuut immersugassaq una aqqutigalugu nassiunneqassaaq:
https://www.sullissivik.gl/Emner/B_Sociale_forhold/Klag_til_Det_Sociale_Ankenaevn?sc_lang=kl-GL
Inuit allattorsimaffii
Kommunip aalajangiinera isumaqatiginngikkukku ullormit aalajangiiffiusumiit sapaatip akunneri arfinillit iluanni Kalaallit Nunaanni Rigsombudsmandimut naammagittaalliuutigisinnaavat.
Attavissat:
Kalaallit Nunaanni Rigsombudsmandi
Indaleeqqap Aqq. 3
Postboks 1030
3900 Nuuk
Oqarasuaat: +299 32 10 01
E-mail: ro@gl.stm.dk
Aputaajaaneq
Kommunip angallaffiusuni tamani, soorlu aqqusinerni, pisuinnaat aqqutaanni tummeqqanilu aputaajaasarneq siorarterinerlu isumagisarpai. Illumik piginnittut aamma attartortitsisartut inissiaatigisamik eqqaat akisussaaffigivaat.
Uani paasisaqarnerugit:
https://sermersooq.gl/kl/aputaajaaneq-2/
Pinerluutit
Kommunimi atorfillip sulinerminut atatillugu pinerluttuliorneranik pasitsaassaqaruit, illit – pinerlunnerit allat assigalugit – politiinut nalunaarutigissavat.
Pasinapiluttunik kalerriisoqarsinnaatitaaneq
Kommuneqarfik Sermersooq pisortatut oqartussatut akisussaaffilittut ammasuunermik ersarissuunermillu siuarsaarusuppoq. Taamaattumik pasinapiluttunik kalerriisartoqarsinnaatitaanermik peqarpugut, tassani innuttaasut, atorfillit aamma suleqatigisartakkat toqqissisimasumik aamma – kissaatigigunikku – kinaassutsimik isertuussillutik pissutsit ilungersunartut pillugit nalunaarutiginnissinnaapput.
Nalunaarutiginninnerit eqqartuussissuserisunik attuumassuteqanngitsunit aamma pasinapiluttumik kalerriisunik illersuineq pillugu inatsit (Inatsisartut inatsisaat nr. 32, 4. juuni 2024-meersoq) naapertorlugu suliarineqartarput.
Suut nalunaarutigisinnaavigit?
Pissutsit imaattut nalunaarutigisinnaavatit:
- Aningaasatigut pinerlunneq (ass. akiliilluni akuersititsineq, peqquserlunneq, peqquserlulluni allagaasiorneq)
- Pissaanermik imaluunniit nukissanik atornerluineq
- Avatangiisinut malittarisassanik imaluunniit isumannaatsumik sulinissamik annertuumik unioqqutitsineq
- Timikkut nakuuserneq, siorasaarineq imaluunniit kinguaassiutitigut kannguttaatsuliorneq
- Assigiinngitsitsineq aamma naligiissitaaneq pillugu inatsimmik annertuumik unioqqutitsineq
Suut nalunaarutigisinnaanngiligit?
Pasinapiluttunik kalerriisoqartarneq pissutsinut ilungersunartunut aamma inuiaqatigiinnut pingaarutilinnut taamaallaat atugassiaavoq.
Uku pillugit nalunaarutiginninnermut atorneqassanngilaq:
- Inuttut isumaqatigiinnginnerit imaluunniit aaqqiagiinnginnerit
- Suleqatigiuminaassuseq
- Sullinneqarneq imaluunniit sullissineq pillugu naammagittaalliorneq
- Aningaasarsiat, takkutinngitsoornerit imaluunniit sulinermi piffissaq pillugit isumaqatigiinnginnerit
- Suliffimmi ajornartorsiuteqarnerit nalinginnaasut
Allatut ittumik naammagittaalliuutissaqaruit uunga allassinnaavutit:
Saaffiginnissutit tigugutsigu tiguneranut uppernarsaassaagut aamma kommunimi immikkoortumut eqqortumut naammagittaalliummik suliarinnittussamut ingerlateqqinneqarnissaa suliarissavarput.
Pasinapiluttumik kalerriinernik suliaqarneq
Pasinapiluttumik kalerriinerit qanoq suliarineqassava?
- Nalunaarutiginninnerit tiguneqarpat uppernarsaammik pissaatit
- Attuumassuteqanngitsumit suliaqartumit nalilersorneqassaaq misissorneqarlunilu
- Suliami pisariaqartinneqarpat inernerit oqartussanut attuumassuteqartunut saqqummiunneqassapput.
Ajunngitsumik isumaqarlutit nalunaarutiginnikkuit ajortumik kinguneqartitsisoqarnissaanut illersugaavutit, aamma kinaassutsimik isertuussisuuguit.
Apeqqutissaqarpisi?
Iserfissaq aqqutigalugu annertunerusumik atuarsinnaavutit imaluunniit Kommuneqarfik Sermersooq attavigisinnaavat qanoq ingerlariaqqinnissamut arlaannik nalornissuteqaruit.
Whistleblowerportalen-imut linki
Naammagittaalliuutigerusutat allattorsimaffimmi ilaanngila?
Qulaani allattorsimaffimmi ilaanngitsumik naammagittaalliuutissaqaruit uunga allassinnaavutit:
Saaffiginnissutit tigugutsigu tiguneranut uppernarsaassaagut aamma kommunimi immikkoortumut eqqortumut naammagittaalliummik suliarinnittussamut ingerlateqqinneqarnissaa suliarissavarput.