Siunertaq

Oqaatsinut politikki pillugu Inatsisartut inatsisaata nr. 7, 19. maj 2010meersup malinneqarnissaa Kommuneqarfik Sermersuup oqaatsinut politikkeqarnissamut siunertaraa. Inatsimmilu imatut allassimasoqarpoq:

  • Kalaallit oqaasiisa oqaatsitut tamakkiisutut inuiaqatigiinnilu atugaasutut qularnaarnissaat
  • Kalaallit oqaasiisa taakkualu ilitsoqqussaralugu oqaatsitut allamiutullu oqaatsitut ineriartornerisa nukittorsarnissaat
  • Oqaatsitigut aporfiusartut pinaveersaarnerisigut peerniarnerisigullu, tamatumuuna marlunnik arlalinnillu oqaaseqarneq nukittoqutaallunilu pisuussutinngoqqullugu aamma
  • Kalaallit Nunaat oqaatsitigut ilisimasaqarfittut nukittorsarniarlugu ingerlaavartumik oqaatsitigut siuarsaanissaq.

Inatsit taanna inunnut immikkoortunut pingasunut sammitinneqarpoq:

  1. Kalaallisut ilikkarnissamik pisariaqartitsisunuti
  2. Danskisut tuluttulluunniit ilinniarnissamik pisariaqartitsisunut
  3. Kalaallit kulturiannik, oqaluttuarisaanerannik inuiaqatigiinnilu pissutsinik ilinniartinneqarnissamik pisariaqartitsisunut.

Kalaallit oqaasii tassaapput Kalaallit Nunaanni pisortatigoortumik oqaasiusut pisortatigullu ingerlatsinermi

Inatsisartut inatsisaanni nr. 7, 19. maj 2010meersumi § 3

Danskit oqaasii pisortatigut ingerlatsinermi atorneqarsinnaapput Tuluit oqaasii allamiullu oqaasii allat pisariaqartitsineq malillugu atorneqarsinnaapput.

Kalaallit Nunaanni najugaqavissut tamarmik pisinnaatitaapput kalaallisut danskisullu, kiisalu nunani tamalaani oqaatsinik atugaasunik ilikkarnissamut, oqalunnikkut allannikkullu, tassuunakkut inuiaqatigiinni inuunermut peqataasinnaaqqullugit ilitsoqqussaralugulu oqaatsiminnik atuisinnaallutillu ineriartortitsisinnaaqqullugit

Inatsisartut inatsisaanni nr. 7, 19. maj 2010meersumi § 5

Sulisut oqaatsitigut piginnaaffiinik ineriartortitsineq

Taamaattumik Kommuneqarfik Sermersuup soqutigisassaraa sulisunut oqaatsit uku pikkorissarfiginissaannut neqerooruteqartarnissaq:

  • kalaallisut, qallunaatut tuluttullu
  • aamma kommunip soqutigisassaraa immikkoortortani Kommuneqarfik Sermersuumiittuni kulturit akornanni aammalu kalaallit danskillu kulturiisa akornanni illugiimmik kulturimik paasisaqaqatigiinnissap qulakkeernissaa
  • Aaamma kommunip soqutigisassaraa kalaallit oqaasiinik, kulturiannik, oqaluttuarisaanerannik inuiaqatigiinnilu pissutsinik pitsaasumik siammasissumillu paasisimasaqarnerup qulakkeernissaa

Ataani pineqartuni pikkorissaanernut ilinniartitsinernullu neqerooruteqartarnissaq tapiissuteqartarnissarluunniit tulleriillugit salliutippai:

  • Kalaallinik danskisut oqaasilinnik kalaallisut ilinniartitsineq, aallarterlaaniit ingerlaqqittunut
  • Avataaneersunik kalaallisut ilinniartitsineq, aallarterlaaniit ingerlaqqittunut
  • Danskisut ilinniartitsineq, aallarterlaaniit ingerlaqqittunut
  • Kalaallit kulturiannik, oqaluttuarisaanerannik inuiaqatigiinnilu pissutsinik ilinniartitsineq, taakkununnga ilanngullugit tunumiut kitaamiullu kulturiannik aammalu kalaallit danskillu akornanni kulturimik paasisimasaqarnerulernissaq
  • Inuttut kulturikkullu naleqassutsinik ilinniartitsineq
  • Tuluttut ilinniartitsineq, aallarterlaaniit ingerlaqqittunut

Kommuneqarfik Sermersuumut ataatsimoorussamik neqeroorutit qulaani pineqartut aningaasalersornerat oqaatsit pillugit politikkikkut suliniutinut atugassatut qitiusumik aningaasaliissutinit sulisoqarnermut immikkoortortamit aqunneqartumit aallaaviusumik isumagineqarput. Ilinniartitsineq sulinerup nalaani ingerlanneqassappat imaluunniit ilinniartitsineq Kommuneqarfik Sermersuumit akilerneqassappat tamanna aatsaat pisinnaavoq sulisup qaninnertut qullersarisaanik isumaqatigiissuteqarnikkut.

Qulaani pineqartut saniatigut kissaatit allat inukkaartumik aqutsisorisanik ataasiakkaanik isumaqatigiissutigineqarsinnaapput immikkoortortallu ataasiakkaat namminneq aningaasartuutissanut atugassaannit aningaasaliiffigineqassallutik. Pikkorissarnermi peqataanissaq ingerlatsineq eqqarsaatigalugu tamatigut pisortaq isumaqatigiissuteqarfigalugu pisassaaq. Ilinniarneq sulisitsisumit akilerneqartussatut neqeroorutigineqarsinnaavoq taamaaliornikkut sulisoq sulianik ingerlataani tapersersorneqarsoritillugu.

Oqaatsinik ilinniartinneqarnissamik kissaatit qaninnertut aqutsisorisamut sukkulluunniit apuunneqarsinnaapput. Aammattaaq sulisunik aqutsisunillu inerisaanermik oqaloqateqartarnernut (MUS/LUS) atatillugu oqallisigineqarsinnaallutik.

Kalaallit kulturiannik, oqaluttuarisaanerannik inuiaqatigiinnilu pissutsinik ilinniartitsineq

Kalaallit kulturiannik, oqaluttuarisaanerannik inuiaqatigiinnilu pissutsinik ilinniartitsineq eqqarsaatigalugu immikkut anguniagaavoq suleqatissanik avataaneersunik atorfinitsitsinerni pisariaqassasoritillugu kalaallit kulturiannik, oqaluttuarisaanerannik inuiaqatigiinnilu pissutsinik ilinniartitsisarnissaq. Atorfinitsitsinermut atatillugu kommunip sulisoqarnermut immikkoortortaanit tamanna neqeroorutigineqartassaaq.

Inuiaqatigiinni kalaallini pissutsinik ilinniartitsineq paasineqassaaq inuiaqatgiiinni qanga pissutsinik ullumikkullu pissutsinik nutaaliaasunik ilinniartitsineq taamaalilluni sulilersup Kalaallit Nunaanni tunngaviusumik pissusiusut paasisaqarfigissammagit, ilaatigut:

  • Inuiaqatigiinni ilusilersugaaneq
  • Kommunip ilusilersugaanera
  • Innuttaasunik, inuutissarsiutinik suliffeqarfinnillu taakkulu ineriartorneri ilanngullugit oqaluttuarinninneq

Suliffiup iluani attaveqaqatigiinneq

Kommuneqarfik Sermersuumi tunumiusut, kitaamiusut, danskisut kiisalu oqaatsit arlariit nunani assigiinngitsuni oqaaserineqartut oqaatsitut atorneqarput. Taamaattumik kommunip soqutigisassaraa oqaatsit pillugit akimmiffeqannginnissaq, taamaalinikkut marluinnik arlariinnillu oqaaseqartuuneq Kommuneqarfik Sermersuumi nukittoqutaallunilu pisuussutinngussammat.

Taamaammallu aamma kommunip pingaartippaa kommunimi sulisut akornanni assigiinngissuseqarnerup eqqaamanissaa ataqqinneqarnissaalu. Ulluinnarni sulinermi suleqatit ataasiakkaat oqaatsit pillugit unammisaqarsinnaanerannut atatillugu suleqatit tungaanniit ikiuukkumassuseq, naammagittarneq ataqqinninnerlu pigineqarpoq.

Kommuneqarfik Sermersuumi kalaallit danskillu oqaasii illugiisillugit sulinermi oqaatsitut atorneqarput.

Kommuneqarfik Sermersuup atorfilittanut tunngatillugu akisussaaffii

Sulisut ataasiakkaat oqaatsitigut kiisalu kalaallit kulturiannik, oqaluttuarisaanerannik inuiaqatigiinnilu pissutsinik ilinniartinneqarnissamik pisariaqartitsinerat pillugu, takuuk § 4, imm. 3, Kommuneqarfik Sermersuup sulisut ataasiakkaarlugit inuttaanuinnarlu tunngasumik oqaloqatiginninnerit ingerlattassavai.

Kommuneqarfik Sermersuumi ataasiakkaat oqaatsitigut ilinniartinneqarnissamik pisariaqartitsine-rat pillugu oqaloqatiginninnerit sulisunik inerisaanermik oqaloqatiginninnernik (MUS) aqutsisunik inerisaanermik oqaloqatiginninnernik (LUS) ilaqartinneqarsinnaapput. Tamatumani tunngaviuvoq ataasiakkaat piginnaaneri taakkuninngalu ineriartortitsinissaq sulisunik inerisaanermik oqaloqati-ginninnernik aqutsisunik inerisaanermik oqaloqatiginninnernik ingerlataqarnermut atatillugu eqqar-torluarneqarsinnaammata.

Sulisunik aqutsisunillu inerisaanermik oqaloqateqartarneq ingerlanneqartanngippat ataasiakkaat oqaatsitigut ilinniartinneqarnissamik pisariaqartitsinerat pillugu oqaloqatiginninnerit sapinngisamik ukiumut ataasiarluni qaninnertut qullersarisamit ingerlanneqartassaaq.

Innuttaasuniit saaffiginnissutit

Pisortat ingerlatsineranni suliassat suliarineqartarnerat pillugu inatsit malillugu suliami ingerlanne-qartumi peqataasoq isummaminik ersersitsippat kissaatigigini kalaallit imaluunniit danskit oqaasii atorlugit sullinneqarumalluni, taava kissaatigisaq oqartussaasunit malinneqartussaavoq. Allakkiat innuttaasunut sammisunik imallit nalinginnaasumik kalaallisut danskisullu allanneqarsi-massapput saqqummiunneqannginnerminni.

  • Innuttaasut kalaallisut allakkatigut oqaluinnarlutillunniit saaffiginnittut kalaallisut sullianeqar-tassapput.
  • Innuttaasut danskisut allakkatigut oqaluinnarlutillunniit saaffiginnittut danskisut sullinneqar-tassapput.

Taakku saniatigut:

  • Innuttaasut nunat avannarliit oqaasii atorlugit allakkatigut oqaluinnarlutillunniit saaffiginnittut periarfissaqartillugu namminneq oqaatsitik atorlugit sullinneqartassapput.
  • Innuttaasut nunani assigiinngitsuni oqaatsit atorlugit allakkatigut oqaluinnarlutillunniit saaffi-ginnittut periarfissaqartillugu namminneq oqaatsitik atorlugit sullinneqartassapput.

Oqaatsit pillugit politikki uani aajuk.

Quppernerup imarisaa qanganitsersimava?

Quppernermut naqqiutissaqarpit?