Takorluugaq

Kommuneqarfik Sermersuup piujuaannartitsilluni inuussutissarsiornikkut ineriartortitsinermi Issittumi qitiusoqarfittut akuerineqarnissaa.

  • Kommuneqarfik Sermersooq inuussutissarsiornermut tunngassuteqartuni sutigut tamatigut tassaarusuppoq Kalaallit Nunaannut saaffiginninnermi atassuteqarfigiumaneqartunit piumaneqarnerpaaq
  • Aatsitassarsiornerup iluani sullissineq tunisassiornerlu – ingerlatsineq, pitsanngorsaaneq, pilersuineq – kommuunip inuussutissarsiornikkut ingerlatsinerani pingaarutilimmik inissisimassapput.
  • Ilisimatusarnerup, ilinniartitaanerup eqqumiitsuliornerullu tungaatigut nukinnik pinngorartitsiffittut suliassaqarfiit aalajangersimasut iluanni pitsaanerpaanut nallersuussinnaaneq.
  • Kommuneqarfik Sermersuup ilisarnaatigissavai misigisassat, kulturi, pikialaartitsinerit, ataatsimeersuarnerit, nerisassiorneq, aallaaniarneq aamma timersorneq qaffasissumik pitsaassusillit.
  • Kommuneqarfik Sermersuup inuussutissarsiortut avatangiisinik ilisimasaqarluarnissamik, CO2-mik aniatitsinerup annikillisarnissaanik suliffeqarfiillu akisussaassuseqartumik ingerlatsinissaat piujuaannartitsineq atorlugu tunisassiornernermi isummersueqataaffigissavai kajumissaarutigissallugillu.

Iliuusissat

Kommuneqarfik Sermersuup inuussutissarsiortut akornanni ineriartorneq, nutarsaaneq piujuaannartitsinermillu annertusaaneq periarfissiuutissavai.

Tamanna Kommuneqarfik Sermersuumut aallarnisaasunink, suliffeqarfinnik, innuttaasunik aningaasaliisunillu kajumilersitsissaaq.

Politikkit

Inuussutissarsiutinik ineriartortitsineq Kommuuneqarfik Sermersuumi qaffasissumik inissisimalluni iliuuseqarfissatut sammineqarpoq. Inuussutissarsiutinik ineriartortitsineq Kalaallit Nunaata annertunerusumik imminut pilersulernissaanut pingaaruteqarluinnarpoq. Aaqqissuussaanerup tungaatigut aalisarneq piniarnerlu kinguariartorput. Tamatuma aalisarnermik piniarnermillu inuussutissarsiuteqarnerup qitiutillugu sammineqarnissaa nutaamillu eqqarsarfiunissaa pisariaqartilerpaa, tassungalu ilutigitillugu inuussutissarsiutinut allanut tunngatillugu siuariartornissaq ineriartornissarlu periarfissaalersillugit.

Kommuneqarfik Sermersuumi inuussutissarsiutit ineriartortinniarlugit suliaqarneq politikkinit arfinilinnik ineriartortitsinissamik, nutarsaanissamik inuussutissarsiornerullu iluani siuariartornissamik tunngaveqartumik tunngaveqarpoq.

Politikkit arfinillit tassaapput:

  1. Siuariartornissamut periarfissanik pitsaanerpaanik pilersitsineq
  2. Suleqatigisat amerliartortinnerat ataqatigiissaarnerallu
  3. Qitiusoqarfinnik pinngorartitsiffiusunik ikiorsiineq annertusaanerlu
  4. Nunat tamalaat akornanni niueqatigiinnerup tungaatigut piorsaaneq
  5. Sulisut aalajaatsut piginnaassuseqartullu
  6. Kommuneqarfik Sermersuup inuussutissarsiortullu akornanni sunniivigeqatigiinnermik annertusaanissaq

Ineriartornissamut periarfissanik pitsaanerpaanik pilersitsineq

Kommuneqarfik Sermersuup inuussutissarsiortut akornanni ineriartornissamut periarfissat pitsaasut pilersissavai.

Iliuuseqarfigisassat ukununnga tunngapput:

  • Suliffeqarfiit pioreersut
  • Suliffeqarfiit kommuunimut nuuttussat
  • Aallarnisaasut

Suleqatigisat amerliartortinnerat ataqatigiissaarnerallu

Kommuneqarfik Sermersuup suleqatigiiffiit pioreersut tapersersussavai suleqatigiiffiillu nutaat siammasinnersullu pilersinnissaannut tapersersuilluni. Kommuunip suleqatigiinnerup iluani niueqatigiinnermut attuumassuteqartut suleqatigiiffioreersut ilusilersornissaat malittarisassatigullu aqqutissiuunnissaat.

Iliuuserineqartut taaneqartut suliffeqarfiit akornanni nukittuumik, siammasissumik, annertuumik sunneeqatigiilluarnissamillu angusaqarnissaq peqataaffigissavaat.

Nukimmik pinngorartitsiffiusut naliginnaasut ikorfartornissaat annertusarnissaallu

Kommuneqarfik Sermersuup nukimmik pinngorartitsiffiusut pioreersut toqqakkani ikorfartussavai annertusarlugillu. Tamanna pissaaq suliffeqarfinnik sullisivinnillu qanimut suleqateqarnikkut.

Assersuutigalugu uku pineqarput:

  • Ilinniartitaanerup tungaatigut suliniuteqarnikkut sunniiniarneq suleqatigiinnerlu
  • Aallaaniarnerup aamma takornariaqarnerup, paasissutissiisarnermut aamma assilialiornermut ilinniarfinnik, ilinniartut najugaqarfiinik pinngortitallu pissarititaanik nukinnik allanik atuinermi atugassarititaasunik suliniuteqatigiinnikkut sunniiniarneq suleqatigiinnerlu
  • Eqqumiitsuliortunut, kulturikkut suliaqartunut ilusilersuisartunullu atugassarititanik pitsaanernik pilersitsineq
  • Atortussiassat aatsitassarsiornerullu tungaatigut suleqatigiinnikkut sunniiniarneq suleqatigiinnerlu

Nunat tamalaat akornanni niueqatigiinnerup tungaatigut piorsaaneq

Kommuneqarfik Sermersuup nunat tamalaat akornanni niuerfinni inuussutissarsiortut periarfissaat annertusaavigissavai. Kommuunip nunat tamalaat akornanni niuernermik siunertallit sullissinerillu aningaasaliiffigissavai. Pitsanngorsaaneq aningaasaliissutaajumaartussallu aningaasaqarnikkut avatangiisillu tungaasigut piujuaannartitsinissaq aallaavigalugu tunngavilerneqassapput.

Niueqatigiinnerup ilisimasallu iluini uku sammineqassapput:

  • Kiffartuussineq pilersuinerlu
  • Sila avatangiisillu
  • Atortussiassat aatsitassarsiornerlu

Iliuuserisanut taakkununnga atasumik kommuunimut ”matut” – attaveqaqatigiinnikkut aaqqissuussaaneq – qiviarneqartariaqarput. Minnerunngitsumik tamanna Nuummi umiarsualiveqarnermut tunngavoq, Nuummi umiarsualiveqarnermut tunngatillugu aalajagigassat pingaarnerit aalajangerneqareerpata tassunga tunngasumik immikkuullarissumik iliuusissatut pilersaarusiortoqassaaq. Taassuma saniatigut Tasiilami Ittoqqortoormiunilu timmisartukkut angallannermut pitsanngorsaataasinnaasut misissorneqassapput.

Sulisut aalajaatsut piginnaasaqartullu

Inuussutissarsiornikkut ineriartortitsineq suliffeqarfiit nutaat pioreersullu eqqarsaatigalugit sulisut aalajaatsut piginnaasaqartullu pingaaruteqarluinnarput. Suliffissaqartitsinerup tunngaviusumillu ilinniartitaanerup qanimut suleqatigiissutigineratigut suliassaqarfimmi tassani ineriartortitsineq pissaaq.

Kommuunip aqutsinermut aqutsisunillu ineriartortitsinissami siuttuusinnaanera inuussutissarsiortut taakkartorpaat. Pitsaasumik, isummersuisumik akuersaartumillu aqutsineq siuariartornermut ineriartornermullu ilapittuutaasarput, aqutsinerliornerli naammaginanngitsumillu aqutsineq aalajaakkunnaarnermut pissutaasunut ilaalluinnarput.

Inuussutissarsiortut ersarissumik kissaatigaat ilinniartitseqqinnerit amerlanngitsut, manngaarissut piginnaanngorsaataasut sulisoqarnikkullu tunngaviusumik piginnaasanik kivitsiffiusut suleqatigiissutiginissaat.

Kommuneqarfik Sermersuup inuussutissarsiortullu akornanni suleqatigiinneq

Inuussutissarsiornermik suliaqartut kiisalu workshoppertitsisarnerit pereersut inuussutissarsiortunik suleqateqarnerup allatut sammineqarnissaanik kissaateqarnermik ersersitsipput, tassunga ilanngullugu kommuunip allatut pissuseqalernissaa. Tamanna naammassiniarneqarpoq.

Suliassat aalajangersimasut eqqarsaatigalugit kommuunip ingerlaavartumik, siunissamut ungasinnerusumut isigilluni suleqatigiinnissaq utaqqissunneqarsinnaanngitsunillu suliaqartarnermi ingerlaavartumik ineriartortitsinissaq ingerlannialersaarpaa.

Iliuusissatut pilersaarutit

Politikkit qulaani pineqartut toqqammavilerniarlugit iliuusissatut pilersaarutit ukuupput:

  • Aallarnisaanermi ineriartortitsinermilu iliuusissatut pilersaarutit
  • Takornariaqarnermi iliuusissatut pilersaarut
  • Piujuaannartitsilluni inuussutissarsiornikkut ineriartortitsinermi kiisalu suliffeqarfiit akisussaassusilimmik ingerlatsinissaannut iliuusissatut pilersaarut
  • Najugaqariaatsip tungaatigut iliuusissatut pilersaarut
  • Illoqarfiup pingaarnersaattut iliuusissatut pilersaarut
  • Suleqatigiinneq atassuteqarnikkullu iliuusissatut pilersaarut

Iliuusissatut pilersaarutit ataasiakkaarlugit pilersaarusiorneqassapput suliarineqassalutillu, tamannalu sunniuteqarnerunissamik sulinissamillu takussutissinneqassaaq.

Aallarnisaanermi ineriartortitsinissamilu iliuusissatut pilersaarut

Aallarnisaasut suliffeqarfiillu tassaapput siunissami kommuunip imminut pilersornissaanik kivitsisussat. Taamaattumik pinngitsoorani aallarnisaasut suliffeqarfiillu pitsaanerpaamik siunnersorneqarlutillu atugassarititamikkut ersarissunik killiffilersorneqassapput.

Aallarnisaanermi ineriartortitsinissamilu iliuusissatut pilersaarutigineqartunut tunngatillugu iliuuseqarfigisassat:

  • Aallarnisaaneq

    Inuussutissarsiornermik ineriartortitsinermik immikkoortortaqarfik aallarnisaasunik siunnersuinermik isumaginnittussanngorlugu ataqatigiissaarisussanngorlugulu ineriartortinnissaa. Aallarnisaasut pitsaasumik periarfissaqarnissaat sulissutigineqassaaq

  • Siuariartorneq

    Siunnersuineq, isummersuineq piginnaasanillu ineriartortitsineq aqqutigalugit suliffeqarfinnik pioreersunik piujuaannartitsinissamik aallussinissaannik kajumissaarineq

  • Nutarsaavik

    Nutarsaavimmik siunnersuinermik inuussutissarsiutitigullu ineriartortitsinerup saniatigut suliffeqarfinnik annernik minnernillu ilaqartumik pilersitsineq, taakkunani ilaassapput suliffeqarfiit nunanit allaneersut

  • Aallarnisaasunut Nuup avataani najugaqartunut aningaasanik atorniarsinnaaneq eqqarsaatigalugu periarfissanik ineriartortitsineq

    Kommuneqarfik Sermersuup suliffeqarfinnut minnerusunut Nuup avataaniittunut immikkut ittumik ineriartortitsinissaq eqqarsaatigalugu aningaasanik atorniarsinnaanissaq sulissutigissavaa

  • Inuussutissarsiutit nutaat

    Kommuneqarfik Sermersuup inuussutissarsiornikkut arlariinnik siunnerfeqarnissaq pimoorullugu sulissutigissavaa

    Kommuneqarfik Sermersuup aalisarnermik inuussutissarsiuteqarnerup iluani ingerlanerliorfiusuni inuussutissarsiutitigut immikkut ittumik iliuseqarnermi ikiuutissaaq

    Kommuneqarfik Sermersooq aatsitassat pillugit inatsit nutaaq tunngavigalugu suliffeqarfinnut minnernut suliassaqarfimmi pineqartumik ineriartortitsinerup ingerlatiinnarneqarnissaanut periarfissanik paasissutissiinermi peqataassaaq

Takornariaqarnermi iliuusissatut pilersaarut

Kommuneqarfik Sermersuumi takornariaqarneq tassaavoq Kalaallit Nunaanni takornariaqarfiit tamatigoornersaat. Misigisassarsiortitsineq, qimussertitsineqneq, nunami eqqissisimatitami angalaartitsineq imaanilu aalisartitsineq takornariaqarnerup tungaatigut Tunumi aallunneqarput, Ivittuuni Paamiunilu tammajuitsussarsiniarluni aallaaniartitsineq kiisalu ataatsimeersuariat, ilaqutariit, kulturi aamma nammattagiaqarlutik takornarissat Nuummi aallunneqarput. Taakkua saniatigut illoqarfiit tamarmik umiarsuarmik takornariartaatinik tikinneqartarput.

Takornariaqarmeri iliuusissatut pilersaarutip iluani suliniuteqarfigisassat:

  • Ataqatigiissaarineq

    Takornariaqarnerup iluani takornarissanik paasissutissiinerup, piginnaasanik ineriartortitsinermik, avammullu tuniaanermik siunnersuinermillu suliniutinik piareersaaneq ataqatigiissaarinerlutungaatigut

  • Aaqqissuussaaneq

    Ullumikkut aaqqissuussanerup pitsaaqutaanik pitsaanngequtaanillu qulaajaaneq – siunissami aaqqissuussaanikkut pilersaarummik suliaqarneq

  • Misigissarsiortitsinermi aningaasaqarneq

    Kommuunip misigisassarsiornermi aningaasaqarneranik misissuilluarneq kiisalu aallarnisaasunik suliffeqarfinnillu misigisassarsiortitsinermi aningaasaqarneq pillugu isummersuineq

  • Attaveqaqatigiinnikkut aaqqissuussaaneq

    Angallannikkut aaqqissuussaanerup ataqatigiissumik ineriartortinneqarnissaanut peqataaneq inuussutissarsiortunullu sanaartornerup tungaatigut pingaarutilinnik pilersitsineq

  • Tunisassianik ineriartortitsineq

    Takornarissanut tunisassianik ineriartortitsineq

Inuussutissarsiornikkut piujuaannartumik ineriartortitsineq suliffeqarfiillu akisussaanerup tungaatigut iliuusissatut pilersaarutaat

Inuussutissarsiornikkut piujuaannartumik ineriartortitsineq eqqakkanilu isumannaarisarneq tassaapput nunani tamalaani maluginiarneqaatigineqarsinnaasut kiisalu takornarissanik Kalaallit Nunaannut kajumilersitseqataasussat. Taamaattumik Kommuneqarfik Sermersuup suliffeqarfiit piujuaannartumik tunisassiornermik aallutaqarnissaat siunertaralugu isummersuissaaq.

Piujuaannartumik inuussutissarsiornikkut ineriartortitsinermi suliassaqarfiit iliuuseqarfigisassat:

  • Tunisassiorneq avatangiisinik miannerinnittoq

    R’it pingasut tassaasut Re-use (atoqqiineq), Re-cycle (atoqqitassanik suliareqqiineq) aamma Re-duce (ikilisaaneq) tassaassapput pingaaruteqartumik inissisimasussat.

    Kommuneqarfik Sermersuup immikkut ilisimasalinnik avataaneersunik ikiorteqarluni piujuaannartitsinissamut tunngavissat sapinngisaq tamakkerlugu avatangiisinik mianerinnittut ineriartortissavai.

  • CO2-mik tunisassiornerup annikillisinnissaa.

    CO2-mi aniatitsinerup annikillisarnissaanut suliffeqarfinnik kajumissaartumik iliuutsinik aallarnisaaneq. Suliffeqarfiit sulisut tungaatigut akisussaaffiat.

  • Sulisut tungaatigut piginnaasat

    Sulisut tungaatigut piginnaasat annertusarnissaat siunertaralugu Kommuneqarfik Sermersooq suliffeqarfinnik oqaloqateqarnikkut annertusaanissami najoqqutassanik suliaqassaaq.

Najugaqariaatsip tungaatigut iliuusissatut pilersaarut

Kommuneqarfik Sermersooq tassaavoq nunarsuarmi kommuunit isorartunersaat Kalaallit Nunaannilu innuttaqarnerpaaq. Tamanna Tunumit Kitaanut sermersuaq qulaallugu attaveqaqatigiinnikkut ilusilersugaanernerup tungaatigut inuussutissarsiornikkullu suleqatigiinnissamut immikkut ittumik unamminartoqartitsivoq, kulturikkulli pinngortitallu tungaatigut annertuumik pisuussuteqarnermik immikkut ittumik periarfissaqarput.

Kommuneqarfik Sermersuumi najugarfiit ataasiakkat aatsitassanik, naasunik kulturikkullu pisuussteqarnertik ilisarnaatigaat. Kommuneqarfik Sermersuup piujuaannartitsinissaq sutigut tamatigut tunngavigalugu najukkami innuttaasut suleqatigalugit imminut pilersorsinnaalernissaq siuarsassavaa.

Kommuneqarfik Sermersooq ineriartortitsinissamut sinaakkusiornermut peqataassaaq, Kommuneqarfik Sermersuullu naatsorsuutigaa siunissami inuussutissarsiornermik ineriartortitsinissaq najukkani ataasiakkaani innuttaasut nammineq akisussaaffigilissagaat.

Politikkikkut suliniutit aalajangersimasut iluanni suliniutit najukkani atugassarititaasunut sapinngisaq tamakkerlugu tulluarsarneqarsimasuussapput. Ingammik aallarnisaanermut takornariaqarnermullu iliuusissatut pilersaarutit najugaqarfinni minnerusuni avinngarusimasunilu annertuumik periarfissaqarput.

Najugaqariaatsip tungaatigut iliuusissatut pilersaarutip iluani suliniuteqarfissat:

  • Nukinnik/pissarititanik tunngaveqarnissaq

    Suliniutit aalajangersimasut innuttaasunik kajumissaarinikkut ilisimasatigullu avitseqateqarnikkut tunngavilerneqassapput, innuttaasullu najukkaminni iliuusissanut akisussaasuussapput.

  • Suliffeqarfiit pioreersut nukittorsarnissaat

    Suliffeqarfiit pioreersut siunnersorneqassapput, kajumissaarneqassapput piginnaasaqarfitsigullu ineriartortinneqassapput.

Illoqarfiup pingaarnersaattut iliuusissatut pilersaarut

Kalaallit Nunaanni illoqarfiit pingaarnersaat Nuuk Kalaallit Nunaata aningaasaqarneranut aalajangiisuulluinnartumik inissisimavoq, taassuma saniatigut allaffissornerup, ilinniartitaanerup, silaannaap, inuussutissarsiornerup, kulturip, sulisoqarnerup paasissutissiinermi teknologiip tungaatigut nukinnik pinngorartitsiffittut qitiusoqarfiuvoq.

Illoqarfiup ingaarnersaattut iliuusissatut pilersaarutit iluanni suliniuteqarfissat:

  • Nuuk tassaassaaq Kalaallit Nunaanni allaffissornikkut aqutsinermi illoqarfittut pingaarnersaq

    Kommuneqarfik Sermersooq Naalakkersuisut suleqatigalugit kommuunimi inuussutissarsiornikkut ineriartortitsineq nukittuumik avammut tunisassiornermut pilersissavaa

  • Piginnaassutsikkut ineriartortitsineq

    Kommuneqarfik Sermersuup sanaartornerup sullissinerullu tungaatigut piukkunnaateqalersitsisumik ilinniagaqarnerup tungaatigut qaffassarfissat ilusilersueqataaffigissavai, Kommuneqarfik Sermersuumilu ilinniagaqarnerup tungaatigut iliuuserineqartut assigiinngitsut suleqatigalugit

  • Nuuk Kulturip Illoqarfia

    Kommuneqarfik Sermersuumi eqqumiitsuliornermik kulturimillu suliaqarneq kajuminnaartuussaaq.

  • Nuuk ”Kalaallit Nunaannut isaaffik”

    Inuussutissarsiornerup nukittuup inissisimanissaanut Inunnik pitsaasumik attaveqarneq nunanilu tamalaani siammarterneq inuussutissarsiornerup nukittuumik inissisimanissaanut aalajangiisuulluinnarput. Kommuneqarfik Sermersuup umiarsualiveqarnikkut mittarfeqarnikkullu pissutsit pitsanngorsarnissaat piginneqatigiilluni suliffeqarfinnik pilersitsinikkut sulissutigissavaa.

Suleqatigiinneq atassuteqariaatsikkullu iliuusissatut pilersaarut

Kommuneqarfik Sermersuumi inuussutissarsiornikkut ineriartortitsinermik suliaqarnermi periuseq nutaaq namminersorlutik inuussutissarsiortut suliassaqarfimmilu attuumassuteqartut allat qanimut suleqatiginerisigut pissaaq, tassani immikkut ittumik suleqatigisassat tassaapput Naalakkersuisut aamma nunat tamalaat akornanni suleqateqarnermi pingaarutilimmik inissisimasut.

Tassunga atatillugu oqaloqateqarneq, paasissutissiineq attaveqaqatigiinnerlu sukannersumik inerisarneqassapput.

  • Inuuussutissarsiornermi Siunnersuisoqatigiit

    Kommuneqarfik Sermersuup inuussutissarsiornermik ingerlataqartut ilinniartoqarfiillu suleqatigalugit oqalliffimmik pilersitsissaaq, tassani siunissami suliniutissat kiisalu nunami imminermi nunanilu tamalaani niuernerup tungaatigut annertusaanissaq siunertaralugu ilisimasanik avitseqateqarnissaq suliffeqarfiillu suleqatigiinnissaat eqqartorneqarsinnaapput.

  • Kalaallit kulturiata avammut ilisarnaatitut nittarsaannissaa

    Kommuneqarfik Sermersuup kulturikkut suliaqartut inuussutissarsiutillu ileqqutoqqanit aallaaveqartut siuarsarniarlugit ataatsimeeqatigiittarnernik ineriartortitsissaaq kalaallit kulturiata nunani allani niuerfinni tuniniaanermi ilisarnaatitut atornissaa siuarsassavaa. Tassanilu aamma Tunumiut kulturiat ilaatinneqassaaq.

  • Kommuni inuussutissarsiornikkut inussiarnisaartoq

    Inuussutissarsiorneq, siunnersuineq, illuliorfissat, inuussutissarsiutinik nalunaarsuisarneq kommuunillu iluani kulturi, sunngiffik il. il. pillugit one-door aamma fast-track (pilertortumik allaffippassuit aqqusaaqqaanngikkaluarlugit) kommuunimi sullissivinnut attavqarsinnaaneq piorsarneqassaaq.

  • Inuussutissarsiornikkut paasissutissanik aallertarfik

    Kommuunip inuussutissarsiornikkut paasissutissanik aallertarfia inuit ataasiakkaat aallarnisaanissamut, suliffeqarfiit kommuunimut nuuttut atugassarititaasut tungaatigut pissutsinut tunngatillugu il. il. paasissutissanik imaqartoq ineriartortissavaa.

    Paasissutissanik aallertarfik inuussutissarsiornikkut ineriartortitsinissamik suliniutinik pingaaruteqartunik imaqassaaq.

  • Oqaloqatigiinneq suleqatigiinnerlu

    Oqaloqatigiinneq, attaveqaatit, innuttaasut siunnersorteqarnerat, aallarnisaasut, suliffeqarfiit suliffeqarfiillu nuukkumaaratarsinnaasut siuariartornissamik ineriartornissamillu – ersarissumik takussutissaqarnissaat pingaartillugu – ineriartortinneqassapput.

Suliassant pilersaarutit

Taamatut politikkeqarnissaq iliuusissatullu pilersaarutit aalajangersimasunik suliniuteqarnikkut iliuuseqarnikkullu piviusunngortinneqassapput, taakkualu immikkut ittumik takussutissartaqarput. Kommuneqarfik Sermersuup inuussutissarsiornermik ineriartortitsiniarnermi immikkoortortaqarfimmik annertusaaneq maanna sulissutigaa, taamaasilluni suliniutit timitalersugassat atuutilersinneqassapput. Killiffik, naleqqusaaneq pilersaarutinillu ineriartortitseqqinneq pillugit ingerlaavartumik naliliisassaagut.

Pilersaarut tamaat uani aasinnaavat.

Quppernerup imarisaa qanganitsersimava?

Quppernermut naqqiutissaqarpit?