Kommuneqarfik Sermersuumi Aqutseriaatsimut Tunngavissiaq

Illoqarfiit pingaarnersaanni kommuniuneq pisussaaffiliivoq! Uagut Kommuneqarfik Sermersuumi kalaallit inuiaqatigiit ineriartortinnissaat annertuumik angusaqarfigerusupparput. Innuttaasutut iluarinartumik inuuneqarnissaq pillugu atugarissaarneq pitsaanerusoq, aaqqissuussaaneq pitsaanerusoq, ilinniagaqarneq pitsaanerusoq aqqutigalugit inuiaqatigiit peqqissut pilersikkusuppavut.

Nunarsuarmi anguniakkat pillugit akisussaaffimmik nammaqataavugut, Kalaallit Nunaat pillugu akisussaafimmik nammaqataavugut pingaarnertulli nammineq kommunitsinni atugarissaarneq ineriartornerlu pillugit akisussaaffimmik nammaqataavugut. Inuiaqatigiit pitsaasut innuttaasut suliffeqarfiit suleqatillu allat suleqatigalugit pilersissavavut. Kalaallit Nunaat ataatsimoorullugu akisussaaffigaarput Kommuneqarfik Sermersuumi uagut suna tamaat sakkugalugu akisussaaffik tigorusupparput.

Kommuneqarfik Sermersooq nunap angissusaa eqqarsaatigalugu kommuniuvoq nunarsuarmi annersaq. Taamaakkaluartoq kommunimi atorfiliusugut ataatsimoorussinermi annertuumik pisussaaffeqarpugut sumiluunniit najugaqarutta aamma sunaluunniit suliarigutsigu. Tamatta immitsinnut ataqqeqatigiissaagut tamattalu ataatsimut siunnerfeqarluta.

Taama iliornissamut aqqut tassaavoq aqutsineq pitsaasoq. Matumuuna Kommuneqarfik Sermersuup aqutseriaatsimut tunngavissaa tulluusimaarutigalugu saqqummiupparput. Aqutseriaatsimut tunngavissaq ilissi peqatigalusi suliaraarput. Suliarineqarnera workshopsit aqqanillit ingerlanneqarnerannit kiisalu atorfillit 150-t sinnerlugit Paamiunit, Tasiilamit Nuummiillu suiarineqarpoq. Maannalu aamma ataatsimut akisussaaffigalugu ingerlatilissuarput aaqqissuussaanitsinnullu iluaqutissanngorlugu. Sulilluakutsooritsi!

Lone Nukaaraq Møller

Meeqqanut Atuarfeqarnermullu Pisortaq

Ejner Grønvold

Isumaginninnermut Suliffeqarnermullu Pisortaq

Martha Abelsen

Meeqqanut Ilaqutariinnullu Pisortaq

Hans Ulrik Skifte

Sanarfinermut Avatangiisinullu Pisortaq

Ole Jakobsen

Kommunaldirektøri

Marie Fleischer

Vicekommunaldirektøri


Aqutseriaatsip tunngavissaa qanoq atorneqassava?

Kommuneqarfik Sermersuumi aqutsinermi ingerlanneqartumut aqutseriaatsimut tunngavissaq ataqatigiissumik pitsaassuseqartumillu pilersitsinissamut sakkussaavoq pingaaruteqarluinnartoq:

Leadership Pipeline

Kommuneqarfik Sermersuup aqutseriaatsip Leadership Pipeline-tut taaneqartartup teoriia toqqammavigalugu aqutseriaatsip toqqammavia toqqarpaa. Leadership Pipeline isumaqarpoq ”Aqutsinermi erngup aqqutaa”. Taanna assersuutaavoq imatullu paasineqassalluni aqutsisut qaffassisusaat assigiinngitsut erngup aqqutaasutulli ataqatigiinnerat. Ataqatigiissitsinerit pingaaruteqarput patajaatsuunngikkunik imeq aqqutissarinngisaminut kuussammat. Soorlu aamma taamaaqataanit pingaaruteqarluinnartuuvoq immikkoortortaqarfiit aqutsisui, fagchefit pisortallu imminnut tapersersoqatigiillutik tapertariinnissaat taamaalilluni aqutsinerup aqqani aqutsisut tamarmik ataqatigiilissammata. Atorfillit tamarmik ataatsimut siunnerfeqarnissaat Kommunimi aqutsisut tamarmik suleqatigiinnissaannut aallaaviuvoq.

Soorlu erngup aqqutaatut ataqatigiinnerit immikkut qajannartuupput: Inuk sulisutut suleriarluni immikkoortortaqarfimmi aqutsisunngoruni imaluunniit immikkoortortaqarfimmi aqutsisutut suleriarluni fagchefinngoruni allanngornissaq piumasaqaataavoq. Sulisutut immikkoortortaqarfimmi aqutsisunngoraanni sulisut suliassaminnik naammassinninniissaat tapersersortariaqarput. Suliassat tamaasa nammineq suliarisariaarutissammata. Tamanna ima isumaqarpoq, ilinniartariaqarpoq aallartittariaqarlunilu. Suliassat ilaat iperartariaqarput suliariunnaarlugit. Iperaanissap pisariaqartinnera aamma nutaanik ilinniarnerup atuutsilissavaa fagchefinut nutaanut aamma pisortanut aqutsineq assigiinngissuteqarmat aqutsisutut qaffasissuseq sorlermi inissisimaneq apeqqutaalluni.

Manna Kommuneqarfik Sermersuumi ataqatigiissumik pitsaassuseqartumillu aqutsinermi aqutseriaatsimut tunngavissaq sakkussaavoq pingaaruteqarluinnartoq. Nammineq atuuffimmut iluatitsinissamut ikiuutaavoq aamma allanik suleqateqarnermi.

Aqutseriaatsimut tunngavissaq periutsit arlallit atorlugit ingerlanneqarsinnaavoq pingaaruteqarporlu ingerlatsiviit ataasiakkaat, immikkoortortaqarfiit aqutsisullu periusissiamik nassaarnissaat, ilissinnorluinnaq naleqartitsisumik. Naggataatigut massuma kingunersissavaa suliassat pingaarnersaasa pitsaanerpaamik naammassineqarnissaat. Pingaarnerpaamik innuttaasoq pineqarpoq.