Uagut takorluugarput: Meeqqat atuarfiat ammasoq aamma peqataatitsisoq, ataatsimut kivitseqatigiilluta

Meeqqat atuarfiat atuartunit, ilinniartitsisunit, sullissivinnit aamma kommunalbestyrelsemit ataatsimoorussamik ingerlanneqassaaq. Atuarfik tassaassaaq angajoqqaanut meeqqamik atuarnerannut peqataatitsiffiusoq ilanngutsitsiffiusorlu, aqutsisunut ilinniartitsisunullu atuartup ineriartornissaanut, atuartinneqarnissaanut pissuserinnissaanullu ataatsimoorussamik akisussaaffeqarfiusoq. Ataatsimut kivitseqatigiinniaraanni, taamatuttaaq pingaaruteqarluinnarpoq uagut kommunalbestyrelsimi ingerlatsivitsinnillu tassunga tapertaaqataanissarput. Ataatsimut suleqatigiiffissatsinnik pilersitsiniarpugut, misilittakkatsinnik paarlaasseqatigiittarsinnaalluta, immitsinnut ilinniarfigaluta aamma meeqqat atuarfiisa ineriartortinnissaannut akisussaaffimmik ataatsimoorluta tigusissalluta.

Taamaammat imatut perusuppugut:

  • Kommunalbestyrelsit, atuarfimmi siulersuisut, ingerlatsiviit atuarfiullu tamarmik oqaloqatigiiffigisinnaasaanik pilersitsilluta.
  • Atuarfimmik pilersitsilluta, tassani angajoqqaat aamma atuarfiup atuartoq ataatsimoorlutik akisussaaffigissallugu.
  • Atuarfimmi aqutsisoqarfiup klassit ataasiakkaat qanimut suleqatigiissutigissagai.
  • Atuarfiit sunngiffinnilu sammisassaqartitsisut suleqatigiissinnerulerusuppagut.

Uagut takorluugarput: Atuartut kalaallit piorsarsimassusaannik aallaaveqartumik nunarsuarmioqataasinnaanissaat

Kommuneqarfik Sermersuumi atuarfii tassaassapput pioreersut, nalitta siunissattalu naapiffii.

Kalaallit Nunaat qeqertaavoq piorsarsimassutsikkut namminerisaminik immikkuullarissusilik, Kalaallit nunaalli aamma nunarsuup ilagaa. Atuarfik piorsarsimassutsinut allanut ammasuussaaq, aamma atuartut nunarsuarmioqatigiinnut innuttaaqataanissamut piareersarneqarnissaat isumagissallugu. Innuttaaqataassapput avammut aallarsinnaasut, ilinniarlutik, aamma misilittakkanik naleqaqisunik katersillutik. Ilinniagaqarneq misilittakkallu, innuttaasut misilittakkat taakku tamaasa Kalaallit nunaannut angerlaqqikkunik nassatassaat, kalaallit nunaanni innuttaasut siunissaasa ilusilersornissaanut ineriartortinnissaanullu tuniseqataasussat. Kisianni uagut atuartuutivut kalaallit piorsarsimassusianni patajaatsumik toqqammaveqassapput, innuttaaqataanissamullu piareersartariaqarput, inuiaqatigiinni naleqartitatsinnik, ileqqutoqqatsinnik, oqaluttuaatitsinnik ineriartortitseqataassallutik.

Taamaattumik inuiaqatigiinni kalaallini aamma piorsarsimassutsitsinnik ataatsimoorussamik kingornussatsinnik sorlaqarluta, atuartuutivut nunarsuarmioqataanissaannut sapinngisamik pitsaanerpaanik ilinniagaqartinniarpavut.

Taamaammat imatut perusuppugut:

  • Ilikkagassatut pilersaarutit atorlugit najukkami innuttaaqataasut suleqatigalugit atuarfik ammarneqassaaq.
  • Atuartut ilinniartillugit tamatta ataatsimut najukkatsinni inooriaatsimik kingornussagut pillugit aamma pinngortitamik atuinerput pillugu.
  • Tuluttut oqaatsit alloriarfimmi siullermi ilinniartitsissutiginissaasa eqqunneqarnissaat.
  • Tabletit atuutilersillugit, nunanilu allani atuarfiit atuartullu suleqatigilernissaat qarasaasiat aqqutigalugit.

Uagut takorluugarput: Meeqqat atuarfiat atuartunik tamanik ilinniarnissamik sulisinnaanermillu piginnaanngorsaasoq

Meeqqat atuarfiat atuarfiutikkusupparput, atuartut inuuniarnermikkut tunuliaqutaat, illoqarfiup suatungaaneernerat aammalu illoqarfimmit/nunaqarfimmit suminngaanneernerat apeqqutaatinnagit, piginnaasaminnik periarfissaminnillu ineriartortitsinissaannut naligiimmik periarfissaqartitsiffiusoq. Meeqqat atuarfiat atuartuutitta atuagarsornikkut, suliaqarnikkut inuttullu piginnaasassaannik tunisissaaq, taamaalillutik meeqqat atuarfiata kingorna inuunerminni sinnattuminnik ilippanartuunerminnillu piviusunngortitsinissaminnut periarfissaqarniassammata. Taamaammat ilikkartitsiniarnermi avatangiiseqartitsilissaagut, meeqqat soqutiginninnerat annertusarneqassalluni ataasiakkaallu ilikkagaqarnissaannik kajungilersinneqassallutik.

Atuarfitta atuartunik piginnaanilinnik atuartoqalernissa, aamma atuagarsornerup sulinerullu iluini. Meeqqat atuarfiata unammilligassaannik tunissavai, aamma nutaanik ilikkagaqarnissaannut piumassuseqalersillugit, kisianni aamma pikkoriffigisaannik aallussinissaannut ineriartortitsinissaannullu periarfissillugit. Taamaattumik atuakkatigut sammisassat pingaartissavagut, kisiannili aamma assassornermi, aalanermik nutaaliornermillu sammisat qitiutillugit.

Atuartut atuarunnaaraangata soqutigisaasa piginnaasaasalu ineriartorteqqinnissaat pingaaruteqarpoq, taamaammat atuarunnaarnerminni piginnaasamik ilinniaganngortinnissaannut suliaqarfigilernissaannullu periarfissat suunerinik ilisimasaqarnissaat pisariaqarpoq.

Taamaammat imatut perusuppugut:

  • Atuagarsornikkut sulinikkullu/ilinniartitsinermi fagit pilersitsisinnaanermut attuumassuteqartuni atuartut pikkorissarnissaat.
  • Inuussutissarsiornermi aaqqissuussaanikkut aamma ilinniartoqarfinni suleqatigiinnerup nukittorsarneqarnissaa, aamma atuartut periarfissamikkut paasinninnissaannik aqqutissiuutissallugit.
  • Atuartut ataasiakkaat isumaginerisigut, aamma ataasiakkaanut ilikkarniarnermi avatangiisaasa tulluussarnerisigut.
  • Atuartut tamarmik takorluukkaminnik siunertaminnillu piviusunngortitsinissartik angusinnaagaat.

Uagut takorluugarput: Suliffiup avatangiisii pitsaasut – ataatsimoorussamik akisussaaffik

Atuarfik suliffeqarfiussaaq, sulisunut atuartunullu atugarissaartitsiffiusoq. Atuartut ilinniartitsisunik, aqutsisunik teknikkeqarnikkullu sulisunik suliffimminnik nuannarinnittunik naapitsinissaat pingaaruteqarpoq. Taamaammat suliffimmi pitsaasunik avatangiiseqarnissamut kikkut tamarmik naleqqussarsimanissaat kommunimiit tapersersueqataaffigissavarput. Aqutsisut atuarfimmilu sulisut attuumassuteqartut kommunimit suleqateqarsinnaasariaqarlutil- lu siunnersorneqarsinnaasariaqarput. Pikkorissartitsinerit ilinniaqqinnerillu aqqutigalugit suliffimmi avatangiisinik piorsaaniarluta anguniagalimmik sulinitsigut tapertaassaagut.

Atuartut ilinniartitsisullu atugarissaarnissaannut init pingaaruteqarluinnarput. Taamaammat atuarfiit tamarmik illullu iluisa silaannaat sulinermi avatangiisit pitsaasuunissaannut tapertaanissaat ikorfartuutaanissaallu anguniarlugu sulissutigerusupparput.

Taamaammat imatut perusuppugut:

  • Atuarfiit anguniakkanik suliaqarnissaat, aamma sulinermi atukkanik naleqartitsineq, aamma atuartunut sullissinerminni.
  • Tarnikkut sulinermi atukkat pitsaasumik pilersinnissaat, tassani ammasumik aamma oqaloqatigiinnermi ilisimasaqarnermik aallaaveqartumik.
  • Ineriartorneqeqqarsaatiginerullugu, aamma pisortat ilinniartitsisullu piginnaasaasa qaffassarnerisigut.

Uagut takorluugarput: Kikkut tamarmik toqqissisimasutut, pingaartinneqartutut naleqartutullu ulluinnarni misigisimanissaat

Kommuneqarfik Sermersuumi meeqqat atuarfiini atuartut misigissavaat, atuarfik sumiiffiusoq toqqissisimaffigisinnaasartik. Atuartut tamarmik tunuliaqutaat pisariaqartitaallu apeqqutaatinnagit pingaartinneqarlutik naleqartinneqarlutillu misigisimassapput. Atuartut kikkulluunniit atuartullu assigiinngitsunik atugassaqartitaasut meeqqat atuarfianni inissaqartinneqassapput, atugarissaarlutillu atuarnertillu nuannaralugu ulluinnaqartinneqassallutik, taamaalillutillu toqqissisimanartumik ineriartorfiusumillu atuarnermi avatangiiseqalerlutik.

Meeqqat atuarfiat aqqutigalugu atuartut ataatsimoornernik piumasaqaataasunik ilinniartinneqalissapput, aamma allanik naapitsisarnermik assigiimmik naleqartitsinermik akuerinninnermillu ilinniartinneqassallutik, soorlu atuarfimmi nammineq qanoq naapinneqartarlutik

Ulluinnarni toqqissisimasumik pilersitsiniarnitsinni pingaaruteqarpoq, meeqqat atuarfianni ikaarsaariarnerit sapinngisamik oqitsumik ingerlanneqartassasut, klassit agguataakkani, kisianni aamma atuarfiit paaqqinnittarfiillu akornanni. Ilinniartitsisut perorsaasullu meeqqanut ataasiakkaanut ilisimasaminnik avitseqatigiissinnaasariaqarput, aamma piginnaasatik akunnerminni atorsinnaasariaqarpaat ulluinnaat toqqissisimasumik pilersinniarnerinut, tassani atuartup ineriartornissaa ingerlalluarnissaalu pitsaanerpaamik periarfissikkumallugu.

Taamaammat imatut perusuppugut:

  • Atuartut ataasiakkaat isumagineqassapput, ataasiakkaatut inoqatit akornanni ineriartornerat ilorrisimaarnerallu malinnaavigineqarluni.
  • Meeqqat atuarnertik tamaat ikaarsaariartarnerit pitsaasut misigisassagaat, atualinnginnerminni aamma atuarfimmit anereerunik.
  • Tarnikkut peqqinneq tatitussuserlu qitiutillugit angajoqqaallu suleqatigalugit qinngasaaruttarneq pinaveersaartissavarput.
  • Atuartut tamarmik kammaqarsinnaatitaapput, allallu kammalaatitaartornissaannik ikiussallugit.

Atuarfeqarnermut politikki uani aasinnaavat.

Quppernerup imarisaa qanganitsersimava?

Quppernermut naqqiutissaqarpit?