Sunngiffimmi aalisartuuguit nammineq atugassannik saarullinniarnermi aalisarnissamut akuersissuteqartariaqanngilatit.
Sunngiffimmi aalisartunut tunineqarsinnaasunik saarullittassiissutinik Naalakkersuisut aalajangersaasimapput. Sunngiffimmi aalisartutut pisatit tunerusukkukkit saarullinniarnermut sunngiffimmi akuersissuteqassaatit. Malugiuk sunngiffimmi aalisartunut pisassiissutit tamakkerlugu aalisarneqarpata aalisarneq matuneqassammat tunisinermilu inuussutissarsiutigalugu aalisartut salliusussaammata.
Aalisarnermut malittarisassat aalajangersarneqarsimasut piumasaqaatillu malinnissaannut pisussaaffeqarputit.
Piumasaqaatit
- Danmarkimi innuttaasutut Kalaallit Nunaanni aalajangersimasumik najugaqassaatit.
- Nunami allami naalagaaffimmi innuttaasutut Kalaallit Nunaanni aalajangersimasumik najugaqassaatit aamma ukiuni marlunni ataqatigiissumik najugaqarsimassallutit.
- Sunngiffimmi saarullittatit tunineqarnissaat kissaatigigukku akuersissummik qinnuteqassaatit.
- Inuussutissarsiutigalugu aalisartut ataatsikkut sunngiffimmi saarullinniarnissamut akuersissummik tunineqarsinnaanngillat paarlattuanillu.
Qinnuteqarneq
Sunngiffimmi saarullittatit tunineqarnissaat kissaatigigukku sunngiffimmi saarullinniarnissamut akuersissut pillugu qinnuteqarusullutit illit kommuninnut saaffiginnissaatit.
Akuersissut ukiumut pisassiiffiusumut ataatsimut atuuppoq ukiullu tamaasa akuersissummik nutaamik qinnuteqartassaatit. Ukioq pisassiiffiusoq januaarip aallaqqaataaniit decembarip 31-ata tungaanut atuuttarpoq.
Arajutsinaveersaassavat ullormit akuersissummi allassimasumiit ukiup pisassiiffiusup naanissaanut aatsaat atuutilissammat.
Suleriaatsit
Saarullinniarnermut sunngiffimmi akuersissutinut qinnuteqaatit nammineq kommunerisami pisarput. Sunngiffimmi aalisartunut piumasaqaatit naammassisimagukkit akuersissummik tunineqassaatit. Nammineq atugassannik taamaallaat aalisarusukkuit akuersissuteqassanngilatit.
Umiatsiaararsorluni aalisarneq
- Sunngiffimmi akuersissutit nutartissagukku taava kommunip ilinnut akuersissut atulersissinnaavaa
- Siullermeertumik umiatsiaaqqannut sunngiffimmi akuersissummik qinnuteqaruit taava qinnuteqaatit kommunip Aalisarnermut, Piniarnermut Nunalerinermullu Naalakkersuisoqarfimmut nassiutissavaa, tassanilu qinnuteqaatit suliarineqarluni.
Amerlanertigut ullut 14-it iluanni qinnuteqaatinnut akissutisissaatit. Qinnuteqaativit suliarinissaanut paasissutissat amigaatigineqarpata attavigineqarumaarputit.
Qinnuteqaatit suliarineqartarneri pillugit apeqqutissaqaruit Aalisarnermut, Piniarnermut Nunalerinermullu Naalakkersuisoqarfimmut atassuteqakutsoorsinnaavutit.
Naammagittaalliuuteqarneq
Oqartussat aalajangeeriaasiat aallaaviatigut naammagittaalliutigineqarsinnaanngilaq. Qinnuteqaatilli akuerineqassanngikkaluarpat tunngavilersuummik tunineqarumaarputit. Aalajangiineq kukkusumik tunngavilerneqarsimasorigukku imaluunniit paatsoortoqarsimasoq Aalisarnermut, Piniarnermut Nunalerinermullu Naalakkersuisoqarfimmut naammagittaalliorsinnaavutit, taassumalu ilinnut suliaq nalileqqitassatut ingerlassinnaavaa. Qinnuteqaativit akuerineqannginneranut allakkiaq tigugukku sukkanerpaamik naammagittaalliuutit nassiutissavat.
Naammagittaalliuutit allakkatiguussaaq aamma sooq sunalu pillugu naammagittaalliuuteqarnerlutit allassavat. Eqqaamajuk naammagittaalliuutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.
Naalakkersuisoqarfiup naammagittaalliuutit nalilersussavaa suliarlu ilinnut tunngasoq ingerlanneqareerpat attavigineqarumaarputit.