Sermeq Tapiissuteqartarfik

Sermeq Tapiissuteqartarfik – kulturi nutaamik eqqarsalersitsisarmat

Kultureqarnermut immikkoortitat kulturikkut suliaqarnermi nutaanik misileraaffiusunik pilersitsinissamut kulturimillu suliaqartut assigiinngitsut, namminersorlutik inuussutissarsiortut kommunimilu innuttaasut akornanni suleqatigiinnermik siuarsaanermut atorneqassapput.

Kommuneqarfik Sermersuumi innuttaasunut kommunimullu tikeraartunut kulturikkut ingerlatanut tapiissuteqartoqarsinnaavoq.

Peqatigisaanik kultureqarnermut immikkoortitat iluanni siunertaavoq suliniutit immikkuullarissut pisoqartitsinerillu ukiut tamaasa ileqqoralugu ingerlanneqartartut najukkami kulturikkut suliaqartunit aaqqissuunneqartut tapersersornissaat.

Ukiut arlariit tulleriit kultureqarnermut immikkoortitanit tapiiffigineqarsinnaaneq qularnaveeqquserneqarsinnaanngilaq.

Kultureqarnermut immikkoortitanit tulleriiaaraluni pingaarnersiuineq:

Kommunalbestyrelsip aalajangersimavaa kultureqarnermut immikkoortitanit tulleriiaaraluni pingaarnersiuinermi suliat makku pingaartillugit isiginiarneqassasut:

  • kommunip najugarfippassuinik attaviliisut
  • kommunimi kulturip tungaatigut nutaaliorfiusut – suliaqarfiit nutaaliorfiusut
  • illuatungeriinnik arlalinnik nutaanik suleqatigeeriaatsinik atuiffiusut
  • kommunimi immikkut kulturikkut suliniuteqarfissanut ilaasut
  • tamanit ornigarneqarsinnaasut
  • annerusumik aningaasalersuiseqataasinnaanermik takutitsiffiusut

Tapiissutinik agguaaneq

Kultureqarnermut immikkoortitanit tapiissutit ukiup tulliani kulturikkut suliaqarnermut atugassat ukiumi qaammatit pingasukkuutaartut kingullianni agguaanneqassapput. Aningaasanit immikkoortitanit sinneruttunit ukiup ingerlanerani marloriarluni agguaasoqassaaq, qinnuteqaatit 50.000,00 kr.-it inorlugit amerlassuseqartut aallaaviusassallutik.

Tapiiffigineqarnissamut piumasaqaatit

Kulturikkut suliaq Kommuneqarfik Sermersuumi ingerlanneqassaaq tamanillu ornigarneqarsinnaassalluni. Iserneq akeqanngitsuusinnaavoq imaluunniit isernermi akiliuteqartitsisoqarsinnaalluni.

Qinnuteqartut:

Sullissiviit kulturikkut suliaqarfiusut, peqatigiiffiit suleqatigiilluunniit, aamma inuit ataasiakkaat tapiiffigineqarnissamik qinnuteqarsinnaapput.

Sullissiviit pisortanit tapiissutinik pisartagaqareersut ingerlatsinerup nalinginnaasup qanoq ililluni anneruneranik nassiuaateqassapput.

Tapiissutit

Tapiiffigineqarnissamik / ingerlatanut amigartooruteqarnissamut qularnaveeqquserneqarnissamik qinnuteqaat paasissutissanik qinnuteqaateqarnermi immersugassami allaqqasunik imaqassaaq, taanna www.sermersooq.gl–imi nassaarineqarsinnaavoq.

Kulturikkut ingerlatat tamanit ornigarneqarsinnaasut piareersarnerinut ingerlanneqarnerinullu tapiiffigineqarnissamik qinnuteqartoqarsinnaavoq.

Kulturikkut ingerlatat makkununnga tunngasinnaapput:

  • Isiginnaartitsineq performancelu,
  • Qitinneq, nipilersorneq, kusanartuliorneq,
  • Assilialianik ilusilersukkanillu saqqummersitsineq,
  • Assinik videolianillu suliaqarneq.

Tapiissutit suuneri

Tapiissutinik assigiinngitsunik marlunnik neriorsuuteqartoqarsinnaavoq: Ingerlatanut amigartooruteqarnissamik qularnaveeqqutaasutut toqqaannartumilluunniit tapiissutitut.

Aaqqissuussinernut isernermi akiliuteqartitsiviusunut allatulluunniit isertitaqarfiusunut amigartooruteqarnissamik qularnaveeqqutaasutut tapiissuteqartoqarsinnaavoq.

Aaqqissuussinermut aningaasartuutinut, tassa teknikkimik atortunillu attartornermut, akissarsiassanut allanullu toqqaannartumik tapiissuteqartoqarsinnaallunilu amigartooruteqarnissamik qularnaveeqqutaasutut tapiissuteqartoqarsinnaavoq.

Tapiiffigineqarnissamut piumasaqaataavoq PR-imut paasissutissani erseqqissumik allassimassasoq Kommuneqarfik Sermersuumi Kultureqarnermut immikkoortitanit tapiisoqarsimanera.

Nalinginnaasumik makkununnga tapiisoqarneq ajorpoq:

  • ingerlatanut qinnuteqaammik nassiussinnginnermi pisunut
  • paasisassarsiorluni angalanernut
  • atuakkanik, kataloginik allanillu allakkatigut saqqummersitanik saqqummersitsinernut
  • ataatsimiinnernut, oqalugiarnermillu ingerlatsinernut
  • pilersitsinermut aningaasartuutinut
  • ilassinninnermut aningaasartuutinut soorlu ass. nerisassanut, imigassanut assigisaanullu

Amigartooruteqarnissamik qularnaveeqqutaasunik akiliineq

Aaqqissuussinerup ingerlanneqarneranit kingusinnerpaamik qaammatit marluk qangiunneranni naatsorsuutinik nassiussisoqassaaq, qinnuteqaateqarnermilu missingersuutinut toqqaannartumik naleqqiussisoqarsinnaanngorlugu suliarineqarsimassapput. Aningaasartuutinut isertitanullu uppernarsaatissat tamaasa ilanngunneqassapput, assilisanik assingusunik ilanngussilluni.

Nalunaaruteqarneq / naatsorsuutit

Aaqqissussiinernut tapiissutinik / amigartoornissamik qularnaveeqqutaasussanik tapiissutinik tunineqarsimasunut aaqqissuussinerup ingerlanneqarneranit kingusinnerpaamik qaammatit marluk qangiunneranni nalunaarusiamik nassiussisoqassaaq, orniguttut / tusarnaariat amerlassusaannik kiisalu naatsorsuutinik imalimmik.

Qinnuteqarnermi tunniussiffissat

  • 1. oktobari
  • 1. marsi

Qinnuteqarnermi immersugassaq:

Qinnuteqarfissamut immersungassaq uani aasinnaavat. Immersorneqareerpat allakkatigut Kommuneqarfik Sermersooq-mut nassiunneqassaaq imaluunniit e-mailimut uunga kultur@sermersooq.gl