Taannaaguit pisortani atorfeqartoq imaluunniit meeraq inuusuttorluunniit pillugit suleqatigiissuteqartoq, nalunaarutiginninniarlutillu, taava tamatigut ataani nalunaarutiginninnermi immersugassaq atortassavat. Immersugassami paasissutissat pillugit ilitsersorneqassaatit, Kommuneqarfik Sermersuumi sukkasuumik nalunaarutiginninnerup suliarineqarnissaanut iluaqutaasussat.

Nalunaarutiginninneq illit aqutsisunnit atsiorneqartariaqarpoq. Aqutsisuit ilimaginngisannik nalunaarutiginninneq atsiorumanngippagu, nalunaarutiginninnerup nassiunnissaa pisussaaffigivat.

Nalunaarutiginninnermi immersugassaq

Ataani atuagassiannguami nalunaarutiginnittarnermi periutsit, aamma nalunaarutiginnikkuit qanoq pisoqartarnersoq annertunerusumik atuarsinnaavatit.

Pisortani sulisunut, sulialinnut suleqatigisanullu atuagassiaq

Nalunaaruteqarnissamut pisussaaffik sakkortunerusoq

Illit suliaqartutut sakkortunerusumik pisussaaffeqarputit meeraq atugarliortoq immaqalu nakuuserfigineqarnermik arlaatigulluunniit sumiginnagaanermik atugaqartoq pasitsaassimagukku tamanna isumaginninnermik oqartussaasunut nalunaarutigissallugu.

Pisussaaffik pisortani sulisunut, nakorsanut inunnullu najugaqarfinni sulisuusunut, angajoqqaarsianut, qimarnguinniittunut, katsorsaanermik neqerooruteqartuniittunut imaluunniit namminersortunut pisortat ingerlataannik neqerooruteqartunut atuuppoq.

Innuttaasoq kinaluunniit isumaginnittoqarfimmi, atuarfeqarfimmi peqqinnissaqarfimmiluunniit kiisalu ulluunerani paaqqinnittarfinni sulisunut sulinerminut atatillugu Inatsisartut Inatsisaat una malillugu meeqqamik ikiorserneqarnissamik pisariaqartitsisumik ilisimasaqaleruni, kommunalbestyrelsimut ingerlaannartumik nalunaaruteqarnissaminut sakkortunerusumik pisussaaffeqarpoq.  Taamatuttaaq nalunaaruteqartussaatitaanermut pisussaaffik innuttaasunik qinikkanik imaluunniit inuiaqatigiinnik sullissinermik tunngaveqartumik suliaqartunut atuuppoq, takuuk meeqqat tapersersorneqarnissaannut Inatsisartut inatsisaat nr 20, 26 juuni 2017-imeersoq §16. Taakkulu pisortani sulisuusut qinikkallu taamaalillutik sakkortusisamik/annertusisamik kommunalbestyrelsimut nalunaaruteqartussaatitaapput, ilisimasaqarunik meeraq peqqissutsiminut ineriartorneranullu ulorianartorsiortitsisumik inuuneqartinneqartoq paasigunikku.

Nalunaarutiginnereeruit qanoq pisoqassava?

Nalunaaruteqarninniit kingusinnerpaamik sapaatip akunnera ataaseq qaangiuppat tigusimaneranut uppernarsaat tigussavat. Nalunaaruteqarninniit kingusinnerpaamik sapaatip akunnera ataaseq qaangiuppat Kommuneqarfik Sermersuumi Nalunaarutiginninnermut nakkutilliisumiit nalunaaruteqarninnut uppernarsaat tigusimanagu, taava oqarasuaammut uunga saaffigisinnaavatsigut : 36 60 60.

Kommuneqarfik Sermersuumi Nalunaarutiginninnermut nakkutilliisup nalunaarutigineqartut tiguneqartut tamaasa akunnerit 24-t iluini nalilersuiffigisarpai. Naliliinermi siullermi paasiniarneqartarpoq nukinginnartumik iliuuseqartoqassanersoq. Nalilertarparput erngertumik iliuuseqartoqanngippat tamanna meeqqamut imaluunniit inuusuttumut annertuumik ajoquserneqaataasinnaanera navianaateqartoq. Tulliullugu isumaginninnikkut suliatigut misissuineq aallartinneqassanersoq isummerfigisarparput. Suliatigut misissuinermiippoq meeqqap imaluunniit inuusuttup atugaasa sukumiinerusumik misissuiffigineqarnerat. Tamanna pisarpoq atuarfimmiit, ulluunerani paaqqinnittarfimmiit allamilluunniit oqaaseqaateqartitsinikkut aammalu meeqqap inuusuttulluunniit aammalu angajoqqaajusunik oqaloqateqarnikkut. Isumaginninnermi suliatigut misissuineq meeqqap imaluunniit inuusuttup ilaqutaasullu ikiorsiissutinik tunineqarnerannik kinguneqarsinnaavoq.

Quppernerup imarisaa qanganitsersimava?

Quppernermut naqqiutissaqarpit?