Misi meeqqat inuusuttullu pillugit siunnersuisarfiuvoq, Nuummilu inissisimalluni. Meeqqat inuusuttullu pillugit siunnersuisarfik/Misi perorsaanikkut tarnip pissusaatigut angajoqqaanut sulisunullu siunnersuinernik neqerooruteqartarpoq, sullittarpaallu Kommuneqarfik Sermersuumi meeqqat inuusuttullu 0-18-it tikillugit ukiullit. Angajoqqaajuguit, ilinniartitsisuuguit imaluunniit perorsaasuuguit, tamatumunngalu atatillugu ajornartorsiutinik misigisaqartaruit, ilisimasassanik siunnersuutinilluunniit pisariaqartitsiguit, taava Misimut saaffiginnissinnaavutit. Saaffiginninnerup kingorna Misip ajornartorsiut misissussavaa qanorlu iliorsinnaaninnik siunnersussallutit.

Perorsaanikkut tarnip pissusaatigut ajornartorsiutit pingaartumik meeqqat ineriartornerat, atugarissaarnerat ilikkagaqarniarnerallu pineqartarput. Ajornartorsiummik misigisaqaruit, imaluunniit meeqqamut/inuusuttumut tunngassuteqartumik taasatta iluani nalornissuteqaruit, taava uatsinnut saaffiginnissinnaavutit.
Assersuutigalugu ajornartorsiutinik makkunannga Misip ikiorsinnaavaatit:

  • Angajoqqaatut malugigukku meeqqavit oqalunniarnini ajornartorsiutigigaa imaluunniit peqatimisut    pitsaatigisumik oqalussinnaaneq ilikkarsimanngippagu
  • Perorsaasutut malugigukku ataatsimoornermi meeqqat ilaannik ilaatitsiniarneq ajornartorsiutigalugu
  • Ilinniartitsisutut malugigukku atuaqatigiinni meeraq ataaseq arlallilluunniit atugarliortut, ass. pimmataaneq imaluunniit atuartitsissutini ajornartorsiuteqartut takusarukkit.

Qanoq saaffiginnissaanga?

Ajornartorsiut misigisat immersugassamut allaaserissavat, apeqqutitillu misi@sermersooq.gl –imut nassiullugit. E-mailikkut periarfissaqanngikkuit sianernissannut tikilluaqquatsigit +299 36 63 30-mut imaluunniit allaffimmut aqqusaarlutit saaffiginninnikkut.

Akuersissut

Ilinniartitsisuuguit imaluunniit perorsaasuuguit meerarlu aalajangersimasoq saaffiginnissutigerusullugu kissaateqaruit, meeqqap angajoqqaavi eqqartueqatigeqqaarnissaat isumagissavat, meerarlu pillugu Misimut saaffiginninniarninnut akuersissummik qinnuigeqqaassavatit.

Angajoqqaanik siunnersuinissamik Nuummi periarfissaq

Misi/Meeqqat inuusuttullu pillugit siunnersuisarfik

Angajoqqaat uunga saaffiginnissinnaapput:

  • Oqar. +299 36 63 30
  • misi@sermersooq.gl
  • Kuussuaq 17  sisamanngornikkut nal. 13 -15

Quppernerup imarisaa qanganitsersimava?

Quppernermut naqqiutissaqarpit?