Kuserneq tassaavoq Nuummi naartusunut ukioqanngitsuniillu marlunnik ukiulinnut ilaqutariinnut najugaqarfiutigaluni katsorsaanermik neqeroorutaasoq. Ilaqutariinut angajoqqaatut tapersersorneqarnissamik, aamma meeqqamik isumagilersinnaanissaanut sakkussanik pisariaqartitsisunut sammitinneqartoq.

Ilaqutariit katsorsartiutigalutik Kusernerup katsorsaanermi inissiaataanni najugaqartarput. Kusernermi inissiat atorneqarsinnaasut katillugit 11-iupput. Kusernermi ilaqutariit meeqqaminnut toqqissisimanartumik ineriartuutaasumillu ulluinnarni aaqqissuussaqarnissamut ikiorneqartarput.

Ilaqutariit Kusernerup inissiaataani najugaqartut aqqutissiuunneqarnermikkut katsorsarneqarnermikkullu tapersersorneqartarput, kiisalu imminnut meeqqamilu isumassornissaannut oqaloqatigiinnernik ingerlataqartarlutik.

Ilaqutariit Kusernermit qanoq tapersersorneqartarpat?

Kusernermit tapersersorneqarnissamut ilaqutariit katsorsartinnissamut neqeroorut tamaat atortussanngorlugu innersuunneqartarput. Meeqqanut Ilaqutariinnullu Ingerlatsivik taannaavoq Kusernermut innersuussisartoq. Ilaqutariit Kusernermut innersuunneqassagunik piumasaqaatinik arlalinnik naammassinneqqaartussaapput:

  • Ilaqutariit initaarnissamut utaqqisut allattorsimaffiannut allatsissimassapput
  • Ilaqutariit amerlanerpaamik inuit sisamaassapput
  • Angajoqqaajusut tarnimikkut asuliinnaanngitsunik napparsimassanngillat
  • Angajoqqaajusoq angajoqqaajusulluunniit aanngajaarniutinik pinngitsuuisinnaanngikkunik, Kusernermi katsorsartinnerup ingerlanneqarnerata saniatigut aanngajaarniutinut katsorsartinnissamut piumassuseqassapput.

Ilaqutariit katsorsartinnermut neqeroorutip naleqquttuunera nalilertinniarlugu sullissisorisaminnut attaveqarsinnaapput. Sullissisoqanngikkaanni Meeqqanut Ilaqutariinnullu Ingerlatsivimmut oqarasuaatikkut 36 70 00-imut attaveqartoqarsinnaavoq.

Quppernerup imarisaa qanganitsersimava?

Quppernermut naqqiutissaqarpit?