Paaqqinnittarfimmut qinnuteqarit imaluunniit aninermik nalunaaruteqarit

Quppernermi uani, meeqqat meeqqerivimmi qanoq inissamik allatsissinnaagit, aamma qanoq meeqqerivimmi inissap taamaatinnera pillugu atuarsinnaavat. Meeqqerivinnut tunngasuni immersugassat tamaasa aamma nassaarisinnaavatit.

Qitornat paaqqinnittarfimmiittalernissaanut kissaateqarpit imaluunniit paaqqinnittarfimmiikkunnaartussaava? Utaqqisunut allatsikkusuppiuk? Isumagisassatit sullissivik.gl -ikkut nammineq sullinnikkut suliarisinnaavatit imaluunniit illoqarfinni nunaqarfinniluunniit Innuttaasunik Kiffartuussivikkut ornigullutit saaffiginninnikkut kiffartuunneqarsinnaavutit.

Angajoqqaatut kissaateqarsinnaavutit qitornat paaqqinnittarfik sorlermi paarineqartalissanersoq.

Qitornat qaammatinik pingasunik qaammateqalereerpat utaqqisut allattorsimaffiannut allatsissinnaavat.

Qitornat meeraaqqerivimmut imaluunniit ulluunerani angerlarsimaffimmi paarsisartuni nalunaarsorneqarpat, taava meeqqerivimmiinnissaanut ukui naammatsippata ingerlaannartumik meeqqerivimmi inissaqartinneqassaaq.

Malugiuk, paaqqinnittarfimmiititsisalernissamut utaqqisoqarsinnaasarmat. Tamanna pillugu Sullissivimmi paasisaqarnerugit.

Sullissivikkut nammineq sullinneq

Nammineq sullissivimmut iserit.

Nammineq sullissinnaaniarlutit NemID atussavat. NemID netbankimut atortakkat atussavat.

Innuttaasunik Kiffartuussivinnut saaffiginninneq

Innuttaasunik Kiffartuussivinnut saaffiginnikkuit immersugassat immersussavatit, atsiussaatit tunniullugillu. Saaffiginninnermi nassarneqassapput:

  • Qitornavit atianik/kuisinnermut uppernarsaataa
  • Najugaqarfimmut uppernarsaat
  • Ilaqutariit/inoqutigiit ukiup siuliani isertitaasa allagartaat. Taakku paaqqinnittarfimmut qanoq annertutigisimik akiliisarnissamut naatsorsuinermi atorneqassapput

Naammagittaalliorneq

Paaqqinnittarfik pillugu naammaginngisaqaruit, angajoqqaatut naammagittaalliorsinnaanermut pisinnaatitaaffeqarputit. Soorlu uku naammagittaalliutigisinnaavatit:

  • Utaqqisutut allattorsimaffimmut tunngasut
  • Paarsisumik atorfinitsitsinermi

Kommunalbestyrelsimut naammagittaalliorsinnaavutit. Naammagittaalliutit allagaassaaq, aamma naammagittaalliornermi pappiaqqat atorneqartussat eqqaamanissaa isumagissavat.

Naammagittaaliutit kommunalbestyrelsimiit suliarineqarnerani inernera naammaginngikkukku, Isumaginninnermi naammagittaalliuteqartarfimmut suliaq ingerlateqqissinnaavat. Sullisivik.gl -imi atuarnerugit.

Immersugassat

Immersugassat ulluunerani paaqqinnittarfinnut tunngasut uani nanikkit.