Quppernermi uani paasisassarsiorluni angalanissamut tapiissutinik qinnuteqarneq annerusumik atuarsinnaavat.
Paasisassarsiorluni angalaneq tassaavoq nunap angalaffigisap paasisassarsiorfiginissaanik siunertaqarluni angalaneq. Paasisassarsiorluni angalasartut tassaapput meeqqat atuartut ilinniakkaminnik itinerusumik ilisimasaqalernissamik paasinissaanillu siunertaqarlutik angalasussat.
Atuartorpassuit paasisassarsiorlutik angalanissaminnut periarfissaqarput. Paasisassarsiorlunili angalanerit akeqarput taamaammallu aningaasalernissaa ilungersunarsinnaasarluni.
Aningaasalersuineq
Atuaqatigiippassuit paasisassarsiorlutik angalanissatik assigiinngitsumik aningaasalersortarpaat:
• Peqataasussat akiligassap ilaa namminneq akilertarpaat
• Akiligassap ilaa aningaasannanniarnikkut, soorlu tuniniaanikkut eqquiniaatitsinikkulluunniit akilerneqartarpoq
• Akiligassap ilaa pisortanit aningaasaateqarfinnilluunniit tapiiffigitinnikkut akilerniarneqartarpoq
Paasisassarsiorlutik angalanissaminnut tapiiffigitikkusuttut arlaqartut kommunimut qinnuteqarniarlutik saaffiginnittarput.
Paasisassarsiorluni angalanerit atuaqatigiinnit ingerlanneqartarpoq piffissami januarip aallaqqaataata aasaaneranilu atuanngiffeqalernissap nalaani. Paasisassarsiorlutik angalaniartut tapiiffiginissaannut qanoq aningaasaliiffigineqartassanersut pillugit Kommuneqarfik Sermersooq nammineq malittarisassaqarpoq.
Tapiissutinut qinnuteqaatit
Atuaqatigiinnut paasisassarsiorlutik angalarusuttunut ilaaguit, angalanissassinnullu kommunimit tapiiffigineqarnissarsi kissaatigigussiuk qinnuteqaasiussaasi.
Qinnuteqarnermi apeqqutit makkua akineqassapput:
• Paasisassarsiorluni angalanissap suna siunertaraa?
• Paasisassarsiorluni angalanissamut kikkut qassillu peqataaniarpat?
• Sumut angalaniarpisi?
• Angalanissarsi qanoq akeqarpa?
• Ilissi nammineq qanoq akiliuteqarniarpisi?
• Allanit tapiiffigineqarpisi?
Kikkut tapiiffigineqassanersut qanorlu amerlatigisunik tapiiffigineqassanersut kommunimit aalajangerneqartarpoq. Paasisassarsiorluni angalanissamut akuerineqaraanni, atuartumut peqataasussamut ataatsimut 3000 koruunit tapiissutigineqarsinnaapput.
Qinnuteqareerussi
Kommunimit tapiiffigineqarussi, paasisassarsiorlusi angalareerussi makkua tunniutissavasi:
• Angalanerup naatsorsuusiornera
• Angalanermit nalunaarusiaq inuttut suliatigullu sunik pissarsiaqarsimanissinnik oqaluttuartoq
Taamaalilluni pisortat tapiissutigisartagaasa atornerlunneqannginnissaat qulakkeerneqassaaq.
Malugiuk
Paasisassarsiorlusi angalanissarsi piviusunngunngitsuussagaluarpat, tapiissutisiasi kommunimut utertissavasi.