Nunat Avannarliit Nuummi Kulturisioqatigiinnissaat tassaavoq kulturikkut pikialaartitsineq ullutsinnut naleqquttoq kulturisioqatigiinnermilu sammisat assigiinngitsut akimorlugit nutaalianik saqqummersitsisoqassalluni, avataaniit takutitsisoqassalluni tusarnaartitsisoqassallunilu. Sapaatip akunnerata ataatsip iluani kulturisioqatigiinneq nunatsinni illoqarfiit pingaarnersaani Nuummi sumiifinni 50-nik sinnilinni ingerlanneqassaaq.

Isiginnaartitsinerit, qitinneq, assiliat, nipilersuutit, atuakkat allarpassuillu isiginnaartitsisarfini, atuagaateqarfinni, illoqarfimmi, quersuarni suliffeqarfinnilu illoqarfik tamakkerlugu takutinneqassapput.
Nunat Avannarliit Nuummi Kulturisioqatigiinneranni eqqumiitsuliortut, takutitsisut, isiginnaariat, kajumissutsiminnik sulisut kultureqarfiillu qanimut suleqatiginerisigut kulturiliussaagut. Nuummi Kulturisioqatigiinneq Nuuk pillugu ingerlanneqarpoq, taamaattorli kulturisioqatigiinnissaq tassaavoq eqqumiitsuliortut kulturilerisullu nunat avannarlerneersut naapittarfiat immikkuullarissoaq, nutaaliornissamut inissaqartitsillunilu periarfissiisoq.

Nunat avannarliit issittorlu ataatsimoortinnerisigut oqaluttuarisaanikkut, kulturikkut anersaaliornikkullu avannarliit suleqatigiinneranni isiginnittariaatsit kulturisioqatigiinnermi misissorneqassapput. Taamasilluni kulturisioqatigiinnerup immitsinnut isiginnittariaaserput unammillissavaa nunarsuarmullu isiginnittariaatsinik nutaanik takutitsissalluni.

Takutitsinerit, tusarnaartitsinerit, saqqummersitsinerit atuaanerillu saniatigut eqqumiitsuliortut isiginnaariallu isumassarsitinniarlugit amerlasuunik allanik sammisaqartitsisoqassaaq, soorlu workshoppit, isumasioqatigiinnerit, oqalugiarnerit il. il.

Kulturisioqatigiinneq 2015-mi pinngorpoq ukiorlu ataaseq allorlugu Nuummi pisarluni.

nuuknordisk.gl 

E-mail: info@nuuknordisk.gl 

Tlf: +299 36 36 63 


Quppernerup imarisaa qanganitsersimava?

Quppernermut naqqiutissaqarpit?