Imigassaq pillugu akuersissut tassaavoq imigassanik aalakoornartortalinnut tuniniaanermut imaluunniit sassaallersinnaanermut akuersissut.
Suliffeqarfiit, ingerlatseqatigiiffiit aamma peqatigiiffiit imigassanik aalakoornartortalinnik tuniniaanissamik imaluunniit sassaallernissamik kissaateqartut imigassaq pillugu akuersissuteqassapput.
Imigassaq pillugu akuersissummik imaluunniit imigassanik aalakoornartulinnik tuniniaanissamut sassaallersinnaanermullu akuersissutip nutarternissaanut, imaluunniit takornariaqarneq pillugu akuersissummik nittartakkami matumani qinnuteqarneq. Ataasiaannartumik akuersissutaasartut pillugit paasissutissat annertunerusut nittartakkap ataani takuneqarsinnaapput.
Qinnuteqarit
Suliffeqarfiup ilusaa malillugu imigassaq pillugu akuersissummut qinnuteqaat eqqortoq naniuk. Qinnuteqaat tassungalu ilanngussat uunga akuersissutit@sermersooq.gl-imut nassiunneqassapput
- Inunnut ataasiakkaanut qinnuteqarnermi immersugassaq
- Ingerlatseqatigiiffinnut imaluunniit peqatigiiffinnut qinnuteqarnermi immersugassaq
- Aqutsisumik akuersisoqarnissaa pillugu qinnuteqaat
- Ingerlatseqatigiiffimmi qullersani imaluunniit siulersuisuni allannguutit pillugit nalunaarutiginninneq
Suliffeqarfimmik ulluinnarni aqutsineq akuersissummik piginnittumit imaluunniit aqutsisumit ingerlanneqassaaq. Ulluinnarni ingerlatsisoq aqutsisuussappat, aqutsisup akuerineqarnissaa pillugu qinnuteqartoqassaaq. Piffissap akuersissuteqarfiusup ingerlanerani aqutsisumik nutaamik toqqaasoqarpat, akuersissummik piginnittup qaammatip ataatsip ingerlanerani aqutsisup nutaap akuersissutigineqarnissaa pillugu qinnuteqassaaq.
Akuersissummik piginnittoq ingerlatseqatigiiffimmi qullersani imaluunniit siulersuisuni allannguuteqartoqarpat nalunaarutiginninnissaminut pisussaavoq. Allannguutit atuutilernerinit kingusinnerpaamik ullut arfineq-marluk qaangiutsinnagit nalunaarutiginninneq pissaaq.
Uppernarsaasiorneq
Qinnuteqarnissamut immersugassani tamani uppernarsaatit sorliit kakkiunneqassanersut allaqqapput. Uppernarsaatit tamakkiisut tiguneqaqqaartinnagit qinnuteqaatit Kommuneqarfik Sermersuumit suliarineqartanngillat.
Akuersissummut qinnuteqartutut uppernarsaatit pisariaqartinneqartut pissarsiarinissaannut akisussaasuuvutit. Tassani ilaatigut nassaarisinnaavatit:
- Imigassanik aalakoornartortalinnik akisussaassusilimmik tuniniaanermut sassaallernermulluunniit imigassaq pillugu politikkimut immersugassaq
- Akisussaassusilimmik tuniniaanermut imaluunniit sassaalliinermut pikkorissarnissamut (allagartaq qinnuteqaammut ilanngullugu nassiunneqassaaq)
Malittarisassat inatsisillu
Imigassaq pillugu Inatsisartut Inatsisaat nr. 35, 23. novembari 2017-imeersoq imigassanik aalakoornartortalinnik nioqquteqarnermi sassaalliinermilu kiisalu imigassaq pillugu akuersissummik tunniussinermi atugassarititaasut aamma piumasaqaataasut maleruagassanut aalajangersaapput. Akuersissummik piginnittutut imigassaq pillugu inatsimmik aamma tassunga tunngasuni inatsisinik attuumassutilinnik allanik malinninnissamut pisussaavutit akisussaasuullutillu.
- Imigassaq pillugu Inatsisartut Inatsisaat nr. 35, 23. november 2017-imeersoq.
- Imigassaq pillugu Inatsisartut inatsisaannik namminersorlutik Oqartussat nalunaarutaat nr. 47, 26. september 2023-meersoq
- Init imigassanik aalakoornartulinnik nioqquteqartarfiit sassaallertarfiillu aaqqissuunneqarneri atorneqarnerilu pillugit Namminersornerullutik Oqartussat Nalunaarutaat nr. 19 ulloq 29. marts 1990-imeersoq
- Imigassanik nioqquteqarsinnaanermut akuersissutit pillugit Namminersornerullutik Oqartussat Nalunaarutaat nr. 4 ulloq 29. maj 1992-imeersoq
- Kommuneqarfik Sermersuumi imigassamik aalakoornartortalinnik nioqquteqartarneq sassaallertarnerlu pillugit Namminersorlutik Oqartussat nalunaarutaat nr. 4 ulloq 4. marts 2011-meersoq
- Imigassaq pillugu politikki – Kommuneqarfik Sermersooq, oktobari 2020
Imigassaq pillugu inatsimmi akuersissutit assigiinngitsut aamma volumenprocentit assigiinngitsut akornanni immikkoortitsisoqarpoq. Imigassaq pillugu inatsimmi §§9 – 10 takuneqarsinnaapput. Kommuneqarfik Sermersuumi imigassanik aalakoornartortalinnik nioqquteqarnermi aamma sassaalliinermi Namminersorlutik Oqartussat nalunaarutaat nr. 4 ulloq 4. marts 2011-meersoq naapertorlugu Tunumi volumenprocentinut immikkut inatsisit atuummata.
Imigassaq pillugu inatsimmi § 4 malillugu imigassaq pillugu akuersissummik tunniussinermi atugassarititaasut:
Imm. 1: Inuit imigassaq pillugu akuersissummik tunineqarsinnaasut tassaapput:
- 25-nik ukioqalereersimasut,
- nammineersinnaassusiiagaasimanngitsut imaluunniit aningaasaqarnerminnik nammineq aqutseqqusaajunnaarsinneqarsimanngitsut,
- suliffimmik illersorneqarsinnaasumik ingerlatsisinnaanngitsuusutut pissusilersorsimanngitsutut isigineqarsinnaanngitsut,
- § 8 malillugu akuersissummik tunniussinissamut akornutaasunik tapiissutinik imaluunniit pisussaaffinnik tigusisimanngitsut,
- pisortanut 100.000 koruuninik amerlanerusunilluunniit akiligassaareersunik akiitsoqanngitsut, aamma
- akiliisinnaajunnaarsimasutut sullinneqanngitsut imaluunniit suliffeqarfimmik aaqqissuusseqqinngitsut.
Imm. 2: Imigassaq pillugu akuersissut ingerlatseqatigiiffinnut taamaallaat tunniunneqarsinnaavoq:
- ingerlatseqatigiiffiup akiliisinnaajunnaarnera imaluunniit aaqqissuuteqqinneqarnera pillugu suliaqartoqanngippat,
- ingerlatseqatigiiffik pisortanut 100.000 koruuninik imaluunniit amerlanerusunik pisortanut akiligassaareersunik akiitsoqanngippat,
- § 8 malillugu akuersissutinik tunniussinissamut pissutsinik atuuttoqanngippat, aamma
- ingerlatseqatigiiffiup qullersaqarfiani ilaasortat tamarmik siulersuisullu affai imm. 1-imi piumasaqaatinik eqquutsitippata. Nutaat ilaasortanngortut imm. 1-imi piumasaqaatinik eqquutitsissapput. Ilaasortat nikinnerannik nalunaarut allannguutip atuutsinneqalerneranit kingusinnerpaamik ullut arfineq-marluk kingorna kommunalbestyrelsimut tunniunneqassaaq.
Akiliut:
Aalakoornartortalimmik tuniniaasinnaanermut akuersissummik tunniussinermi akiligassaq 200 kr. Nunatta Karsianut akilerneqassapput.
Atuaruk
Ataasiaannartumik atuuttussamik akuersissut – Nalinginnaasut aamma qinnuteqarneq