Peqqinnissaqarfiup sullissinerinut akiliuteqartarneq pillugu Namminersorlutik Oqartussat nalunaarutaata tusarniaassutigineqarnerani Kommuneqarfik Sermersuumit akissuteqaammik saqqummiussisinnaaneq qujamasuutigineqarpoq. Decembarimi 2023-mi kommune tusarniaanerup immikkoortuani siullermi akissuteqaammik tunniussivoq, aamma tusarniaanermi akissuteqaammi matumani akissuteqaataaqqaartumi immikkoortut kommunimit aalajangiusimaneqartut kiisalu oqaaseqaatit nutaat saqqummiunneqarput.
Oqaaseqaatit nalinginnaasut
Kommuneqarfik Sermersuumit tunngaviatigut isumaqartoqarpoq, nalunaarummi immikkoortut amerlasuut erseqqissarneqarsinnaasut inatsisitigut isumannaatsuunermut aamma sulisunut nalunaarummik tunngaveqarlutik ingerlatsisuusussanut iluaqutaasussamik. Peqqinnissaqarfiup sullissinerinut qaqugukkut kommune akilerneqartussaatitaasunut pisussaaffeqarnersoq nalinginnaasumik erseqqinneq ajorpoq, aalajangersakkat nunani allani innuttaasunut aamma taakkua sillimmasiisarfiinut tunngassuteqaraangata.
Kommuneqarfik Sermersuumit paaserusunneqarpoq, akinik aalajangersaanermi suut naatsorsuinermi tunngavittut atorneqarsimanersut. Kommunimiit oqaatigineqassaaq, § 1-imi akigititat tusarniaanermi siullermi apparneqartut. Ullunut uninngaffiusunut akigititat suli qaffasissorujussuupput, tamannalu kommunip aningaasaqarneranut tatisimaneqareersumut suli annerulissasoq, pingaartumik utoqqarnut suliassaqarfimmi, suliassaqarfimmi tassani immikkoortortat inissakilliornermit unammillernartorsiorneq pissutigalugu. Kommunimit siusinnerusukkut misigineqarpoq, peqqinnissaqarfimmit innuttaasut angerlarsimaffeqannginnermut imaluunniit namminneq angerlarsimaffigisaannut angerlartinneqarnerannik ingerlatserusuttannginneq. Kommunimit erseqqissaatigineqarusuppoq, innuttaasup kommunip oqartussaaffigisaata ataani neqerooruteqarfigineqarnissaanut aalajangiisinnaatitaaneq kommunimit
Isumaginninnermut Suliffeqarnermullu Ingerlatsivik ingerlanneqartussaanera.
Kommuneqarfik Sermersuumit malugeqquneqarpoq, napparsimavimmi uninngasut naammassillugit katsorsarneqarsimappata aatsaat kommunimit akilerneqartussaatitaammata. Tassungalu atatillugu akiliunneqarnissamik qinnuteqaat akuersissutigineqaqqaartussaavoq. Peqqinnissaqarfik tassaavoq napparsimasup sungiusaqqinnermik ingerlatsineranik suliaqartussaq. Piffissaq aamma nukissat amigaataasimappata peqqinnissaqarfik Pissassarfimmut ikioqqulluni saaffiginnissuteqarsinnaavoq. Tassunga atatillugu kommunimit erseqqissaatigineqassaaq, sungiusaqqinnermi innuttaasup oqilisaassivimmi inissaqarnera qulakkeerneqarsinnaanngimmat, kisianni innuttaasoq nammineq angerlarsimaffimmini sungiusaqqissinnaammat angerlarsimaffimmi ikiorti ikiortigalugu.
Tassunga atasumik Kommuneqarfik Sermersuumit uparuarneqassaaq, innuttaasunik piartortunik kommune utoqqaat illuinut imaluunniit utoqqaat najugaqatigiiffiinut najugaqartussanik tigusisinnaanngimmat, kisianni nammineq angerlarsimaffimmi qanigisaasumut paaqqutarinninnermi aningaasarsianik tunniussisoqarsinnaammat. Kalaallit Nunaanni nappaammik piartortunut paaqqinniffeqanngimmat, innuttaasut piartortut akuttunngitsumik napparsimmavinni uninngasarput.
Aalajangersakkanut ataasiakkaanut nassuiaatit
§ 1-imut oqaaseqaatit
§ 1-imi imm. 1, nr. 1 – 5 peqqinnissaqarfiup immikkoortuinik agguataarineq Kommuneqarfik Sermersuumit erseqqinngitsutut isigineqarpoq. Pisortatut oqartussaaffeqarfittut aamma sullitatut kommunimit nakkutigineqarsinnaasariaqarpoq aningaasat nalingat eqqortoq akilerneqassasoq. Taamaattumik kommunimit kissaatigineqarpoq, agguataarineq erseqqissunik killeqarfilersorlugu erseqqissarneqaqqullugu, tassani aalajangersarneqarluni qaqugukkut napparsimasup uninnganeranut akigititat sorliit atuutissasut.
Pingaartumik nr. 1 aamma nr. 2 sinnerinut sanilliullugit immikkoortikkuminaapput. Assersuutigalugu paasiuminaappoq, qaqugukkut napparsimasup uninnganeranut ulloq unnuarlu aallartikkaangat 12.100 kr.-inik akiliuteqaqqusisoqartassanersoq (nr. 1) ulloq unnuarlu aallartikkaangat 3.200 kr.-inik (nr. 4) akiliuteqaqqusisoqartarnera pinnagu. Tassunga atasumik erseqqinngilaq qaqugukkut napparsimasoq nalinginnaasumik paaqqutarisarialittut (nr. 4) imaluunniit paaqqutariaqarnerusutut (nr. 5) taaneqartarnersoq. Tassunga atasumik Kommuneqarfik Sermersuumit siunnersuutigineqarpoq, napparsimasut paaqqutarineqarnerunissamik pisariaqartitsisut aamma
tarnimikkut napparsimasut immikkoortortaanni Nuummi uninngasut akornanni immikkoortinneqassasut Napparsimasut paaqqutarisariaqarnerusut (nr. 5) tassaappata tarnimikkut napparsimasut immikkoortortaanni uninngasut, siunnersuutigiumaneqarpoq, taakkua nr. 3-mi ilanngunneqaqqullugit, taava taanna imaaseqqullugu “Kalaallit Nunaanni aamma Danmarkimi tarnikkut nappaatilinnut immikkoortunut” atuuttut.
Kommuneqarfik Sermersuumit paasiuminaatsinneqarpoq, Nuummi Dronning Ingrid Napparsimmavissuani napparsimallutik uninngasunut akigititat aamma nunap immikkoortuini napparsimmavinni kiisalu peqqissaavinni napparsimallutik uninngasunut akigititat immikkooruteqarunnaarnerat. Oqaatigineqassaaq, immikkoortuni napparsimavinni aamma peqqissaavinni Nuup avataaniittuni uninngasunut akinut tunngasuni kaajallaasitatigut malunnartorsuarmik qaffariaateqartoqartoq.
§ 11-mut oqaaseqaatit
§ 11 § 1 imm.-imi oqaatsimi ”sundhedsvæsnet enheder” ”s” amigaataavoq.
§ 11, imm 2 pisortat ilanngunneqarnerat Kommuneqarfik Sermersuumit eqqumiigineqarpoq. Kommunimit pissutsit takorlooruminaatsinneqarput sullissinerit nalunaarsorneqartut pillugit kommune inniminniisutut aamma taamaattumik akiliuteqartussatut inissisimasinnaaneranut. Taamaattumik kissaatigineqarpoq itisilerneqaqqullugu sullissinerit pineqartut pisiarinissaannut sooq pisortatut oqartussaaffeqartut aamma suliffeqarfiit pisariaqartitsissanersut.