Kommuneqarfik Sermersuumi innuttaasutut Kalaallit Nunaata iluani avataanulluunniit angalanissamut angalanermut aningaasaateqarfimmut qinnuteqarnermi periarfissaqarputit.
Angalanermut aningaasaliiffigineqarnissamut qinnuteqarnermi piffissaliussaq tassaavoq 01.marts 2026 – 01.april 2026.
Angalanermut aningaasaateqarfimmut qinnuteqarsinnaanerlutit immikkoortumi uani “qinnuteqarnermi piumasaqaatit” imaluunniit qinnuteqarnermi immersugassamut ilitsersuummi quppernermi allerpaamiittumi atuaruk.
Siunertaq
Angalanissamut aningaasaateqarfimmi kommunimi innuttaasut killilimmik aningaasaatillit Kalaallit Nunaanni avataanulluunniit angalanissamut periarfissinneqarnissaat siunertarineqarpoq.
Qinnuteqaammi inoqutigiit tamarmik ilaaluunniit ilanngunneqarsinnaapput.
Qinnuteqarnermi piumasaqaatit tunniussinermilu tunngaviusut
Angalanermut aningaasaateqarfimmut toqqagaanissamut piumasaqaatit tulliuttut naammassineqarsimassapput:
- inersimasutut piginnaatitaassaatit,
- Kommuneqarfik Sermersuumi aalajangersimasumik najugaqassaatit,
- qinnuteqartup inoqutaasalu isertitanut killiliussaq ukua qaangersimassanngilaat: kisimiittuuguit maannakkut isertitavit 305.000 koruunit qaangersimassanngilaat imaluunniit inooqateqaruit illit inooqatillu maannakkut isertitarisassi katillugit 457.500 koruunit qaangersimassanngilaat. Meeqqat angerlarsimaffimmi najugaqartut aallaavigalugit isertitanut killiliussaq 30.000 kr-nik qaffanneqartassaaq.
- illit inooqatigisalluunniit aaqqissuussatigut allatigut ass. sulisitsisumit akiliunneqarlutik angalasinnaatitaanissamut periarfissaqassanngilasi,
- angalanerup siunertarisat tulliuttut naammassivai:
- Ilaquttat qaninnerusut akornanni ataatsimuulernissaq tamatuminngaluunniit attassiinnarnissaq
- Kalaallit Nunaanni kulturip assigiinngisitaarneranik paasisaqarnerulersitsissasoq
- Kulturimik allamik paasisassarsiorneq
Ilaqutariit meerartallit qinnuteqartunit tamanit salliunneqartassapput.
Qinnuteqartut piumasaqaatinik naammassinnittut arlaqarpata aningaasaateqarfimmi siulersuisut qinnuteqartut akornanni angalaqqammerneq aammalu siusinnerusukkut angalanermut aningaasaliissutinik tigusaqarsimaneq naapertorlugit pingaarnersiuissapput.
Imatut qinnuteqassaatit
Angalanermut aningaasaliiffigineqarnissamut qinnuteqarnermi immersugassaq atussavat. Qinnuteqarnermi immersugassaq innuttaasunik kiffartuussivimmi qaninnerpaami imaluunniit quppernerup naanerani nassaarisinnaavat.
Ilanngussassat tulliuttut qinnuteqarnermi immersukkamut ilanngunneqassapput:
- Qaammatit kingulliit pingasut akissarsiat allagartaat (qinnuteqartup qinnuteqartullu aappaa/inooqataa)
- Angalatitsivimmit billetsit akii pillugit paasissutissat
Qinnuteqarnermi immersugaq tassungalu ilanngussat innuttaasunut kiffartuussivimmut qaninnerpaamut tunniukkiartukkit imaluunniit mailikkut uunga nassiukkit: kommuneqarfik@sermersooq.gl