Ajagaq

Saarnginik, ujaqqanik qisunnillu qipiuisarfik.

Ajagaq sanaluttarfiuvoq kommunimit ingerlanneqartoq, najukkami eqqumiitsuliortut sanaluffigisinnaasaat suliaminnillu saqqummersitsiviat. Sanaluttarfik juulimi 2015 ammarneqarpoq, ukiullu pingasut qaangiuttut ulloq 22. juni 2018 atserneqarpoq. Sanaluttartut assigiinngitsut eqqumiitsuliaminnik suliaqarfigisinnaavaat, assersuutigalugu tupilannik qiperuillutik. Eqqumiitsuliortartut arlallit ukkusissanik tuttullu nassuinik suliaqartarput, allallu qisunnik allanillu kiinarpaliortarlutillu eqqumiitsuliortartut.

Kikkut tamarmik Ajakkami ininik atuisinnaatitaapput. Sanaluttarfimmiittalernissat soqutigigukku Ajakkami immersuiffissaq immersorsinnaavat.

Pulaarusuttut tikilluaqqusaajuaannarput, aamma sunngiffimmi atuartitsinermi peqataanissamut periarfissaqarpoq, tassanilu illit kalaallit sanaluttagaannik sanalunnermik ilinniarsinnaavutit.

Sunngiffimmi atuartitsineq

Sunngiffimmi atuartitsisoqartarpoq sapaatip-akunneranut marloriarluni, hold-ini peqataasut inuit sisamanit arfineq-pingasuugajullutik. Atuartitsinermi atuartitsisut marluk najuuttarput, taakkua ujaqqanik, nassunnik ukkusissamillu nioqqutissiornermik ilisimasatik ingerlateqqittarpaat. 

Sunngiffimmi atuartitsisarneq qaqugukkut, peqataanissamut nalunaarnissaq, akinillu paasisaqarfigerusukkukku Ajagaq orneriaannaavat paasisaqarnerullutillu.

Eqqumiitsuliat pisiarisinnaavatit
Ajagaq-mi nioqqutissiarineqartut tamangajammik tuniniagaapput, aammalu eqqumiitsuliortut ilarpassui inniminniisoqartillugu sanaassisarput. Ajagaq ornillugu ujaqqanik, saanernik qisummillu sanalugarpassuit takusakkit.

Ajagaq-mi eqqumiitsuliortutut sanalunneq
agguaqatigiisillugu sanaluttartut 20 missaaniittut inuussutissarsiutigalugu kalaallit sanaluttagaannik nioqqutissiortartut tassunga attaveqartuupput.

Atortorissaarutit atortarnerat qaammammut 200 koruuneqarpoq. Siumoortumik akiliisoqartassaaq, sanaluttarfik atulinnginneranilu isumaqatigiissut atsiorneqarluni.

Aammattaaq atuisut Covid-19 pillugu imminnut allanillu illersortussaatitaanermik pisussaaffik eqquutsinneqarnersoq nakkutilliisoqartarpoq.

Sanaluttarfiit

  • Ukkusissaleriffik 7-inut inissaqarpoq, taakku tamarmik pujoralammik milluaassummik katersivimmillu peqartiterput, aammalu pujoralaajaat pingaarneq, inatsisikkut isumannaallisaanermi piumasaqaatit naapertorlugit pigineqarluni.
  • Ujaqqanik sanaluttarfik ujaqqanik silisisunut 4-nik inissaqarpoq, silisinermi maskiinat, silisinermi pilattuut, ujaqqanut pilattuut, ujaqqanullu qillerut pigineqarlutik.
  • Nassunnik sanaluttarfik 9-nik inissaqarpoq, qilleruteqarpoq pilattuuteqarluni, assigiinngitsunillu pujoralammik milluaatitaqartunik.

Ajagaq-mi sananeqarsinnaasunut assersuut