Taasariaqartut allat

Inge Olsvig Brandt (IA): Ukiuni sisamani qinigaaffimmi nuannersumik aammalu ilinnarfiusimasumik suleqatigiissimanermut angusarpassuarnullu qujassuteqarpoq. Taamatuttaaq Suliffeqarnermut Isumaginninnermullu ataatsimiititami siulittaasutut politikkikkut suliniutit annertuut anguneqarsimaneranut Ingerlatsivimmut aammalu sulisunut qujassuteqarpoq.

Peter Davidsen (S): Paamiuni kalaaliaqqamut tunngasumut oqaaseqarpoq. Aningaasaqarnermut Inuussutissarsiornermullu ataatsimiitatap ukioq kingulleq angalareernerata kingorna januarimi Ataatsimiititap ataatsimiinnerani Kommuneqarfik Sermersuumi kalaaliaqqanut tunngatillugu atugassarititaasut assigiissaarneqarlutik nalimmassarneqarnissaannut kiissaatigisimasani qaqeqqippaa, kissaatigalugulu tamanna naammassineqassasoq. 

Taamatuttaaq Siumut-gruppi sinnerlugu tunuliaqutaasarsimasunut aammalu kommunalbestyrelsimi ataatsimiititanilu suleqatigiissimanernut qujassuteqarpoq. Siunnersuutit Siumumiit 250 sinnerlugit ingerlanneqartarsimasut oqaatigaa, naak annerpaatai itigartinneqartarsimagaluartut. Naggataagullu atorfilittanut qujassuteqarpoq, ersarissaasutigalugulu oqariartuutit sakkortulaartumik apuunneqartarsimagaluartut eqqortumik oqaatigineqartarnissaat pingaartittarsimallugu. 

Justus Hansen (D): Tamanut qujassuteqarpoq. Innuttasunit qinikkatut sulineq ummammik aallaaveqartariaqartoq oqaatigaa. Taamatuttaaq illuatugiliuttut sulilluarsimanerannut qujassuteqarpoq, oqaatigalugulu siornatigut suleqatigiinnerniit anisimalluni, kisiannili ersarissaassutigalugu uummat aallaavigalugu sulisimanertit tassuunartaatigut aamma takussutissaqarmat. Taamatuttaaq parteeqatiginikuusimasat nammineq aallarniisimanerat ataqqillugu oqaatigaa. Naggaataagullu inuusuttut siumut ingerlarusunnerat tulluussimaarutigalugu oqaatigaa. Kommunalbestyrelsimut taamatuttaaq Inatsisartunut qinersinissamut malinnaanissaminut qilanaarluni qinigassanngorteqatini qineqqusaarluanissaanik kissaallugit, ilaqutaasut aammalu kammalaataasut qinikkatut sulinermi aamma eqqorneqartartut qujassuteqarfigai.

Henrik Rachlev (IA): Ukiunut sisamanut ingerlareersunut qujassuteqarpoq. Kommuni suli nutaajusoq aqqanilinnillu utoqqaassuseqartoq ersarissaasutigalugu, suliassat suli ingerlannissaat oqaatigaa. Kommuunerujussuup suleqataaffigalugu pikkunarsinaasarsimasoq aammalu nuannersimasoq oqaatigaa, ataatsimiitanilu marluusuni suleqatigiilluarsimanermut qujassuteqarpoq. Taamatuttaaq Kangiani qinigaasimasunut aammalu tunuliaqutaasimasunut qujassuteqarluni. Naggataagut Paamiuni utoqqaat meeqqallu saaffiginnittarsimanerannut qujassuteqarpoq. Paamiunilu atuarfik suliarineqarlermat qujassuteqarluni. Qiningassanngorteqqittut qineqqusaarluarnissaannik kissaallugit, namminerlu qinigassanngorteqqinniarni aalajangersimanini nalunaarutigalugu, qinigaaffimmi nutaami isertussat sulilluarnissaannik kissaappai. Taamatuttaaq atorfilittat sulilluarnissaannik kissaappaai.

Thiooq Knudsen (S): Ukiuni sisamani suliat amerlaqisut, naak Siumumit siunnersuutigisarsimasat ingerlaqqissimanngitsut annertugaluartut, ingerlariaqqinnissaq suli periarfissaasoq oqaatigaa. Atorfillit tamarmik qujassuteqarfigai, taamatuttaaq Siumut gruppimi suleqatatigiilluarsimanermut, tamanullu suleqatigiilluarsimanermut qujassuteqarpoq. 

Michael Rosing (Att): Sinniisussatut Kommunalbestyrelsimi issianini nalunaarutigalugu aammalu naggammik issianini nalunarutigalugu, politikkikkut sulisimanermini ilikkarsimasani politikkikkut isumaqatigiinngikkaluarluni suli kammagiissinnaaneq pingaaruteqartoq oqaatigaa, tamannalu uani Kommunalbestyrelsimi misigisimallugu nalunaarutigaa. Qineqqusaartut qineqqusaarluarnissaannut kissaapai, taamatuttaaq inuppalaarnissaq eqqaamallugu sulinissamik kissaasilluni.

Charlotte Ludvigsen (IA): Suleqatigiilluarsimanermut qujavoq. Borgmesteritut qinigaaffiup qeqqani inissisimanermini politikkikkut siunnerfigisimasat aammalu 2030-p tungaanut anguniakkat siuttuuffigisimasani naammassineqarsimanerat, tamannalu partiit akimorlugit suleqatigiissinnaasimanermi pisimammat nuannaarutigalugu oqaatigaa. Taamatuttaaq qinikkat qineqqusaaqqinnianngitsut qujaffigalugit, najugarisamilu sulilluaqqinnissaannik kissaallugit, naak kommunalbestyrelsemi sunniteqarsinnaajunnaaraluartut. Qinigassanngorteqartinimut politikkikkut angusanut aamma qujassuteqarpoq, taamatuttaaq atorfilittat politikkikkut anguniakkanut ulluinnarni piviusunngortinneqarnissaannut sulilluarsimanerannut qujassuteqarluni. Naggataagullu tusarnaarianut najuuttunut aamma qujassuteqarpoq.