Malittarisassat, inatsisit pisussaaffiillu

Uani malittarisassat tamakkiisut aasinnaavatit atuarlugillu, tassani eqqagassalerinermut tunngasut malittarisassat inatsisit atuarsinnaavatit, pisussaaffiillu ilinnut atuuttut  paasisaqarfigalugit.

MALITTARISASSAT

INATSISIT

Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq

Eqqakkat pillugit Namminersorlutik Oqartussat nalunaarutaat nr. 3, 7. januar 2021-imeersoq

PISUSSAAFFIIT

Uani illit Kommuneqarfik Sermersuumi eqqakkanik pilersitsisartutut pisussaaffitit malittarisassallu eqqumaffigisassatit nassaarisinnaavatit.

Sammisat ataaniittut ilaat ataaseq toqqaruk, takuuk qanoq inunnut ataasiakkaanut inuussutissarsiuteqarfinnilu eqqakkanut tunngatillugu malittarisassat pisussaaffiillu assigiinngitsut iliuuseqarfigissanerlugit.

Siunertaq

Angerlarsimaffinnit eqqakkanik igitsiartornermi aaqqissuussinerit arlallit Kommunalbestyrelsimit aallartinneqarput.

Maleruagassami matumani Kommuneqarfik Sermersuumi inoqarfinni inuussutissarsiortut eqqagaannik katersinermut tunngatillugu aaqqissuussinerit innersuussisarnerillu aalajangersaaffigineqarput. Malittarisassani inuussutissarsiortut eqqagaannik pitsaasumik immikkoortiterineq, passussineq igitsinerlu qulakkeerneqassapput. Malittarisassani siunertarineqarpoq mingutsitsinaveersaarnissaq eqqiluisaanngitsumillu pissuseqarnissamik pinaveersaartitsinissaq, aammalu inuussutissarsiortut eqqagaannik atorluaanissamik siuarsaanissamut nukissanik atuinerup killilersimaarneqarnissaa.

Aqqissuussinerit maleruagassani matumani erseqqinnerusumik allaaserineqarput. Aaqqissuussinerit ilai katersuinermut tunngasuupput, allallu innersuussinerusarlutik ataasiakkaallu akuleriiuullutik.

Maleruagassat ima aaqqissorneqarput ingerlaavartumik Kommunalbestyrelse inuussutissarsiortut eqqagaannik immikkoortiterinissamut piumasaqaatinik annikitsunik iluarsiisinnaanngorlugu katersinermut innersuussisarnermullu aaqqissuussinernik pilersitsinikkut.

Inatsisit tunngavisat

Maleruaqqusat inatsisit atuuttut tunngavigalugit suliarineqarput:

1. Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq

2. Selvstyrets bekendtgørelse nr. 3 af 7. januar 2021 om affald

Atuuffia

Maleruaqqusat Kommuneqarfik Sermersuumi inoqarfinni tamani igitassanik pilersitsisartunut tamanut atuuppoq. Illoqarfiit pingaarnersaanni illoqarfinni nunaqarfinnilu pissutsit sullissinerullu assigiinnginneri pissutigalugit, maleruaqqusani assigiinngissutsit pingasut taakku immikkoortinneqarput. Kommune tamakkerlugu immikkoortuni makkunani malittarisassat assigiit atuutsinneqarput:

• Illoqarfiit pingaarnersaat (Nuuk)

• Illoqarfiit (Paamiut aamma Tasiilaq (aamma Ittoqqortoormiit))

• Nunaqarfiit (aamma Ittoqqortoormiit)

Ittoqqortoormiini angissutsit immikkullu atugassarititaasut pissutigalugit, illoqarfik ilaatigut nunaqarfinni malittarisassanut ilaatinneqartarpoq, taavalu pisuni allani illoqarfinnut malittarisassanut ilaatinneqartarluni. Aaqqissuussinerni ataasiakkaani Ittoqqortoormiit immikkoortumut aalajangersimasumut tunngatillugu eqqagassaqatigiiaat malittarisassanut sorlernut ilaatinneqarnersut allassimasassaaq.

Malittarisassiami inuussutissarsiortut eqqagaat Kommuneqarfik Sermersuumi tamarmeersut atuupput, immikkoortulli uku pinnagit:

1. Anartarfiit imaartakkat, taakku Anartarfiit imaartakkat aamma imermik errortuivikumik eqqaaneq pillugu Namminersorlutik Oqartussat nalunaarutaat nr. 10, 12. juni 2015-imeersoq naapertorlugu aammalu Kommuneqarfik Sermersuumi anartarfiit imaannik eqqaaneq pillugu maleruaqqusani malittarisassaqartinneqarput

2. Eqqakkat radioaktiviusut

3. Nakorsaatit, nakorsaatit sinnikui, peqqinnissaqarfiit eqqagaat ulorianaateqarsinnaasut, peqqinnissaqarfimmut tunniunneqartussat.

Kommunip iluani avataanilu misissuinermit aatsitassanillu piiaanermit eqqakkat immikkoortuni misissuinermit aatsitassanillu piiaanermit immikkut malittarisassani atuarneqarsinnaapput.

Atuisussaatitaaneq

Eqqakkanik pilersitsisartut tamarmik, qulaani nassuiaatigineqartoq naapertorlugu, maleruaqqusanut ukununnga ilaatinneqarput.

Eqqakkat maleruaqqusani allaaserineqanngitsut eqqarsaatigalugit, eqqakkanik pilersitsisartut ataasiakkaat Sermersuumi Eqqagassaleriffimmut kommunalbestyrelsimit piginnaatitaasumut saaffiginnissuteqassapput, taakkulu eqqakkat iginneqarnissaannut erseqqissumik innersuussuteqassallutik.

Taamatut pisoqartillugu eqqakkanik pilersuisut Sermersuumi Eqqagassaleriffiup innersuussutaanik malinnittussaatitaapput, eqqakkanillu suliarinninnissamut akisussaasuullutik, tamatumunnga ilanngullugu suuneri apeqqutaatillugit immikkoortiterisinnaaneq. Eqqakkanik pilersitsisup igitsinermi imaluunniit allatut suliarinninnermini aningaasartuutinik akiliisussaatitaaneq aamma pisussaaffigaa.

Eqqakkanik pilersuisup akisussaaffia atorunnaassaaq, eqqakkat tigooraavimmut, eqqakkanik katersisartumut, eqqakkanik passussisartumut akuerisamut tunniunneqareerpata.

Eqqagassanik pilersitsisartoq eqqagassanik pilersitsippat, annertussutsit imaluunniit suussusii pissutigalugit, kommunip tigooraaviini suliarinerani ajornartorsiuteqartitsippata imaluunniit kommunip sulisuinut avatangiisinut ajornartorsiortitsippata, Sermersuumi Eqqagassaleriffik pisussaatitaavoq suujunnaarsitsinissamut aamma/imaluunniit suliareqqiinissamut immikkut ittunik piumasaqaateqarnissamut, assersuutigalugu naqinneqarnissaannut, poortuutissanut tunngasunut assigisaannulluunniit tunngasut eqqarsaatigalugit. Eqqagassanik pilersitsisartut eqqakkat suliarinissaannut akisussaapput, tamatumunnga ilanngullugu immikkoortiterineq, katersinermilu aningaasartuutinut, igitsinermut allatullu suliarinninnermut.

Eqqakkat nunaannarmi pilersinneqartut kommunip inoqarfiisa ilaannut ingerlanneqassapput, umiarsualivimmilu tigooraavinnut ilineqassallutik, imm. naapertorlugu umiarsualivinni tigooraaviit, kommunip eqqagassaleriviinut imaluunniit eqqakkanik pilersitsisup nammineq inigisaata eqqaanut. Eqqakkat suliarineqassapput maleruagassani matumani aaqqissuussinerit pillugit allaaserisat naapertorlugit.

Eqqakkanik silami ikuallaaneq inerteqqutaavoq.

Eqqakkanik kommunip tigooraaviani tigusinermi, eqqakkanik tunniussisoq tamatigut ingerlatsinermut sulisumut saaffiginnittassaaq, eqqakkat immikkoortiterneqarnissaat eqqarsaatigalugu. Ingerlatsinermut sulisoq innersuussissaaq, eqqakkat sumut niuneqassanersut. Eqqakkanik tunniussisup ingerlatsinermut sulisup innersuussutai malittarisussaavai.

Najugaqarfiit ataatsimoortumik eqqaaveqarnerat

Sanarfinermut Avatangiisinullu Ingerlatsiviup oqaloqatigereerneratigut tassungalu atugassamik nunaminertamik atugassinneqarnissamik qinnuteqaateqareernikkut, najugaqarfinnut arlalinnut inissianullu eqqakkanut inaalitsivinnik katersivinnillu ataatsimoorussassanik pilersitsisoqarsinnaavoq. Assersuutigalugu tassaasinnaapput eqqagassanik katersiviit affalds-øer, eqqagassanik angisuunik katersiviit miljøhuse imaluunniit containerit ataatsimoorussat, eqqagassanik pilersitsisartut ataasiakkaat igitassaatiminnik tunniussiffigisartagassaat.

Najugaqarfinnit kommunip tigooraaviinut eqqakkanik ataatsimoortumik igitsinissamut atatillugu, eqqakkanik immikkoortiterineq illunik piginnittunit akisussaaffigineqassaaq.

Immikkoortiterisussaatitaaneq

Kommunalbestyrelsip aalajangersassavaa immikkoortut sorliit katersuinermut innersuussinermullu aaqqissuussinermut ilaatinneqassanersut. Eqqakkanik pilersitsisartoq eqqakkanik immikkoortiterisussaatitaavoq, aaqqissuussinerni ataasiakkaani allassimasut naapertorlugit. Eqqakkat eqqortumik immikkoortiterneqarsimanngippata, akit allattorsimaffiat atuuttoq naapertorlugu kukkusumik immikkoortiterinermi akiliuteqartitsisoqassaaq. Eqqakkat immikkoortunut sorlernut iginneqassanersut nalornissutigineqarpat, suliamut tunngatillugu Sermersuumi Eqqagassalerivik Kommunalbestyrelsimit piginnaatinneqartoq aalajangiisuussaaq.

Eqqakkat immikkoortut, maleruagassani ilaatinneqanngitsut, imaluunnit inatsimmik malittarisassanilluunniit allanik malittarisassaqartinneqanngitsut, imm. 5.1-imi Immikkoortiterisussaatitaaneq pillugu allaaserisami taaneqartutuut, suussusersineqarnissaat ersarissumillu innersuunneqarnissaat eqqarsaatigalugit Sermersuumi Eqqagassaleriffimmut nalunaarutigineqassapput. Sermersuumi Eqqagassaleriffiup Kommunalbestyrelsimit piginnaatitaanini tunngavigalugu aalajangissavaa, eqqakkat qanoq suliarineqassanersut iginneqassanersullu.

Eqqakkat ulorianaatillit pineqarpata, Namminersornerullutik Oqartussat uuliamik kemikalienillu igitsisarneq pillugu nalunaarutaannut ilaatinneqanngitsut, aammalu nalunaarummi ilanngussaq 1-imi 2-milu taaneqartunut sanilliunneqarsinnaasut pillugit, suliap aalajangiiffigineqarnissaa anguniarlugu Sermersuumi Eqqagassaleriffiup Kommunalbestyrelsimit piginnaatitaaneq tunngavigalugu Avatangiisinut Pinngortitamullu Naalakkersuisoqarfik aalajangiinissaanut attavigissavaa.

Nalunaarsuisussaatitaaneq

INUUSSUTISSARSIUTEQARTUNUT IMMIKKUT

Eqqakkanik tunniussinermi eqqakkat tamarmik nalunaarsorneqassapput.

Inuussutissarsiuteqartut tamarmik eqqakkanik pilersitsisartut kommunip eqqakkanut nalunaarsortitsisarfianut nalunaarsortinnissaminnut pisussaaffeqarput, illoqarfimmilu uuttortaasitsisarneq atorneqarpat eqqagassaleriffimmut korti atorneqassaaq.

Illoqarfinni uuttortaatitsisarfiit atorneqanngippata ingerlatsinermi sulisut attavigineqassapput, taakkulu eqqagassat tunniunneqartut nalunaarsorneqarnissaat akiligassiissutigineqarnissaat eqqarsaatigalugu isumagissavaat.

Illoqarfiit pingaarnersaat

Nuummi inuussutissarsiuteqartut eqqakkanik pilersitsisartut pisussaapput kommunip eqqakkanut nalunaarsuisarfianut nalunaartussaallutik aammalu kommunip eqqaaveqarfiinut eqqakkanik igitsinerminnut atatillugu eqqagassaleriffimmut kortimik atuissallutik. Eqqagassaleriffimmut korti Sermersuumi Eqqagassaleriffimmut saaffiginninnikkut tunniunneqassaaq.

Eqqagassaleriffimmut kortinik tammaasaqarnermi aseruinermilu akit allattorsimaffiat naapertorlugu akiliuteqarnikkut nutaamik tunniussisoqarsinnaavoq, akit allattorsimaffiat atuuttoq takuuk.

Akiliisussaatitaaneq

Eqqakkanik pilersitsisartut kommunip akinut allattorsimaffia naapertorlugu akiliutissamik akiliisussaatitaapput.

Illumik piginnittup eqqakkanik aallertarnermut nalunaarnissaq atorunnaarsitsinissarlu akisussaffigivai, tamannalu Sermersuup Eqqagassaleriffianut pissaaq.

Eqqagassanik pilersitsisut illoqarfiit pingaarnersaanni illoqarfinnilu kommunip eqqaavilerinermi aaqqissuussineranut peqataanerminni akiliuteqartinneqartarput. Nuummili eqqagalerisunut namminersortunut eqqakkat aaneqartarnissaat nalunaarutigineqarsinnaavoq, nalunaarfigineqartussaq assartuisinnaarnermut akuerisaasimassaaq.

Nunaqarfinni aamma Ittoqqortoormiini eqqagassanik pilersitsisut eqqagassanik aallernerit marluk angullugit (aammma annartarfiit/slamtankit imaarneqarnerinut) tunngaviusumik akiliutigitinneqartartumik sapaatip akunneranut akiliisinneqartassapput.

Eqqagassanik pilersitsisut eqqakkanik/eqqakkanut assingusunik aallertarnermut akiliutigitinneqartartumik akiliisussaatitaapput imaluunniit tunngaviusumik akiliutigitinneqartartumik, tassanni illoqutigiit/suliffeqarfiup illuutigisap najugaa inuit allattorsimaffiannut nalunaarutigineqarsimappat aamma Sermersuumi Eqqagassaleriffik atorunnaarsitsinermik nalunaarfigineqarsimanngippat.

Tamatumani eqqakkanik aallertarnermut akiliisitsisoqartarpoq aamma kvartalikkaartumik tunngaviusumik akiliutigitinneqartartumik.

Taamaattorli ullormi aaqqissuussamut nalunaarutigineqarneraniit akiliut akilerneqaqqaassaaq, soorlu aamma taamaatitsilluni ullormi nalunaarutigineqarfiata tungaannaanut akilersorneqartussaasoq.

PINGAARTUMIK ANGERLARSIMAFFINNEERSUT

Namminersortut eqqagassanik pilersitsisut tunngaviusumik akiliutaaniippoq igitat allat peerneqartarnerat. Tunniussisarneq, eqqakkanut aaqqissuussinerit ataasiakkaat, qanoq pisarnerini takuuk

Eqqakkat angerlarsimaffinnit pilersinneqartut tamarmik 50 kg tikillugit kommunip atoqqitassaasiviinut eqqagassaleriffiutaanullu akeqanngitsumik tunniussisinnaaneq eqqakkanut immikkoortunut tamanut atuuppoq. Igitassat tamatigut 50 kg sinnertarpassuk, illoqarfiit pingaarnersaanni illoqarfinnilu akit allattorsimaffianni akigitinneqartut naapertorlugit akiliuteqartinneqassapput. Nuna mingutsinneqarsimasoq nuna mingutsinneqarsimasoq pillugu malittarisassat malillugit suliarineqartassaaq tassanilu akiliuteqartitsisoqartarpoq aamma namminersortut eqqagassanik pilersitsisut nunamik mingutsinneqarsimasumik tunniussineranni.

Eqqagassanik pilersitsisut, igitassanik ulorianaatilinnik, elektronikkinik aammalu nillataartitsivinnik/qerititsivinnik angerlarsimaffinnit suliffeqarfiup biilianik igitsiartortut, inuussutissarsiutilittut immikkoortinneqassapput, taamaasillutillu akit allattorsimaffiat atuuttoq naapertorlugu akiliuteqartinneqassallutik, eqqagassanik pilersitsisup ingerlatsinermut nakkutilliisumut angerlarsimaffimmit igitassaanera uppernarsarsinnaaguniuk taamaattoqassanngilaq. Tamanna ingerlatsinermut nakkutilliisup eqqagassat suuneri amerlassusiilu tunngavigalugit ilaatigut nalilersussavai.

PINGAARTUMIK INUUSSUTISSARSIUTEQARTUNUT

Inuussutissarsiuteqarlutik ingerlatsisut, eqqagassanik pilersitsisut, eqqakkanut assingusunik kommunip eqqakkanik katersuisarfia aqqutigalugu tunniussinissaminnut pisussaatinneqanngillat, taarsiullugu eqqakkanik assartuisartut namminersortut akuerisaasut atorneqarneqarnissaat toqqarsinnaavaat. Inuussutissarsiuteqarlutik ingerlatsisut pisussaapput eqqakkanut assingusut aaneqartarnissaat pillugu isumaqatigiissusiornissaminnut eqqagassanillu pilersitsisoq kommunalbestyrelsip piumasaqarneratigut uppernarsarsinnaasariaqarpaa eqqagaatimik matumani malittarisassani maleruaqquneqartut malillugit iginneqarsimaneri.

Eqqakkanut assigiinngitsunut tamanut atuuppoq illoqarfiit pingaarnersaanni illoqarfinnilu inuussutissarsiuteqarlutik ingerlatsisut akit allattorsimaffiat malillugu akiliuteqartarnissaat.

Illoqarfimmi imalunniit nunaqarfinni illuaqqat akiliisussaatitaanerat

Eqqagassanik pilersitsisut tamarmik illuaraatillit akiliummik akiliisussaatitaapput.

Eqqagassanik pilersitsut, aamma illoqutigiit/suliffeqarfik illuaqqamik piginnittut nalunaarsorneqarsimappat, taakku tunngaviusumik akiliummik akiliisussaatitaapput tamanna Sermersuup Eqqagassaleriffianut atorunnaarsillugu nalunaaruteqarsimanngikkunik.

Piginnittoq eqqakkanik aallertarnermut nalunaarnissaminut aamma atorunnaarsitsinisaminut akisussaasuuvoq. Nalunaartussaatitaanerup ataani takukkit.

Eqqagassanik pilersitsisut, nunaqarfinni illuaraatillit, tunngaviusumik akiliutigitittakkap 50%-ianik ukiumut akiliuteqartinneqartarput. Tassa imaappoq, kvartalit marluk tunngaviusumik akigitinneqartut tamakkiisumik akileqquneqassapput, illuaqqap piffissami imaluunniit ukiup sinnerani qanoq atorneqartiginera apeqqutaatinnagu.

Akiliut ulloq eqqagassat pillugit aaqqissuussinermut ilanngunnermiit atorunnaarsitsinissap tungaanut akilerneqartassaaq.

Eqqagassat allat aamma anartarfiit matumani malittarisassat innersuunneqartut malillugit peerneqartassapput.

Ilisimatitsisussaatitaaneq

Sermersuumi Eqqagassaleriffik kommunalbestyrelsimit piginnaatitaaneq tunngavigalugu eqqakkanik pilersitsisartunit, maleruagassani matumani malittarisassat naapertorlugit eqqakkanik igitsisarnerinut piumasaqaateqarnikkut akiliuteqartitsinnaavoq.

Eqqakkanik katersisartut eqqakkanillu assartuisartut namminersortut eqqakkanik pilersitsisartut kikkut igitsissuttarneraat pillugu, tassunga ilanngullugu igitsinerit qanoq akulikitsiginerinik, eqqakkat qanoq amerlatiginerinik suunerinillu Sermersuumi Eqqagassaleriffik kommunalbestyrelsip pisinnaatitsissuteqarnera naapertorlugu paasissutissanik piumasaqarsinnaatitaavoq.

Eqqakkat katitigaaneri pillugit eqqakkanik pilersitsisartup paasissutissanik tamanik tunniussinissaanik Sermersuumi Eqqagassaleriffiup kommunalbestyrelsip pisinnaatitsissuteqarnera naapertorlugu piumasaqarsinnaatitaavoq, aammalu eqqakkanik passussinermi igitsinermilu avatangiisinut sunniutissai pillugit eqqakkanik pilersitsisartoq misissuinissaanik peqqussallugu.

Illoqarfiit pingaarnersaat

Eqqagassanik nalinginnaasunik/eqqagassanik nalinginnaasunut assingusunut katersisartoq kommunip toqqagaanit alla atorneqarpat, nalunaarnermi uppernarsaat piumasaqaatigineqarpat Sermersuumi Eqqagassaleriffimmut tunniunneqassaaq.

INUUSSUTISSARSIUTEQARTUNUT IMMIKKUT

Eqqagassanik pilersitsisartut tamarmik piumaffigineqarunik Sermersuumi Eqqagassaleriffimmut eqqakkat katersat qanoq annertutiginerisa missiliuusiornerat aammalu eqqakkat qanoq katitigaanerat kiisalu qanoq igitsiartortarnertik pillugu nalunaarutigissavaat. Tamanna tunngavigalugu Sermersuumi Eqqagassaleriffik igitsinissamut periarfissat suunerinik suullu piumasaqaataanerinik innersuussissaaq.

Nunaqarfinnut tunngatillugu immikkoortut amerlasuut illoqarfimmut qaninnermut assartorneqassapput. Taamatut pisoqartillugu eqqagassanik pilersitsisartut eqqakkamik suujunnaarsinnissaannut innersuunneqartumut assartuinissaq namminneq akisussaaffigissavaat tamatumunngalu tunngatillugu aningaasartuutit tamaasa akilerlugit. Taamaattumik eqqakkanik pilersitsisartut akisussaaffigaa assartuisartup najoqqutassiai naapertorlugit assartuineq ingerlanneqassasoq. Eqqakkanik pilersitsisartoq aamma pisussaaffeqarpoq eqqakkanik tigusisussamut nassiussinerit tamarluinnaasa siuningaaniit ilimasaarutigissallugit. Maleruaqqusani matumani aaqqissuussinerit ataasiakkaat iluini immikkut ittut ilaanni immikkoortuni sorlerni tamanna atuunnersoq takuuk.

Eqqakkat katitigaaneri, annertussusaat imaluunniit suuneri annertuumik allannguuteqarsimappata, eqqakkanik pilersitsisartup erniinnaarluni Sermersuumi Eqqagassaleriffik nalunaarfigissavaa.

Nalinginnaasumik eqqakkanut aaqqissuussinermut peqataaniarluni nalunaartussaatitaaneq

Eqqakkanik pilersitsisartut tamarmik nalinginnaasumik eqqagassanik pilersitsisartut imaluunniit nalinginnaasumik eqqagassanut assigusunik pilersitsisartut maleruaqqusat uku naapertorlugit aaqqissuussinermut peqataaniarluni nalunaartussaatitaapput.

PINGAARTUMIK ANGERLARSIMAFFINNEERSUT

Angerlarsimaffiit eqqagassanik pilersitsisartut ikinnerpaamik sapaatip akunneranut ataasiarluni eqqagassanik nalinginnaasunik aallertoqartarnissaanik nalunaartussaatitaapput. Eqqakkanik nalinginnaasunik immaqalu anartarfiit imaannik aallertoqartarnissaanik nalunaartussatitaaneq atuuppoq illoqatigiit inuit allattorsimaffiannut illup sumiiffianut nalunaarsorsimappata aammalu Sermersuumi Eqqagassaleriffimmut aallertoqartarnerup unitsinnissaanik nalunaartoqarsimanngippat.

Illumik piginnittup pisussaaffigivaa illup sumiiffia nalinginnaasumik eqqakkanik allertoqartarnissaanik nalunaarsorsimanissaa (immaqalu anartarfiit imaannik).

Nalunaarneq taamaatitsinerlu kommunimi inoqarfinni tamani Sullissivik.gl aqqutigalugu NemID atorlugu qarasaasiakkut nalunaarutigineqartassapput.

Taamaattorli ullormi aaqqissuussamut nalunaarutigineqarneraniit akiliut akilerneqaqqaassaaq, soorlu aamma taamaatitsilluni ullormi nalunaarutigineqarfiata tungaannaanut akilersorneqartussaasoq.

Illoqarfiit pingaarnersaat

Illoqarfiit pingaarnersaanni nalunaarnermi aamma Sermersuumi Eqqagassaleriffimmut nalunaarnermi taamaatitsinermi immersugassaq atorlugu uunga nassiussisoqarsinnaavoq affald@sermersooq.gl.

Aamma Innuttaasunik kiffartuussivimmut saaffiginnilluni nalunaartoqarsinnaavoq.

Illoqarfimmi nunaqarfinnilu

Illoqarfinni nunaqarfinnilu nalunaartoqarsinnaavoq immersuinikkut aammalu Sermersuumi Eqqagassaleriffimmut uunga mailikkut nalunaarluni taamaatitsilluniluunniit affald@sermersooq.gl.

Aamma illoqarfinni Innuttaasunik kiffartuussivinnut nunaqarfinnilu ataasiakkaani kommunip allaffiinut saaffiginnilluni nalunaartoqarsinnaavoq.

Angerlarsimaffinni eqqakkanik pilersitsisartut, nunaqarfinni illuaraatillit, nalinginnaasumik eqqakkanik allertoqartarnissaanik nalunaarnissaminnik pisussaaffeqarput. Illumik piginnittup eqqakkanik aallertarnermut nalunaarnissaq atorunnaarsitsinissarlu akisussaffigivai, malittarisassat qulaani taaneqartut naapertorlugit. Illuaqqat pillugit imm. A, imm. 5.6 annertunerusumik paasisaqarfigiuk – Akiliuteqartussaatitaaneq: Illuaqqat.

INUUSSUTISSARSIUTEQARTUNUT IMMIKKUT

Eqqakkanik pilersitsisartut inuussutissarsiuteqartuneersut nalinginnaasumik eqqakkatut ittut assigalugit imatut igitsiartortarsinnaapput:

• Nalinginnaasumik eqqakkatut ittut eqqaavimut katersorneqarpata igikkiartorneqassappata kommunip eqqakkanik katersisarnermut aaqqissuussineranut nalunaartoqarsinnaavoq. Nalunaarnermi periutsit Angerlarsimaffinnut immikkut imm. A, imm 5.8-mi takukkit.

• Nalinginnaasumik eqqakkanut assingusut eqqaavilerisunut namminersortunut akuerisaasunullu amma igitsikkiartorneqarsinnaapput.

Aaqqiissutit kingulliit toqqarneqarpata Sermersuumi Eqqagassaleriffik piumasaqaateqarpat eqqaavilerisumit namminersortumit aallertoqartarnissaa pillugu imaluunniit eqqakkanik tigooraavimmit uppernarsaammik takutitsisoqassaaq imm. A, imm. 5.5 – Akiliuteqartussaatitaaneq naapertorlugu.

Nalunaarutiginnittussaatitaaneq

Eqqakkanik pilersitsisartut tamarmik pissutsit, ataani eqqagassat suunnerinik ilallit imaluunniit avatangiisinik mingutsitsinermut tunngasut pillugit nalunaarutiginnittussaatitaapput. Eqqakkat allat suusinnaaneri pillugit nalunaarutigineqartussaapput. Tamanna aaqqissuussinerit ataasiakkaat pillugit imm. B-mi allaaserineqarput. Sermersuumi Eqqagassaleriffik nalunaarfigineqassaaq.

Sanaartornermit eqqagassat

Illuliornermit eqqagassat, nutaamik illuliornermut, allanngortitsinermut nutarterinermut isaterinermullu tunngasut Sermersuumi Eqqagassaleriffimmut nalunaarutigineqassapput eqqakkat amerlassusii sapaatip akunneranut 50 m3 qaangerpagu. Aammattaaq, suliami ataatsimi sanaartorneq tamakkerlugu, qanorluunniit sapaatip akunneranut eqqakkat pilersinneqartut amerlatigigaluarpata, eqqakkat ataatsimut katillugit 100 m3 qaangerpatigit nalunaarutigineqassapput.

Sermersuumi Eqqagassalerivik nalunaarutigineqartussaq qanoq allanneqassanersoq pillugu annertunerusumik paasisaqarniaruit oqarasuaatip normuanut uunga sianerfigiuk 36 74 11 imaluunniit uunga allaffigiuk affald@sermersooq.gl.

Nuna mingutsissimasoq

Nuna mingutsinneqarsimasoq pillugu Sermersuumi Eqqagassaleriffimmut nalunaarutigineqassaaq, qanoq iliorluni iginneqarnissaanut innersuussisoqarniassammat. Nunamik mingutsitsisoqarsimaneranik pasitsaassineq aamma nalunaarutigineqassaaq. Assersuutigalugu imatut pisoqarsimatillugu:

• Nunamik mingutsinneqarsimasumik assaaffiusumit nuussinermi.

• Nunaminertamit pasitsaassiffigineqartumik nunamik assaaffigisimasumit nuussinermi.

• Nunaminertamit assaaffiusimasumit nunamik nuussinermi, suliffeqarfimmut Kap 5-imut attuumassuteqartumik.

• Nunaminertamit nunamik assaaffigineqarsimasumit nuussineq, misilittakkat naapertorlugit navianaateqarsinnaasumik (tamanna pillugu Eqqagassalerivik attavigiuk siunnersorneqarnissaq eqqarsaatigalugu).

• Nunaminertamit assaaffigineqarsimasumit nunamik nuussineq, aqqusinertut atorneqartumik.

• Tassanngaannartumik mingutsitsinerit, imaluunniit mingutsitsisoqartoq paasineqarpat, nunamik assaasoqartariaqalerluni nuussisariaqalerlunilu, assersuutigalugu useraasoqarsimappat, nunaminertamik atuinissamut ulorianartorsiortitsisumik, illup iluata silaannaa il. il. taamaattumillu sukkasuumik iliuuseqartoqartariaqarluni.

Sermersuumi Eqqagassalerivik nalunaarutigineqartussaq qanoq allanneqassanersoq pillugu annertunerusumik paasisaqarniaruit oqarasuaatip normuanut uunga sianerfigiuk 36 74 11 imaluunniit uunga allaffigiuk affald@sermersooq.gl.

Nuna mingutsinneqartoq igitsinissamut periusissamik Sermersuumi Eqqagassalerivik innersuussitinnagu iginneqassanngilaq.

Inoqarfinni tamani nunamik mingutsinneqarsimasumik klasse 2-4-mik tunniussinermi, akit allattorsimaffiat atuuttoq naapertorlugu akiliuteqartitsisoqassaaq.

Nuna minguitsoq, klasse 1, inoqarfinni tamani akeqanngitsumik kommunip tigooraaviinut tunniunneqassaaq.

Tassanngaannartumik avatangiisinik mingutitsisoqarpat Sermersuumi Eqqagassalerivik nalunaaruteqarfigineqassaaq oqarasuaatip normuanut uunga sianerluni 36 74 11 imaluunniit uunga allaffigalugu affald@sermersooq.gl

INUUSSUTISSARSIUTEQARTUNUT IMMIKKUT

Eqqakkanik pilersitsisartut, eqqakkanik ulorianartunik pilersitsisartut, tamanna kommunalbestyrelsimut nalunaarutigissavaat. Nalunaaruteqarnermi eqqakkat suuneri, poortuutit suuneri aammalu ukiumut amerlassutsit nalunaarutigineqassapput, ukiullu nikinnerani kommunalbestyrelsimut tunniunneqassallutik.

Kommunip avataani eqqakkanik ulorianartunik eqqussineq, kingusinnerpaamik eqqussinissaq sapaatip akunneri arfineq pingasut qaangiuppata nalunaarutigineqassaaq. Nalunaaruteqarnermi eqqakkat suut, poortuutit suut ukiumullu amerlassutsit naatsorsuutigisamik qassiuneri nalunaarutigineqassapput. Tamanna pereerpat Sermersuumi Eqqagassalerivik igitsinissamut periarfissamik innersuussissaaq.

Sermersuumi Eqqagassalerivik nalunaarutigineqartussaq qanoq allanneqassanersoq pillugu annertunerusumik paasisaqarniaruit oqarasuaatip normuanut uunga sianerfigiuk 36 74 11 imaluunniit uunga allaffigiuk affald@sermersooq.gl

Eqqakkat toqqortarineqartarnerat

Illumik piginnittup qulakkiissavaa, tamatigut najukkami anartarfiit imaannik igitsinissamut naammattumik puussiaqanissaq imaluunniit anartarfiit imaannik assingusunik igitassaqarnersoq taakkualu sapinngisamik akulikitsumik imaarneqartarnissaat. Illumik piginnittup akisussaaffigaa, uninngatitsiviit imaarsinerit marluk akunneriissillugit ulikkaarneqassanngitsut.

Eqqakkanik uninngatitsinermi akulerussuinissaq pitsaassutsimillu ajornerulersitsinnginissaq, kingusinnerusukkullu suliarinissaanut ajornarnerulersitsisoqannginnissaa, eqqakkanik pilersitsisup qulakkiissallugu pisussaaffigaa.

Eqqakkat illersorneqarsinnaasumik uninngatinneqassapput, taamaasilluni mingutsitsineq eqqiluisaannginnerlu pinaveersaartinneqassammata. Eqqakkanik pilersitsisartup taamaasilluni qulakkiissavaa eqqakkat anorimit tingitaannginnissaat, aammalu uninngatitsiviit uumasunit akornutaasinnaasunit, qimminit tulukkanillu ussagarneqarsinnaanerat minnerpaaffianiitissallugu.

Eqqakkanik pilersitsisartup uninngatitsiviit akuttunngitsumik eqqiartartussaavai, taamaasilluni eqqakkat kingusinnerusukkut assartorneqarneranni tipiliorfiussanngimmat.

Eqqakkanik ulorianartunik uninngatitsinerup nalaani mingutsitsisoqalissagaluarpat, tamanna erngerlugu Sermersuumi Eqqagassalerivimmut nalunaarutigineqassaaq. Takuuk imm. A, imm. 5.9 – Nalunaaruteqartussaatitaaneq.

Eqqakkat uninngatinneqartut mingutsitsinissamut, eqqiluisaannginnermut allatulluunniit serlersaarinissamut pissutissaqartinneqarpata, ingerlaannartumik suujunnaarsinneqarnissaat pillugu Sermersuumi Eqqagassaleriffiup kommunalbestyrelsimit piginnaatitissut naapertorlugu aalajangersinnaavaa.

Kommunalbestyrelsip aalajangissavaa, suut eqqakkatut isigineqassanersut Avatangiisit illersorneqarnissaat pillugu Inatsisartut inatsisaat nr. 9, 22. novembari 2011-meersumi § 36 naapertorlugu.

INUUSSUTISSARSIUTEQARTUNUT IMMIKKUT

Illumik piginnittup qulakkiissavaa, suliffeqarfiup eqqagassat pilersitai immikkoortut tamaasa katersuiveqartinneqarnissaat.

Eqqagaasivinnut piumasaqaatit

Illoqatigiit ataasiakkaat eqqagaat inissiat ataasiakkaat eqqannguanni eqqagassaasivinnut inaalinneqartassapput, atuisunut eqqaavilerisunullu ukioq kaajallallugu ajornanngitsumik tikinneqarsinnaallutillu appakaaffigineqarsinnaasuni.

Kommunalbestyrelsip piumasarisinnaavaa eqqagaasiviit aqquserngup eqqaanut inissinneqassasut, aammalu aqqusinermit aqquteeqqamilluunniit inissisimanerata ungasinnerpaaffissaa aalajangersarsinnaallugu. Imm. B, imm. 9 takuuk – Eqqagassat nalinginnaasut.

Eqqagaasiviit imatut ilusilersugaassapput imalu pitsaatigissallutik, allaat imarisaat uumasunit akornutaasinnaasunit, qimminit tulukkanillu ussanneqarsinnaanatik.

Kommunalbestyrelsip eqqagaasivimmik ataatsimik arlalinnilluunniit aalajangersimasunik atuisoqarnissaa peqqussutigisinnaavaa. Puussianut eqqagaasiviit atorneqarnissaat peqqussutigineqarpat, puussiarsuit/puussiat kommunimit tunniussat akuerisat kisimik atorneqarsinnaassapput. Eqqaaviit pisariaqartinneqartut amerlassusaannik illumik piginnittoq pisussaatitaallunilu aserfallatsaaliisussaatitaavoq.

Saligaatsuutitsineq

Eqqagassanik sunilluunniit sumiiffinnut inuit nammineq pigisaannut imaluunniit kikkulluunniit tikittagaannut igitsisoqassanngilaq.

Illuutillit illumik eqqaaniit avammut 25 meterit iluanni imaluunniit sanilerisamut ungasissusiata affaanut ungasissusillup iluani akuttunngitsumik saliisarnissaminnut pisussaapput. Illut pinnguartarfittaqarpata assigisaannilluunniit sanaartorfiusimappata taakku salinneqartarnissaat aamma piginnittup pisussaaffigaa.

Kommunalbestyrelsip illumik piginnittoq eqqakkanik illumit iginneqartunik peerseqqusinnaavaa.

INUUSSUTISSARSIUTEQARTUNUT IMMIKKUT

Umiarsualivinnut oqartussat umiarsualiviup saligaatsuutinnissaa akisussaaffigaat.

Suliffeqarfiutillit namminersortut tamarmik namminneq illuutimik eqqaat nunaminertallu atugassiissutigineqartut saligaatsuutittussaavaat.

Pisiniarfiit, kioskit assigisaannilu imeruersaatinik nerisassanillu tuniniaaffiusuni, eqqagassanik pilersitsisup pisussaaffigaa eqqaavinnut uninngatitsivinnik inissiinissani pisariaqartitsineq naapertorlugu imaartagassanik, matusinermullu atatillugu pisiniarfimmi pisiani pisiniarfiup eqqaanut igitaqartoqarsimappat saliinissaq. Nunaminertat eqqaaniittut illoqarfimmut sammisuupput pisiniarfimmullu appakaaffissamut tunngasuupput.

Eqqagassanik assartuineq

Eqqakkanik uninngatitsineq angallassinerlu peqqissutsimut avatangiisinullu illersorneqarsinnaasumik, maleruagassanilu matumani malittarisassat naapertorlugit pissaaq.

Eqqakkat eqqagaasivinnut ikillugit biilinik assartorneqassapput, eqqakkat tinginnaveerlugit, eqqakkallu katersornerini angallannerinilu imerpalasut aqqusinermut kusersinnaajunnaarlugit. Angallassinermi eqqakkat siammaannariaanngitsut imerpalasulluunniit mingutsitsissagaluarpata, eqqakkanik angallassisoq ingerlaannaq katersisussaallunilu aamma/imaluunniit saliisussaatitaavoq, aammalu mingutsitsineq pillugu Sermersuumi Eqqagassalerivimmut nalunaaruteqartussaatitaavoq.

Nalunaarfissaq tassaavoq Sermersuumi Eqqagassalerivik oqaras. 36 74 11 imlt. affald@sermersooq.gl.

INUUSSUTISSARSIUTEQARTUNUT IMMIKKUT

Pingaartumik nerisassanik neqilerisut sinnikuinik, eqqakkanik eqqakkanullu assingusunik angallassinermi angallassisup/katersisartup qulakkiissavaa, eqqakkanik naqitsinermi biilimit imerpalasumik kusertoqannginnissaa.

Katersuisarnerit

Katersinermi aaqqissuussineq maleruagassani aalajangersakkatut aaqqissuussineruvoq, tamatumani eqqagassanik pilersitsisup eqqagassaatini kommunimut imaluunniit eqqagassanik katersisartumut kommunimit akuerisamut tunniutissavai, taakku eqqagassat passunneqaqqinnissaat tamakkiisumik akisussaaffigilissallugu.

Kommunimi katersisarnermi ingerlatsineq namminersortumut allamut suliakkiutigineqarsimappat, igitsinissaq kommunalbestyrelsip innersuussutai naapertorlugit ingerlanneqarnersut, kommunalbestyrelsip nakkutigissavaa.

Kommunalbestyrelsip suliffeqarfiit kommunip aaqqissuussinernik ingerlataanik isumagisaqarneq ajortut pillugit katersisarneq igitsisarnerlu taakkununnga ilanngullugit inoqutigiinni, inissiani, suliffeqarfinni eqqakkanilluunniit aaqqissuussinerni il.il. eqqakkat suunerinik amerlassusiilu pillugit paasissutissanik tunniusseqqusinnaavai. Takuuk imm. A, imm. 5.7 – Nalunaaruteqartussaatitaaneq.

Katersisarnermi aaqqissuussinerit pisussaaffiusinnaapput imaluunniit nammineq kajumissuseq tunngavigalugu suliaasinnaallutik.

Katersinermi aaqqissuussinerit assersuutissat tassaapput: Eqqagassat nalinginnaasut eqqagassallu angisuut.

Innersuussisarneq

Innersuussisarnermi aaqqissuussineq ileqqoreqqusatigut aalajangersagaavoq, tamatumani eqqakkanik pilersitsisartup akisussaaffigalugu eqqakkat kommunimi ileqqoreqqusani aalajangersakkat naapertorlugit passunneqarnissaat. Kommunalbestyrelsip innersuussutai naapertorlugit suliassatigut aningaasatigullu eqqakkanik passussinermi akisussaaffik, eqqakkanik pilersitsisumiippoq.

Eqqagassat qanoq pineqarnissaannik aalajangersimasumik innersuussineq

Eqqakkanik pilersitsisartut tamarmik pissutsit, ataani eqqagassat suunnerinik ilallit imaluunniit avatangiisinik mingutsitsinermut tunngasut pillugit nalunaarutiginnittussaatitaapput. Eqqakkat allat suusinnaaneri pillugit nalunaarutigineqartussaapput. Tamanna aaqqissuussinerit ataasiakkaat pillugit imm. B-mi allaaserineqarput. Sermersuumi Eqqagassaleriffik nalunaarfigineqassaaq.

Eqqagassalerivik uunga sianerluni attavigineqarsinnaavoq 36 74 11 imaluunniit uunga allaffigalugu affald@sermersooq.gl

Umiarsualivinni eqqagassanik tigooraasarneq

INUUSSUTISSARSIUTEQARTUNUT IMMIKKUT

Umiarsualiviit umiarsuarnit, suliaqarfinnit qilleriveqarfinniillu eqqakkanut tigooraavinnik pilersitsisussaatitaapput, maleruaqqusani matumani malittarisassat naapertorlugit. Tigooraavinnik pilersitsisoqassaaq kingusinnerusukkut kommunip aaqqissuussaanut, maleruaqqusani allaaserineqartumi, igikkiartorneqartussanik.

Umiarsualivimmi tigooraavimmit kommunip tigooraaviinut eqqakkanik igitsinermut atatillugu umiarsualivik tassaavoq, eqqakkanik pilersitsisuusoq, taamaasillunilu maleruagassani matumani malittarisassanik malinnittussaatitaasoq.

Nakkutilliineq aqutsinerlu

Eqqakkat inatsisit matumanilu maleruagassiat naapertorlugit eqqakkat passunneqarnersut uninngatinneqarnersullu kommunalbestyrelsip aqullugulu nakkutigissavaa.

Pissutsit maleruaqqusanut ilaatinneqartut pillugit Kommunalbestyrelse naalakkiuteqarsinnaavoq inerteqquteqarlunilu, Eqqakkat pillugit Namminersorlutik Oqartussat nalunaarutaat nr. 3, 7. januar 2021-imeersoq, kap. 16, aamma Oliakunit akuutissanillu eqqagassat pillugit Namminersornerullutik Oqartussat nalunaarutaat nr. 29, 17. september 1993-imeersoq, kap. 6 naapertorlugit.

Peqqussut imaluunniit inerteqqut piffissaliunneqartup iluani malinneqanngippat, akisussaasup akiligaanik suliassaq Kommunalbestyrelsip suliaritissinnaavaa. Annertuumik mingutsitsineq pinngitsoortinniarlugu imaluunniit taassuma siaruarnissaa pinngitsoortinniarlugu piaarnerpaamik qanoq iliuuseqarnissaq pisariaqarpat, kommunalbestyrelsip peqqussuteqaqqaarani iliuusissat pisariaqartut isumagissavai akisussaasumut akiligassanngorlugu. Taamatut piaarnerpaamik iliuuseqarneq tamatigut allakkatigut aalajangiinermik kinguneqartitsissutaassaaq, Avatangiisit innarlitsaaliorneqarnissaanik Inatsisartut inatsisaat nr. 9, 22. novembari 2011-meersumi § 58 naapertorlugu.

Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersumi § 47 naapertorlugu eqqakkanik pilersitsisartut kommunip nakkutilliisuinut inoqutigiit eqqagassaataannik passussinissamut isersinnaatitsissapput.

Akitsuutit

Avatangiisit innarlitsaaliorneqarnissaannik Inatsisartut inatsisaat nr. 9, 22. novembari 2011-meersoq § 39 naapertorlugu Kommunalbestyrelse akiliutigitittagassanik aalajangersaasarpoq. Akiliutigitittakkat qanoq amerlatiginissaat ukiumut ataasiarlutik akuersissutigineqartassapput.

Eqqagassalerinermut akit kommunip akinik nalunaarsuiffianiipput.

Aaqqissuussinerit immikkuullarissut saniatigut, soorlu eqqakkanik katersinermi akiliutigitittakkanut tunngatillugu Kommunalbestyrelse kommunip pilersaarusiorneranut, allaffissorneranullu matussutissaanut akiliuteqartitsisinnaavoq.

Kommunip nunaqarfiini Ittoqqortoormiinilu eqqagassanik pilersitsisartunut tunngatillugu, tunngaviusumik akiliutigitittakkamik pisussaaffiusumik Kommunalbestyrelse aalajangersagaqarpoq, angerlarsimaffinni eqqakkanik pilersitsisartut eqqagaannik passussinermi aningaasartuutinut tamanut matussutaasussanik. Aamma takuuk immikkoortoq 5.5 Akiliuteqartussaatitaaneq.

INUUSSUTISSARSIUTEQARTUNUT IMMIKKUT

Eqqakkanik pilersitsisartut, maleruaqqusanut ukununnga ilaatinneqartut, kommunimit eqqakkanut akiliutigitittakkanik aalajangersaanermi sunniuteqarsinnaasunik allannguutinik kommunimut nalunaaruteqartassapput. Assersuutigalugu tassaasinnaapput suliffeqarfimmit, sulisoqarfimmit imaluunniit umiarsualivimmit eqqakkat amerlassusiat aammalu eqqakkat suunerinut tunngasut.

Immikkut akuersissutit

Ukunani malittarisassani immikkut akuersissumik tunineqarsinnaaneq periarfissaanngilaq.

Saaffiginninneq naammagittaalliornerlu

Maleruaqqusani aalajangersakkat taakkulu atortinneqarneri pillugit saaffiginnissutit naammagittaalliutillu Kommunalbestyrelsimut suliami aalajangiisussaatitaasumut ingerlatinneqassapput.

Kommunalbestyrelsip aalajangiineri Avatangiisit Innarlitsaaliorneqarnissaat pillugit Naammagittaalliuteqartarfimmut, c/o Fællessekretariatet, Imaneq 27, 1. sal, Postboks 689, 3900 Nuuk, suliassanngortinneqarsinnaapput. Naammagittaalliuteqarnissamut sapaatip akunneri arfinillit piffissaritinneqarput, kommunalbestyrelsip aalajangernerminik naammagittaalliuteqartumut ullormi nalunaaruteqarfianiit.

Nalunaarfissaq tassaavoq Sermersuumi Eqqagassalerivik oqarasuaat normu 36 74 11 imaluunniit uunga allaffigalugu affald@sermersooq.gl.

Unioqqutitsineq pineqaatissiinerlu

Eqqakkat pillugit Namminersorlutik Oqartussat nalunaarutaat nr. 3, 7. januar 2021-imeersoq kap 16, Oliakunit akuutissanillu eqqagassat pillugit Namminersornerullutik Oqartussat nalunaarutaat nr. 29, 17. september 1993-imeersoq kap. 8, kiisalu Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersumi kap. 15 naapertorlugit maleruagassami matumani malittarisassanik unioqqutitsineq imaluunniit maleruagassat uku pillugit peqqusinernik inerteqquteqarnermilluunniit unioqqutitsineq, akiligassiissuteqarnermik kinguneqartitsissutigineqassaaq.

Nassuiaatit

Igitat

Eqqagassat tassaatinneqarput suulluunnit piginnittumit igitat, iginniarneqartulluunniit imaluunniit pinngitsoorani igitassanngortitat.

Eqqagassalerisoq

Eqqagassalerisoq tassaavoq, eqqakkanik pilersitsisartup eqqagaanik kommunip eqqaaveqarfianukaassiinnarani allanik aamma suliaqartartoq. Assersuutigalugu tassaasinnaapput immikkoortitereqqinneq, naqitsinikkut aserorterineq, naqiterineq, panersiineq, aserortereqqiineq, immikkoortiterineq, avissaartiterineq, isaterineq imaluunniit eqqakkanik poortueqqinneq. Eqqakkanik passussinermut atatillugu eqqagassalerisup peqqinnissamut avatangiisinullu illersorneqarsinnaasumik passussinissaq akisussaaffigaa.

Eqqakkanut pooq

Pooq eqqakkanut inissiiviusoq, kommunip katersuinikkut aaqqissuussinerani katersorneqarnissaat sioqqullugu. Kommuneqarfik Sermersuumi kommunip eqqakkanik katersisarnerani eqqagassaasiviit eqqakkanik uninngatitsiviit kisimik atorneqartarput.

Angerlarsimaffinnit eqqakkat

Eqqagassat angerlarsimaffimmi pilersinneqartut, tamatumunnga ilanngullugit anartarfiit imaat, eqqagassat angisuut aammalu eqqagassat suuneri najoqqutaralugit immikkoortitikkat atoqqitassat.

Inuussutissarsiortunit eqqakkat / Inuussutissarsiortut eqqagaat

Eqqakkat, pisortat suliffeqarfiinit imaluunniit namminersortunit, sulisoqarfinniit umiarsualivinniillu

Eqqakkat immikkoortiterneri

Eqqakkat immikkoortiterneqassapput atortut, katitigaaneq pinngoqqaarfiallu naapertorlugit. Eqqakkat assigiinngitsut immikkoortut tassaasinnaapput, savimineq, igalaamineq pappiaqqallu qeratasuut.

Eqqagassanik katersisartoq

Eqqakkanik katersisartoq eqqakkanik pilersitsisartumit arlalinnilluunniit allat akiligassaannik eqqakkanik katersisarpoq, taakkulu ikuallaasarfiliaattarlugit. Katersinermut atatillugu eqqakkanik pilersitsisartumiit eqqakkanik katersisartumut eqqakkanik immikkoortiterineq akisussaaffigitinneqalerpoq. Aamma takuuk eqqakkanik ingerlatsisoq eqqakkanillu passussisoq.

Eqqakkanik pilersitsisartoq

Kinaluunniit suliaqarnermigut eqqagassanik pilersitsisoq tassalu imaappoq kinaluunniit piareersaataasumik, assigiinngitsunik allatulluunniit suliarinnittoq, eqqagassap pissusianik katiternerataluunniit allanngornerataluunniit allanngorneranik kinguneqartumik eqqagassaqalernermik pilersitsisuuvoq.

Eqqakkanik assartuisartoq

Kinaluunniit inuussutissarsiorneq siunertaralugu allat akiligaannik eqqakkanik assartuisoq. Eqqakkanik assartuisartup eqqakkanik pilersitsisumit eqqakkat passussisarfiliaatissavai, eqqakkat eqqortumik immikkoortitersimanerisa akisussaaffiginera tigunngikkaluarlugu. Aamma takukkit eqqakkanik katersisartoq aamma eqqakkanik passussisartoq.

Nalunaarutiginninneq

Eqqakkat suunerinik annertussusiinillu allaaserinninneq sanaartornerni anginerusuni naatsorsuutigineqartut.

Innersuussisarnerit

Aaqqissuussineq malittarisassatigut kommunalbestyrelsimit aalajangersarneqarsimalluni eqqakkat qanoq aamma atortumi sorlermi passunneqarnissaannut eqqagassaqalersitsisoq qulakkeerissasoq.

Tunngaviusumik> Tunngaviusumik akigititat (nunaqarfiit aamma Ittoqqortoormiit)

Kommunimi nunaqarfinni aamma Ittoqqortoormiini angerlarsimaffiit tamarmik tunngaviusumik akiliutissamik pisussaaffiusumik, eqqakkanik suliarinninnermi aningaasartuutinut tamanut matussusiisussamik, akileeqquneqartarput. Eqqakkanik nalinginnaasunik puussiat marluk tikillugit sapaatip akunneranut aallertoqarsinnaavoq aammalu sapaatip akunneranut anartarfiit imaannik pingasoriarluni aallertoqarsinnaalluni (illu tunngaviusumik akimik akiliisartussatut nalunaarsorsimasoq).

Igitsiartorfik

Suliaq sunaluunniit atoqqitassaanngitsoq.

Eqqakkat inaalinneqarsinnaasut

Eqqakkat, atortussatut atorneqarsinnaanngitsut imaluunniit ikuallanneqarsinnaanngitsut.

Nunami eqqaavik

Immikkoortoq eqqakkanik ataavartumik inissiiffiusoq, avatangiisit pillugit inatsimmi kapitali 5 malillugu avatangiisinut akuersissuteqarfiusimanngitsoq.

Poortuutissat

Tunisassiat suulluunniit atortullu poortuinermut, illersuinermut, passussinermut tunisassiortumiit pisisumut atuisumulluunniit tunniussinermut aamma nioqqutissanik tunisassiassanik imaluunniit suliarineqarsimasunik saqqummiussinermi atorneqartut. Atortut ataasiaannarlugit atortakkat tamarmik, siunertamut tassunga atorneqartut, poortuutissatut isigineqassapput.

Eqqakkat atoqqinneqarsinnaasut

Tassaapput, eqqakkat atoqqinneqarnissaat siunertaralugu immikkoortiterneqarnissamut teknikkikkut naleqquttut, Kalaallit Nunaanni imaluunniit Danmarkimi/nunani allani (atoqqinneqarnissaat siunertaralugu nassiunneqarnissaat ilanngullugu) aaqqissuussinerit iluanni. Atoqqiisarneq suliassaavoq nutaanik atortussialiornermut il.il. tunngatillugu stoffit sinneruttut atoqqitassanngortittarnerinik.

Illoqatigiit

Illoqatigiit pineqartillugit tassaapput, inissianik, illunik najugaqarfinnik piginnittut, attartortut atuisullu. Illoqatigiit tassaapput ataatsimoortut, najugaqatigiiffimmi/najukkami ataatsimi ilaqutariissutsimut tunngasut eqqarsaatiginagit, inuit najugallit tamarmik.

Passussisarneq

Katersineq, angallassineq, tigusisarneq, passussineq, atoqqitassanngortitsineq eqqakkanillu igitsisarneq.

Katersinermi atortut

Tassaapput inaalitsiviit angallassissutillu assigiinngitsut eqqakkanik katersinermi angallassinermilu atorneqartartut.

Katersuisarnermi aaqqissuussineq

Aaqqissuussineq maleruaqqusanik aalajangersaaffiuvoq. Eqqakkanik tunniussisarfimmi imaluunniit katersisarfimmi suliareqqiisarneq kommunalbestyrelsip akisussaaffittut tiguppagu.

Eqqagassanik immikkoortiterisarneq

Eqqakkat immikkoortiterneqassapput aallaavigisaanniit (eqqakkanik pilersitsisumit imaluunniit tassunga sapinngisamik qanittumit, eqqakkanillu tigooraavik sioqqullugu) immikkoortunut assigiinngitsunut, assersuutigalugu savimerngit, papit igalaamerngillu.

Tigooraavik / Eqqakkanik suliarinnittarfik

Atortoq eqqakkanut iluaqutaasoq imaluunniit igitsisoq, tassunga ilanngullugu atortoq iluaqusiinissaq imaluunniit igitsinissaq sioqqullugu piareersaasoq.