Takornarianut angallatit tulareerlutik isumannaannerusumik niuffissaqarniassammat, Kommuneqarfik Sermersuumi Inuussutissarsiornermut Immikkoortortaqarfik Qoornumi ungaluusamik pilersitsivoq.
Aasaagaluarpat ukiuugaluarpallu umiatsiamiit niuffissaq umiatsiamullu ikiffissaq ilaasunut toqqissisimanarnerunissaa ungaluusamik pilersitsinermut siunertaavoq.
Neriuppugut ungaluusatut pilersitaq umiatsiamik Qoornumut tikittartunit iluaqutigineqarluarumaartoq.
Namminersorlutik Oqartussat attaveqaasersuutinut minnerusunut tapiissutigisartagaannit aningaasaliiffigineqarneratigut ungaluusaq pilersinneqarpoq.
