Kommuneqarfik Sermersuumi Inuusuttut Kommunalbestylsiata ukiumoortumik ataatsimeersuarnera 2026 Nuummi ulluni tallimani ingerlanneqarpoq ataasinngorneq 1. juunimiit tallimanngorneq 5. juuni ilanngullugu.
Ullut inuusuttunut nuannersut, ikinngutigiilerfiusut imaqarluartullu ingerlanneqarput. Ataatsimeersuartut imminnut ilinniarlutillu meeqqat pisinnaatitaaffii, pimmatiginnittarneq, aalanermik sammisassaqartitsineq, kommunip iluani politikeritut, politikerillu aalajangingaat aallaavigalugit kommunip iluani sullissineq, inuiaqatigiit akornanni namminneq qanoq iliuuseqarnikkut sunneeqataallutillu suleqataasinnaanertik paasisaqarfigivaat. Ullunilu ataatsimoorfiusuni ilinniartitsisut ingiallortaasut kitaani tunimilu meeqqat ikinngutigiinneq aallaavigalugu attaveqaqatigiissinnaanerat anguniarlugu attaveqaatinik pilersitsipput.
Ullumi ataatsimeersuarnerup naammassinerani innersuussutit sisamat Kommunalbestyrelsimut tunniunneqarput. Innersuussutit kommunalbestyrelsi ataatsimiilerpat eqqartorneqarlutillu aalajangiiffigineqassapput.
“Inuusuttortatta innersuussutaat pingaaruteqartut ataatsimiinnermi oqaluuserinissaanut, suliassatullu ingerlaqqittussat suliaqarfiginissai qilanaarivara. Inuussuttummi innersuussutaat oqariartuutaallu kommunitsinni pingaaruteqarluinnarput. Neriiuutigivaralu kommunitsinni innuttaasut tamatta inuusuttortatta oqariartuutaat kivitseqataaffigiumaarigut”. ”- Taama oqaaseqarpoq Kommuneqarfik Sermersuumi borgmesteri Avaaraq S. Olsen.
Innersuussutit:
Inuusuttut Kommunalbestyrelsiata ukiumoortumik ataatsimeersuarnera 2026
Inuusuddu kommunalbestyrelseala alaatsimeertsuarnernga 2026
Innersuussut 1.:
- Kommuneqarfiup iluani makker klassit pilersinneqartariaqarput
- Ilaqutariit ullui amerlanerusariaqarput, angalanermullu tapiisoqarsinnaalluni
- Aasakkut sumiiffinni klubbinilu sammisassat amerlanerusut pilersinneqartariaqarput
Tsiunnertsuutsar 1.:
- Kommuneqarpila iluani makker klassid pilertsinnerardaajararpud
- Ilarularngii uddui amerdaliilaajararpud, aamma angalanermud dapiisorartsinnaaor
- Mannginnikkud tsumiippinni aamma klubbini sammisatsadamerdaniid pilertsinnerardaajararpud
Innersuussut 2.:
Inuusuttut Kommunalbestyrelsiata atuuffia qanoq nukittorsarsinnaavarput?
ATAATSIMIINNERIT AMERLANERUSUT:
- Aamma Nuup Avataani soorlu tunumut Islandimullu ataatsimiigiarnerit paasisassarsiornerillu
- 2 x Internet atorlugu
- 2 x Kommuneqarfik Sermersooq
Tsiunnersuutsar 2.:
Inuusuddud Kommunalbestyrelsiala aliippia qanertsanngisartsinnaavarpu?
ALAATSIMIINNII AMERDANII:
- Aamma Nuup Avalaani tsoordu Tunumud Islandi muddualaatsimiingiarnii aamma paasisatsartseernii
- 2 x Internetti alerdungu
- 2 x Kommuneqarfik Sermersooq
Innersuussut 3.:
Qanoq ililluta atuarfinni pimmatiginninneq akiorsinnaavarput?
- Pimmatiginninneq akiorniassagutsigu meeqqat akornanni tapersersueqatigiinneq ikioqatigiinnerlu pisariaqarpoq.
- Atuarfimmi pimmatiginnittarneq pillugu paasisat nutaat pillugit saqqummiisoqartassaaq paasissutissiillutik ilinniartitsisunut, atuartunut aamma angajoqqaanut.
- Atuarfimmi pimmatiginnittarneq pillugusaaffissaqartariaqarpoq assersuutigalugu vagtit amerlanerit, socialrådgiverit, psykologillu. Aammalu sianerluni saaffissaq
Tsiunnertsuutsar 3.:
Qaniiseerdila alivarpinni uuluulartsaarnilarner agiortinnaavarpud?
- Uuluulartsaarnginer agiornaartsaardungu mertserdi agernanni dapertsertsueralingiinner aamma igioralingiinner pilaajararpor
- Alivarpimmi uuluulartsaarngilarner piddungu paasila nulaad piddungu tsaqqimiisorardatsaor ilinniarditsisunud, alivardinud aamma angajoqqaanud paasitsulitsiiddili.
- Alivarpimmi uuluulartsaarngilarner piddungu saappitsarardaajararpor atsertsuuliiddungu vagtid amerdaniid, isumanginninnermi tsiunnertsordid, darnid pitsusaanni immikkud ilisimasarardid. Aamma tsianerdini tsaappitsar.
Innersuussut 4.:
Nammineq innersuussutigisaat:
- Timikkut tarnikkullu peqqissuuneq pillugu Kommuneqarfik Sermersooq assigiinnik naleqartitaqassasoq. Assersuutigalugu atoqatigiinneq pillugu atuartitsineq tamanut ersarinnerusoq pissarsiaqarnarnersusorlu.
- Imigassaq, vape, snus, pujortarneq aanngajaarniutillu allat pillugit atuartitsisoqarnissaa paasissutissiisoqarnissaalu.
- Illoqarfinni nunaqarfinnilu assigiinngitsuni inuusuttunut timikkut peqqissuunissaq pingaaruteqarmat timersornissamut periarfissat orniginarnerusut. Soorlu arsaattarfeeqqat atoqqitanik ungalullit, naluttarfiit, cykkilertarfiit, inuusuttuaqqanut fitness kissaatigineqarput.
- ITTOQQORTOORMIIT: Maannakkoqqissaaq klubbit timersortarfimmiittarmata kissaatigaarput nammineq klubbeqalernissarput.
- KULUSUK TASIILARLU: Multibane pitsaanerusut, natii narlortut.
Tsiunnertsuutsar 4.:
Nammeer tsiunnertsuutsad:
- Dimikkud aamma darnikkud peqqitsuser piddungu Kommuneqarfik Sermersooq atsingiinni nalerardilaratsaler
- Atsertsuuliiddungu seksualundervisningi damanginnud erdaadiitsaler aamma pitsartsiararnardiitsaler.
- Imingatsar, vape, snusi, poortarner aamma igiarngoornardid adda piddungu alivarditsisorarnitsaa aamma paasitsulitsiiloqarnitsaa.
- Pippini atsingiinngitsini inuusudduu dimikkud peqqitsuunitsar pingaarnguleraajarmad dimertsornitsamud piiarpitsad ajernanngitsiilimi orninnerartsinnaanitsaad tsoordu artsaaddarpiid migiliilud aleqqinnerardini tsinaakkulerardi, puumiddardarpiid iddilarardid, cykkilerdarpiid, inuusuddunud fitnesserdarpiid.
- ITTOQQORTOORMIIT: Damaddaqqitsar klubbid dimertsordarpimmeerngaarmala kitsaaliivarpud nammeer klubberalernitsarpud.
- KULUSUK AAMMA TASIILAQ: Multibane ajinngitsiilor, nalilaa manidder.
Ilaasortat: (7.,8.,9 klasse)
Nivi Kielsen, Atuarfik Tuiisaq, Paamiut
Hans Nakinge, Kulusumi Alivarpi, Kulusuk
Nina S. Nielsen, Nuuk Internationale Friskole, Nuussuaq
Martin Danielsen, Ejnar Mikkelsenila Aluarpia, Ittoqqortoormiit
Vittunnguujuk Sivertsen, Tasiilami Alivarpi, Tasiilaq
Lucy-Nuunu Boassen, Kuummiini Alivarpik, Kuummiut
Mina Sanimuinaq, Sermilingaap Alivarpia, Sermiligaaq
Aimèe Petersen Olsen, Kangillinnguit Atuarfiat, Nuussuaq
Bent Sanimuinaq, Isertup Alivarpia, Isertoq
Tony Isaksen Gillich, Atuarfik Inussuk, Nuuk
Rolf Føns Jensen, Atuarfik Hans Lyge, Nuussuaq
