Kommuneqarfik Sermersuumit inatsissatut siunnersuummut tusarniummut akissuteqartoqarpoq, inatsissami Kalaallit Nunaanni innuttaasunut innarluutilinnut pisinnaatitaaffiit periarfissallu pitsanngorsarniarneqarput. Kommunimit siunertarineqartoq tapersersorneqarpoq kisiannili siunnersuutigineqartumut arlalinnik annertuumik ernumassuteqartoqarpoq.
Siunertat pitsaasut – aningaasartassaqanngitsulli
Inuit innarluutillit inatsimmik sulinermi atorneqarsinnaasumik aamma ulluinnaani allannguisinnaasumik pisariaqartitsipput. Inatsisissatut siunnersuummi kommunit suliassanik arlalinnik nutaanik suliassaqalissapput, kommunilli suliassat suliarinissaannut pisariaqartunik aningaasanik pissaqassanngillat. Inatsimmi naatsorsuutit piviusorsiorpalaanngillat imaluunniit soqanngilluinnarpoq, taamaalillutillu kommunit akilersinnaanngisaminnik akiligassaqalissapput.
Piviusorsiunngitsoq
Inatsimmi piumasaqaaatit annertunerusut suliassaqarfimmi sulisunut annertunerusunik piumasaqaateqarfiussapput. Inatsisissatut siunnersuummi aaqqissuussaanikkut unammilligassat aamma nunap immikkoortuini assigiinngissutsit puigorneqarput. Kommunit ullumikkt ilaatigut inunnik innarluutilinnik suliassaqarfimmi naleqquttunik sulisussanik amigaateqarput. Sulisussaqanngilaq. Paaqqinniffiliornissamut aamma najugaqatigiiffiliornissamut aamma illutassaqartoqanngilaq. Inatsisissatut siunnersuummi nunap immikkoortui isiginngitsuusaarneqarput nunalu tamakkerlugu annertuumik piumasaqaateqartoqarluni. Inatsimmik malinninnissaq kommuninut akisoorujussuanngussaaq innuttaasullu pisinnaatitaaffii pappiliaannarniiginnartoorsinnaapput.
Piareersarluarsimannginneq pitsaanngitsunik inerneqartarpoq
Inatsisissatut siunnersuut oqaaseqatigiinnik paasiuminaatsunik, kukkunernik aamma nassuiarneqanngitsunik ulikkaarpoq.
Taamaattumik sullissisut inatsisip qanoq paasinissaanut piffissamik nalilimmik annertuumik atuissapput, innuttaasunut ikiunissamut atugassaraluaminnik, tamanna sullissinermi pisariaqanngitsumik nalorninermik pilersitsissaaq aamma innuttaasunik ikiuiniarnermik arriinnerulersitsissaaq. Ukiut marluk qaangiupput inatsissatut siunnersuutaaqqaartoq tusarniaassutigineqaqqaarmat. Kommunimit siunnersuut aamma uparuarneqarpoq, ilaatigut piviusorsiorpalaannginnera aamma suliassanut aningaasartassaqannginnera pillugu. Taamani aamma suliniutinut nutaanut naatsorsuuteqanngilaq. Ukiuni marlunni inatsissap piareersarneqarnerani kommunit peqataatinneqanngillat naak kommunit suliassaqarfimmi ilisimasaqarnerpaajugaluartut, innuttaasut pisariaqartitaanik ilisimasaqaraluartut aamma suliassanik suliarinnittussaagaluartut.
Kommunip tungaaniit kaammattuut
Kommuneqarfik Sermersuumit inatsisissap kinguartinneqarnissaa, aningaasartassaanik peqqissaarussilluni naatsorsuisoqarnissaa aamma kommunit sulinerup ingerlaqqinnerani naligiittut peqataatinneqarnissaat kajumissaarutigineqarpoq.
Tusarniaanermut akissuteqaat allaffeqarfimmit tusarniaanermik ingerlatsinermut nalinginnaasumut atatillugu suliarineqarpoq, uanilu atuarneqarsinnaavoq:
https://oqaluuserisassat.sermersooq.gl/vis/pdf/bilag/05606f68-dcda-4064-8cb9-afff9adfab11/?redirectDirectlyToPdf=false