Kommuneqarfik Sermersuumi ulluunerani neqeroorutinut sulisussarsiniarneq sulisunillu tigumminniinnarniarneq suli unammillernartorsiorfiupput. Paaqqinnittarfinni sulisinnaasunik amigaateqarneq meeqqanut, angajoqqaanut sulisunullu sunniuteqarpoq aamma ulluinnarni nalinginnaasumik tatisimaneqarnermik pilersitsilluni.
Marsimi 2026-mi, naatsorsuinerup ersersippaa, kommunimi tamarmi ulluunerani paaqqinnittarfinni atorfiit 79-it inuttaqanngitsut. Pingaartumik perorsaasunik ilinniarsimasunik amigaateqarneq ajornartorsiutaavoq.
Meeqqanut Atuarfeqarnermullu Ingerlatsivimmit sulisussaqarniarneq pitsanngorsarneqaqqullugu paaqqinnittarfinnilu sinaakkutissat patajaannerusut pilersinneqaqqullugit suliniutinik arlalinnik ingerlatsisoqartuarpoq. Suliniutigineqartut ilagaat paarlaasartunik, ilinniartunik aamma utoqqalinersialinnik sulisussarsiornerit kiisalu sulisut piginnaasaannik inerikkiartortitsineq aamma sulisunik tigumminniinnarniarneq.
Suliffeqanngitsut 50-it pallillugit amerlassusillit pikkorissarnermik ingerlatsinissaat siunertaralugu kommune Majoriamik suleqateqarnermik aallartitsivoq, taamaaliornikkut taakkua ulluunerani paaqqinnittarfinni sulisinnaaleqqullugit. Ingerlatsineq aasakkut sulinngiffeqareernermi ingerlanneqassasoq pilersaarutigineqarpoq. Taakkua saniatigut sulisussarsiniarneq piginnaanngorsaaqqinnerlu pillugit suleqatigiinnernik allanik suliaqartoqarpoq, taakkununnga ilanngullugit SPS-imik.
Aaqqiissutaasinnaasut pillugit ataatsimiititami siulittaasup Naalakkersuisunik oqaloqateqarnissamik aallartitsivoq, taakkununnga ilanngullugit sulisussarsiornermut sulisinnaasunillu kajumilersitsinissamut sinaakkutit pillugit.
Peqatigitilluguttaaq paaqqinnittarfinni aqutsinerup pitsaanerulersinneqarnissaa aallunneqarpoq, taamaalilluni sulisunik aqutsinermut aamma sulisunik tigummiinnarnermut piffissaq sivisunerusoq atorneqarsinnaaleqqullugu, kiisalu angajoqqaanik pitsaanerusumik attaveqarnermut tunniussisoqarsinnaaqqullugu.
Paaqqinnittarfinni ataasiakkaani pissutsit ernummatigineqarnerat pillugit kommune angajoqqaanit saaffiginnissutinik ernumassutinnillu aamma tigusaqarpoq. Saaffiginnissutit tamakkua ilungersuunneqarput aamma suliassaqarfimmi suliniaqqinnermut ilanngunneqartarput.
“Nalunngilarput, pissutsit sumiiffippassuarni ilungersunartuusut, aamma tamakkua ullut tamaasa meeqqani, angajoqqaani sulisunilu malugineqartartut. Taamaattumik aaqqiissutissat nukinginnartut aamma ungasinnerusumut iliuusissat suliaraavut ulluunerani paaqqinnittarfinni sinaakkutissanik aalajaannerusut pilersinniarlugit” borgmesteri Avaaraq Olsen oqarpoq.
“Imaannanngitsunik unammilligassaqarpugut sulisussarsiniarneq, suliffimmi atugassarititaasut aamma sulisinnaasunik ilinniagalinnik pissarsiniarneq tamarmik pingaaruteqarput. Suliassaqarfimmik pitsanngorsaaniarluta kommunip periarfissarisai atorlugit ataavartumik sulianik ingerlatsivugut,” Meeqqanut Atuarfeqarnermullu Ingerlatsivimmi pisortaq Tina Evaldsen oqarpoq.
Sammisaq ataatsimiititap ataatsimiittarnerani ataavartumik sammineqartarpoq, ilaatigut suliassaqarfimmi killiffik aamma suliniutaasinnaasut misissorneqartuarput.