Februaarimiit marsimut Paamiuni utoqqaat illuanni Puilasunnguani sulisut puigortunngornermik nappaateqartut pillugit suliaqarnermut tunngatillugu pikkorissarnermi peqataapput.
Pikkorissarneq ulluni tallimani ingerlanneqartoq puigortunngornermik nappaateqartut pillugit suliaqarnermut tunngasuuvoq. Sulisut tamarmik peqataasinnaaniassammata sulisut marlunnut agguarneqarput, taamaalillunilu pikkorissarneq tamakkiisumik sapaatit akunneri sisamat missaanni sivisussuseqarluni.
Pikkorissarneq immikkooruteqarpoq tassami sulisut assigiinngitsunik suliaqartut tamarmik peqataatinneqarmata.Utoqqaat illuani paarsisut, pedelit, eqqiaasut, igaffimmi sulisut kiisalu angerlarsimaffimmi ikiortit peqataapput, tamannalu najugaqartunut ulluinnarni suleqatigiinnerup paasinninnerullu ataatsimoornerulersinneqarneranut iluaqutaasimavoq.
Pikkorissarneq sulisut puigortunngornermik nappaatip aammalu nappaatip nassatarisinnaasai pillugit annertunerusumik paasisaqarnissaannut iluaqutaasimavoq, Puilasunnguit pisortaat Tanja Møller oqarpoq. Ilinniartitsinermi peqataasut puigortunngornerup pilernerani ilisarnaatit siulliit pillugit kiisalu puigortunngornermik nappaatit assigiinngitsut ilisarnaataat ineriartornerallu pillugit ilisimasaqarnerulerput.
“Pikkorissarneq puigortunngornermik nappaateqartut pillugit suliaqarnermut tunngasoq ulluinnarni sulisut siornatigut nalornissutigisartagaannik suliaqarnermi oqilisaataasimasoq malugaarput, paasissutissanik sakkussanillu amerlanerusunik pissarsisimagatta. Sulisut pikkorissarnissamut periarfissaqarsimallutik qujamasupput, peqataaneq iluaqutigilluarpaat,” Tanja Møller oqarpoq.
Pikkorissarnermi aamma najugaqartut ulluinnarni qanoq pitsaanerpaamik naapinneqarsinnaaneri sammineqarput, taamaalillutik inuunerissaarnerat inuunermilu pitsaassusaat attatiinnarneqarlutillu nukittorsarneqarsinnaaqqullugit. Tamatuma saniatigut sulisut pinaveersaartitsinermik peqqinnissamillu siuarsaanermik suliaqarnissamut kiisalu puigortunngornermik nappaateqartut ilaqutaasa qanigisaasalu suleqatiginissaannut sakkussanik pissarsipput. Puilasunnguit puigortunngortunut immikkoortortaqarfiani ullumikkut najugaqartut aqqaniliupput, aammalu suliamut pikkorissusermut suleqatigiinnermillu ukkassinerulerneq najugaqartunut sulisunullu ulluinnarni toqqissisimanarnerusumik pitsaanerusumillu pilersitseqataavoq.