Ileqquusumik Future Greenland Nuummi ingerlanneqarpoq, ulluni marlunni ingerlanneqartumi nunatta siunissaa assigiinngitsut isaannit Katuap inersuaani eqqartorneqarpoq. Nunani allanit peqataasoqarpoq, inuussutissarsiortut, politikerit immikkut ittumillu ilisimasallit peqataallutik.
Borgmesteri Avaaraq Olsen Future Greenlandimi borgmesterit pingasut peqatigalugit oqallinnermi peqataavoq. Borgmesterinik oqallitsitsinermi qulequtarineqarpoq: Nunat immikkoortuini ineriartortitsineq, aningaasalersuineq illoqarfinnullu nussorneq.
Oqallinnermi ilaatigut borgmesterit aperineqarput suna aningaasaliiffigissallugu pingaarnerpaanersoq borgmesterilu Avaaraq Olsen ima akivoq:
Ineqarnikkut periarfissaqartitsinissaq taanna pingaarnerpaavoq kisianni aamma piffissamut ungasinnerusumut aningaasaliinissamut sapiissuseqarnissaq. Piffissaq ungasinnerusoq eqqarsaatigalugu aningaasaliinissaq pilersaarusiornissarlu ukiuni sisamani qinigaaneq kisiat aporfiginagu. Aap, suliffissat pingaartissavagut kisianni innuttaasut toqqissisimasumik ineqarnissaat taanna pingaarnerpaavoq.
Ineriartorneq pitsaasoq anguneqassappat politikerit, inuussutissarsiutigalugu suliaqartut innuttaasullu suleqatigiinnissaat pingaaruteqartoq borgmesterip aamma naqissuserpaa.