Kommuneqarfik Sermersooq Viska Horses suleqatigalugu meeqqat inuusuttuaqqat ajornartorsiutillit, soorlu avammut qisuariartaaseqartut atuarumajunnaartartullu pillugit hiistit aqqutigalugit inuunerissarnermik misiliutaasumik suliniummik ingerlatsivoq. Misilittakkat takutippaat inuttut atugarissaarnikkut aamma attaveqarnikkut ersarissumik pitsanngoriaateqartoq.
Suliniummi peqataapput inuusuttut aqqaneq-marluk 10-18 akornanni ukiullit, immikkut ittumik suliniuteqarnissamik pisariaqartitsisut, toqqissisimanermik, attaveqatigiinnermik namminnerlu sukkassusiannut pisariaqartitaannullu tulluussakkamik ineriartortinneqarnermik qitiutitsisumik.
Neqeroorut ataasiakkaanut naleqqussagaq
Hiistit aqqutigalugit inuunerissarneq eqqissisimasumi ingerlanneqarpoq, tassani hiistinik suleqateqarneq inuusuttunut eqqissinermik nassaarniarnermut, tatiginninnermik pilersitsinermut akisussaaffimmillu tigusinermut iluaqutaasarluni. Hiistip unneqqarissumik qisuariarnera naliliinertaqanngitsorlu, inuusuttunut attaveqalernissaq ineriartornissarlu ajornannginnerulersittarpaa.
Inuusuttuaqqat ilaat ingerlatsinnerup ingerlanneqarnerani aamma ilaquttatik ilagalugit nersutaasivimmeeqatigiittarsimapput. Tamanna angerlarsimaffimmi atassuteqarnermik nukittorsaaqataasimavoq.
Politikkikkut tapersersorneqartoq
Meeqqat, Ilaqutariit Ilinniartitaanerlu pillugit ataatsimiititaliami siulittaasoq Poul Petersen ima oqarpoq:
“Kommunitut pingaaruteqarluinnarpoq meeqqat inuusuttullu inuuniarnikkut atugarissaarnerat siusissukkut nukittorsarniarlugu siunnerfilinnik suliniuteqartarnissarput. Viska Horses suleqatigalugu hiistit atorlugit misiliutaasumik ingerlatsisimanermit misilittakkat takutippaat eqqissisimaneq, pissusilersorneq aamma attaveqarnerit tunngavigalugit neqeroorutit meeqqat inuusuttullu navianartorsiortut pillugit iluaqutaalluarsinnaasut.”
Angajoqqaat allannguutit malugaat
Angajoqqaat arlallit oqaluttuarput meeqqatik eqqissisimanerulersimasut ammanerusumillu pissuseqalersimasut. Inuiaqatigiinni peqataanerulersimapput allanillu peqateqarnissaq ajornannginnerulersillugu.
Angajoqqaat ilaasa aamma oqaatigaat meeqqatik ulluinnarni inuunermi nalinginnaanerusumik ingerlataqalersimasut nukissaqarluarnerullutillu. Tamatuma saniatigut eqqarsaatit misigissutsillu artornartut annikillisimapput, inuusuttullu taakkuninnga pitsaanerusumik aqutsisinnaalersimallutik.
Misilittakkat aamma takutippaat suliniut atuarfimmi orniguttannginnerup pinaveersaartinneqarnissaanut ilaqutariinnilu atugarissaarnermik pitsanngorsaanermut iluaqutaasinnaasoq.
Viska Horses Nuummi hiistertarfiuvoq, neqerooruteqartarlunilu sammisasassaqartitsisarluni, ingerlatsinernik misilittakkanillu hiistinik tunngaveqartunik.