Aliasuuteqarneq inuunerup ilagaa – aamma tamanna suliffimmut isaariap saavani imaluunniit kommunimik naapitsinermi uninneq ajorpoq. Taannaavoq sammineqartoq, Kommuneqarfik Sermersuumi sulisut aqutsisullu ulluni marlunni aaqqissuussami; suliffimmi aliasunneq aamma innuttaasunik attaveqarnermi aliasunneq pillugit katersuutsinneqarmata.
Aaqqissuussinerup ulluani siullermi sulisut 55-it najuullutik peqataapput 20-llu missaanniittut onlinekkut peqataallutik, sammisaqartitsineq inunnik isumaginninnermik siunnersortinut, ajornartoortoqartillugu upalungaarsimasunut aamma sulianik sullissisunut siunnerfeqarpoq. Aqaguani aqutsitut 100-t najuullutik peqataapput allat 30-t missaanniittut Teamsikkut peqataasut.
Peqataaniarluni takkuttut amerlassusiisa ersersippaa erseqqissumik pisariaqartitsisoqartoq.
– Aliasuuteqarneq kikkunnit tamanit naapinneqartarpoq – inuttut inuunitsinni aamma suliffitsinni. Taamaattumik pingaaruteqarpoq, uagut suliffeqarfittut aliasuuteqarneq pillugu oqaluuserinninnermut qunusuissuseqarnissarput aamma passussinissatsinnut pikkorinnerulernissarput – innuttaasut aamma immitsinnut eqqarsaatigaluta, ullunik sammisaqarfiusunik aaqqissuussisoq, Attaveqatigiinnermi & Sulisunik ineriartortitsinermut pisortaq, Rosannguaq Rossen oqarpoq.
Innuttaasut aliasuuteqartut ajornartoortullu pingaartillugit
Ulloq siulleq sulisut innuttaasunut attaveqarnerat aamma inunnik aliasuuteqartunik tuparujussuarsimasunillu naapitsinermi atuuffiat pingaartillugit sammineqarput.
Matumani ilaatigut sammineqarpoq aliasuuteqarneq innuttaasut atukkaminnik tamakkiisumik isiginnittaasiannut qanoq sunniuteqartarnersoq, aamma suliamik ingerlatsisut suliamut ilisimasatigut inoqatitullu misiginneqatiginnissinnaanikkut qanoq tapersersuisinnaanersut.
Saqqummiussisuuvoq pisortaq Sofia Birgitte Horsten, Dansk Center for Familier & Sorg-imeersoq (Danmarkimi Ilaqutariinnut Aliasuuteqartunullu Sullissivimmi pisortaq), taassuma paasissutissiissutigaa suut iluaqutaasarnersut – aamma inunnut ajornartoortunut pissutsit atugassarititaasut suut ilungersortitsinerusarnersut.
Innuttaasunut aamma sulisunut quppersagaq nutaaq
Ullut aappaanni ingerlatsineq pisortaqatigiinnut, chefgruppimut aamma immikkoortortani aqutsisunut siunnerfilik ingerlanneqarpoq, quppersagarlu saqqummersussaq “Suliffimmi aliasuuteqarneq” malunnartinneqarpoq.
Quppersakkami sakkussanik aalajangersimasunik ersersitsisoqarpoq taakkua aqutsisut suleqatillu suleqammik aliasuuteqartumik qanoq tapersersuinissaannut tunngassuteqarput – annaasaqarnerup kingorna piffissamit siullermit suliffimmullu uternermi iliuuserineqarsinnaasut eqqartorneqarput.
– Suliffeqarfimmik inummik ilivitsumik inissaqartitsisumik pilersitserusuppugut – aamma inuuneq annernartillugu. Sulisut arlaannaalluunniit pisumi ilungersunartumi kisimiissanngillat, kommuneqarfiup pisortaa Ole Jakobsen tikilluaqqusinermini ilaatigut taama oqarpoq.
Suliffeqarfimmi tamarmi ataatsimoortumik iliuuseqarneq
Aaqqissuussineq tassaavoq Kommuneqarfik Sermersuumi suliniutip angisuup ilaa, matumani sulisunut innuttaasunik attaveqartunik – aamma suliffeqarfiup iluani atortussanik ineriartortitsisoqassaaq.
Inunnik isumaginninnermik siunnersortinut, ajornartoortoqartillugu upalungaarsimasunut aamma sullissisunut siunnerfilimmik quppersakkamik immikkut suliaqartoqassaaq, innuttaasunik tuparujussuarsimasunik aliasuuteqartunillu sullissinermut nukittorsaataasussamik.
Suliniutit marluk siunertaraat tunngavissamik ataatsimoorussamik, oqaatsinik ataatsimoorussanik tapersersorneqarnermillu pitsaanerusumik pilersitsisoqarnissaa – innuttaasunik aamma suleqatinik naapitsinermi atugassanik.