Innuttaasut aalajangersimasumik angerlarsimaffeqanngitsut ikiorniarlugit Kommuneqarfik Sermersuumit tassunga tunngasunik suliallit arlallit qanimut suleqatigalugit ullut tamaasa anguniagalimmik sulissutigineqartarput.
Angerlarsimaffeqanngitsuuneq ajornartorsiutaavoq imaannaanngitsoq, suliniullu ataasiinnaq aaqqiissutaasinnaanngilaq. Taamaattumik innuttaasut aalajangersimasumik angerlarsimaffeqanngitsut ikiorniarlugit Kommuneqarfik Sermersuumi ullut tamaasa anguniagalimmik neqeroorutinik suliniutinillu siammasissunik suliaqarneq pisarpoq.
Kommunimi angerlarsimaffeqanngitsut toqqammavilimmik suliniutaasartoq tassaavoq angerlarsimaffeqarnissamut sungiusaanermik suliniut. Kommuneqarfik Sermersuumi angerlarsimaffeqarnissamut sungiusaanermik suliniut Housing Firstimi najoqqutassat naapertorlugit ilusilersugaavoq, tamakkiisumik isiginnittumik angerlarsimaffeqanngitsunut periuseqarneq, innuttaasup namminerisamik angerlarsimaffeqarnissaanut namminersorsinnaassuseqalernissaanut neqerooruteqarnikkut peqatigitillugulu inuttut ataasiakkaatut aaqqissuussamik angerlarsimaffeqarnermi ikorfartuinikkut. Angerlarsimaffeqarnissamut sungiusaanermik neqeroorummi pingaarnertut najoqqutassaq tassaavoq innuttaasup angerlarsimaffeqarneranik patajaallisaaneq, aallaaviatigut innuttaasup ajornartorsiutai allat innuttaasup kissaataa, neriuutaa takorluugaalu malillugit sulissutigineqarsinnaanissaat. Nuummi angerlarsimaffeqarnissamut sungiusaanermik neqeroorutit Kommuneqarfik Sermersuumi annertusarniarlugit sulissutigineqarput, 2025-mi Paamiuni Tasiilamilu angerlarsimaffeqarnissamut sungiusaanermik neqerooruteqarneq ammaassivigineqarpoq.
Nuummi Paamiunilu angerlarsimaffeqanngitsunut unnuisarfimmi unnuinissamut neqerooruteqarpoq, matumani innuttaasut eqqissisimasinnaapput, isumassorneqarlutik ingerlariaqqinnissaminnullu ikiorserneqarlutik. Taakkua saniatigut innuttaasut nerisassinneqarsinnaapput, atisaat errorlugit uffarlutillu.
Saniatigut Nuummi Uummateqarfeqarpoq, tassanilu persuarsiorani isumassuisumik oqaloqatiginninnernik neqerooruteqartoqartarpoq aammalu allanut neqeroorutinut attuumassuteqartunut innersuussisoqartarluni. Uummateqarfimmi tiitorlunilu kaffisortoqarsinnaavoq, perusuersartarfimmik atuisoqarsinnaavoq, uffartoqarsinnaavoq, atisanik errorsisoqarsinnaavoq, nutaanik atisalernissamut aamma eqqiluisaarnissat tunisassianik atuinissamut periarfissaqarpoq. Tassunga ilanngullugu innuttaasut ilungersunartumik inissisimasut angerlarsimaffeqanngitsullu Salon Uummateqarfik akeqanngitsumik atorsinnaavaat, matumani nutsat qulitsissinnaallugit killortissinnaallugillu kiisalu niaqqup utuggaa tagiartorneqarsinnaalluni.
Borgmesteriugallartoq Poul Petersen oqarpoq: “Angerlarsimaffeqannginneq unammilligassaavoq pinartuusoq, pimoorussassaalluinnartutullu tiguarput. Uannut pingaaruteqarpoq naqissusissallugu, ajornartorsiutaasoq ullormiit ullormut aaqqinneqarsinnaanngitsoq pineqartoq, aammalu inunnut tapersersorneqarnissaminnut, toqqissisimanissaminnut inuunerminnilu ingerlariaqqinnissaminnut aalajangersimasunik periarfissaqarnissaminnut pisariaqartitsisunut tunngasuusoq. Ullut tamaasa inuit ataasiakkaat ataqqinnittumik ikiorsiissummillu, nalaataminnut tulluartumik, neqerooruteqarfigissallugit sulisarpugut. Peqatigitillugu inuunermi atukkat nalunartuusut, matumani ataatsimik aaqqiissuteqarfiusinnaanngitsut, akulikitsumik pineqartuusut eqqumaffigilluinnarpagut.”
Kommune aqqusinermi sullissisoqarpoq, taakkulu innuttaasunik angerlarsimaffeqanngitsunik ingerlaavartumik ujartuisarput. Tassani oqaloqatigiinnissaq, tapersersuinissaq aamma periarfissat pioreersut pillugit aqqutissiuussinissaq neqeroorutigineqartarpoq. Ornigulluni suliniuteqarnerit ilaatigut inissiaqarfiit eqqaanni angerlarsimaffeqanngitsunit opgangini najorneqarallartartuni ingerlanneqartarput. Tamaani aqqusinermi sullissisartut innuttaasunik oqaloqateqartarput ikiorsiinissamillu allatulluunniit iliuuseqarnissamik neqerooruteqartarlutik, kisianni kikkut tamarmik neqeroorutinik atuerusunneq ajorput. Inissiaatileqatigiiffiit Iserit aamma INI aamma namminersorlutik inissianik attartortitsisartut angerlarsimaffeqanngitsut opgangini unnuisartut pillugit kommunimit oqaloqatigineqartarput. Innuttaasut opgangini unnuisartut kommunimit piiartinneqarsinnaanngillat aammalu innuttaasut ikiorneqarnissaminnik akuersisartut taamaallaat ikiorsinnaallugit. Kommune pinngitsaaliisinnaanngilaq, taamaattumillu innuttaasut ilaat neqeroorutit avataanniittunik atuisariaqartarput.
Isumaginninnermut Suliffeqarnermullu Ingerlatsivimmi pisortaq, Ejner Grønvold, itisiliivoq: ”Suliatta pingaarnerit ilagivaat sullissunik allanik suleqateqarnissaq. Suliassaq kisimiilluta suliarinngilarput, aammalu kisimiilluta kivissinnaanngilarput. Qanimut suleqatigisavut tassaapput ilaatigut peqqinnissaqarfik, politiit, inissiaatileqatigiiffiit aammalu suliniaqatigiiffiit kajumissutsiminnik suleqataasut, ataqatigiissumik aaqqiissuteqarnissaq pisariaqarmat. Innuttaasut naapittakkavut amerlasoorpassuit, unammilligassaqarput taamaallaat kommunimit suliarineqarsinnaasunik. Imaasisinnaavoq tarnimikkut nappaateqartut imaluunniit annertuumik atornerluisuusut, taamaattumillu suleqatigiinneq pingaaruteqartorujussuuvoq, sapinngisamik pitsaasumik ikiorsiissagutta.
Naak, innuttaasut angerlarsimaffeqanngitsut atornerluisuusut imaluunniit tarnikkut nappaatillit amerlanertigut ukkatarineqartaraluartut, angerlarsimaffeqanngitsuunerit assigiinngitsuupput. Innuttaasut ilaat piffissat ilaanni angerlarsimaffeqanngissinnaapput, allat piffissat ilaanni aalajangersimasumik najugaqarfeqanngitsutut nalunaarsorneqarsimasarput, piffissami sivisunerusumi sumiiffissaqanngitsuunngikkaluarlutik.
Pisortaq Ejner Grønvold nassuiaavoq: “Suliassaqarfimmi unammilligassaqarneq qularutissaanngilaq, kisianni aamma suliniutit aallartinneqareersimasut isiginiarneqarnissaat pingaaruteqarpoq. Uagut neqeroorutitsinnik ineriartortitsinermik pitsanngorsaanermillu ataavartumik suliaqarpugut, taamaaliornikkut sulinitsinni pisariaqartinneqartunut takusartakkatsinnut naleqquttuuniassammata. Peqatigitillugu angerlarsimaffeqanngitsuunerup atornerluinermik taamaallaat tunngassuteqannginnera erseqqissaatigissallugu pingaaruteqarpoq. Inuit ilaannut angerlarsimaffeqannginneq piffissap ilaanni atugassarititaavoq, allanut inooqataanikkut imaluunniit aningaasaqarnikkut pissutsinut tunngassuteqarpoq. Taamaattumik suliniutit siammasissut assigiinngitsunik aaqqiissutitallit piumasaqaataapput.”
Kommunimi sulisunit suliniummik ineriartortitsineq neqeroorutinillu pisariaqartitanut naleqqussaanermik ataavartumik sulisoqarpoq. Taamaattumik neqeroorutit pioreersut pitsanngorsarneqarnissaat suliassaqarfiillu aaqqiissutinik nutaanik pisariaqartitsiviusut pingaartumik innuttaasunut ajornakusoortunik ajornartorsiutilinnut suussusersineqarnissaat ukkatarineqarpoq. Assersuutigalugu Kommuneqarfik Sermersuumit innuttaasunut atugarliortunut, inissiani nalinginnaasuni najugaqarsinnaanngitsunut inissianik allaanerusunik pilersitsinissaq sulissutigineqarpoq. Taakkua saniatigut Nuummi arnanut angerlarsimaffeqanngitsunut unnuisarfimmik pilersitsinissaq pillugu Oak Foundation kommunimit suleqatigineqarpoq.
Suliamik ingerlatseqqinnermut atasumik angerlarsimaffeqanngitsut kisinneqarnerat nutaaq Ilisimatusarfimmit Steven Arnfjordimip suliaa utaqqineqarpoq. Inernerit pigineqalerpata kommunip nammineq misilittagaannut sanilliunneqassapput aamma pissutsit eqqornerusumik oqaatigineqarsinnaalernissaannut ilanngunneqassapput taamatullu suliniutit naleqqussarnerannut pitsanngorsarnerannullu tunngavittut atorneqassallutik.
Borgmesteriugallartoq Poul Petersen naggasiivoq: “Ullut tamaasa suliassaqarfimmi sulianik ingerlatsisut annertuumik iluunngarlungalu qutsavigerusuppakka. Suliaq pisariuvoq suliassaqarfimmut inuttullu paasinnittaatsinik piumasaqaatitaqartoq, aamma suliaq akuttunngitsumik isornartorsiorneqartarpoq. Isornartorsiutit tamakkua sulisutsinnut ullut tamaasa kommunitsinni innuttaasunut atugarliortunut pitsaanerpaamik ikiuunniarlutik suliaqartunut saatinneqartariaqanngillat. Sulisuvut suliniuteqarnertik pillugu nersualaarneqartariaqarput, ilungersunartunik atugassaqartitaallutik suliamik pitsaanerpaamik tunniussaqarniartuummata.”