Amernik suliaqartarfiusussaq nutaaq Tsakker ullumi ammarpoq. Ammaaneq piniarnermik inuussutissarsiuteqarnermik tapersersuinermut aamma kommunimi piniartut sulinissaannut periarfissanik pitsaanerusunik pilersitsinissamut alloriarneruvoq pingaaruteqartoq.
Piniarnermik inuussutissarsiutillit amernik suliaqarfigisinnaasaat pitsaanerulersinniarlugit Tsakker Kommuneqarfik Sermersuumit pilersinneqarpoq – kulturikkut ileqqut ingerlateqqinniarlugit aamma inuiaqatigiinni aningaasarsiornikkut pingaaruteqassalluni. Piniarneq kinguaariinni sumiiffimmi inuiaqatigiit ineriartornerannut qitiulluinnarsimavoq aamma amernik suliaqarfiusinnaasoq siunissami inuussutissarsiuteqarnermi piujuartitsilluni periarfissaqarnissamik qulakkeerinneqataassaaq.
”Tsakker pilersinneqarmat siunissami piniarnermik inuussutissarsiuteqarnermut aningaasaliivugut, illullu atorneqarnissaanut siunertaa ineriartorteqqinneqarsinnaassaaq. Suliniuteqarnermi ileqqut, inussutissarsiorneq aamma sumiiffimmi inuiaqatigiinnut ineriartortitsineq tapersersorneqarput,” Ittoqqortoormiini illoqarfimmi pisortaq, Charlotte Pike oqarpoq.
Tsakker ammarneqarmat innuttaasut pillugit aamma inuussutissarsiornermut aningaasaliinertut Kommuneqarfik Sermersuup isigaa, illullu sulianik suleqatigiinnermillu aallartitsisarnissaa aamma piniartunut ilaqutaannullu nutaanik periarfissaqartitsilernissaa ilimagineqarpoq.
Great Greenland sumiiffimmi amernik tigooraasussamik isumaqatigiissusiorpoq, ammillu umiarsuarmik Qaqortumut nassiunneqartassapput.
