Utoqqarnut Isumassuinermullu Ataatsimiititaq januaarip ulluisa 26-anni 2026 qinigaaffimmi matumani anguniagassanik sisamanik erseqqissunik akuersissuteqarpoq. Anguniagassani taakkunani ukiuni tulliuttuni ersarinnerusumik politikkikkut allaffissornikkullu sulineq qulakkeerneqassaaq ungasinnerusorlu eqqarsaatigalugu kommunimi utoqqarnut ataqqinarnerusumik, peqataaffiunerusumik toqqissisimanarnerusumillu iluaqusiissuteqassalluni.
”Anguniakkat allaannarneqarnissaat kissaatiginngilarput, kisiannili alloriarnernik erseqqissunik aallartitserusuppugut, utoqqartavut toqqissisimanartumik, ataatsimoorfiusumik ataqqinaateqartumillu ulluinnarni inooqataaniassammata. Ukiut sisamat sivikippoq, taamaattumik anguniagassartalinnik suliniuteqarusuppugut taamaalillutalu peqatigitillugu ungasinnerusoq eqqarsaatigalugu aaqqiissutissanut alloriarnerit siulliit aallartissallugit” Utoqqarnut Isumassuinermullu Ataatsimiititami siulittaasoq Nitta Lyberth-Mørch oqarpoq.
Qinigaaffimmi anguniagassat uku ataatsimiititamit ukkatariniarneqarput:
- Utoqqarnik paaqqutarinninnermi naammattumik piginnaasalinnillu sulisoqarneq
- Utoqqarnut inunnullu innarluutilinnut inissiat naleqquttut
- Utoqqaat sammisassaqartinneqarnissaannut immikkoortitatut aningaasaliissutit
- Inuiaqatigiinni utoqqarnik peqataatitsineq
Anguniagassat ataatsimiititamit decembarip ulluisa sisamaanni 2025-mi ataatsimiititami immikkut sammisaqarnermi oqaasertalerneqarput, taamani ataatsimiititaq aamma utoqqaat illuinut Ippiarsummut aammalu Nuummi Utoqqaat illuannut pulaarmata. Uani erseqqinnerusumik atuarneqarsinnaapput: https://sermersooq.gl/kl/committee/utoqqarnut-isumassuinermullu-ataatsimiititaq/.
”Kommunimi utoqqaat illuinut pulaarnermi pissarsiaqarnarluavippoq aammalu pissutsit, innuttaasut atugaat, sulisullu suliffigisaat paasisaqarfigalugit. Kommunimi utoqqarnik qasujaallutik sullissisut tamaasa sulilluarnerannik qutsaveqarfigerusuppakka. Taakkua sulinerat pingaaruteqarluinnarpoq, utoqqaat ataqqinartumik toqqissisimanartumillu utoqqaliartornissaannut” Utoqqarnut Isumassuinermullu Ataatsimiititami siulittaasoq Nitta Lyberth-Mørch oqarpoq.
Anguniagassat anguniarlugit politikkikkut ataatsimiititat sinneri sullissisullu avataaneersut ataatsimiititamit suleqatigiumaneqarput, aammalu innuttaasut sulisullu suliap ingerlanerani peqataatinneqartassallutik. Tamatumuuna qulakkeerneqassaaq, aaqqiissutissat tamarmik aalajangiinerillu ulluinnarni piviusumik tunngaveqarnissaat.