Kommuneqarfik Sermersooq 2024-mi takornariartitsisarnermut akitsuutinit 2,6 millionit koruuningajannik isertitaqarpoq. Aningaasat suliniutinut assigiinngitsorpassuarnut atorneqassapput, kommunimilu takornariaqarnerup siuarsarneqarneranut iluaqutaassallutik.
Taakkunannga aningaasat 650.000 koruunit Paamiuni aqqaneq-marlunnik ilaasoqarluni angallassisinnaanngorniarluni pikkorissarnermut immikkoortinneqarput. Peqataasut angallatinut 15 meterit ataallugit takissusilinnut, aqqaneq-marluk tikillugit ilaasoqarsinnaasunut angallassisinnaalerlutik allagartartaarput.
Taama pikkorissartitsineq Paamiuni naammassineqaqqammerpoq, peqataassullu tunniusimanerat Kommuneqarfik Sermersuumi inuussutissarsiornermut takornarialerinermut siunnersorti Trine Mogensen nuannaarutigaa:
”Paamiut inuussutissarsiornikkut pissanganartumi inissisimavoq. Ukiorpaalunni pisariaqartinneqartarpoq 12 pax-inut allagartaqarneq. Allagartaq taanna pigalugu innuttaasut tamaani inuussutissarsiornikkut nutaaliornissaminnut qanilliallapput.”
Imarsiornermik Ilinniarfiuttaaq suleqataalluarsimanera taassuma erseqqissaatigaa. Allagartartaartut inuussutissarsiornerup iluani sulilernissaannut Kommuneqarfik Sermersooq tikilluaqqusinissaminut qilanaalereerpoq – aamma sulinerup aallartinnerani suli tapersersuinissaminut.
Aqqaneq-marlunnik ilaasoqarluni angallassisinnaanermut allagartartaartut 19-it tassaapput:
Adolf Frederiksen, Avatannguaq Qujaukitsoq, Egeteeraq Rasmussen, Miki Geisler, Ujuuaraq Knudsen, Ernst Hermansen, Otto Rosing, Henning Olesen, Kaj Hermansen, Karl-Peter Marcussen, Karl Lorentzen, Michael Poulsen, Tom Schmidt, Malik Josenius, Pele Eliassen, Peter-Åge Petersen, Eigil Kleist, Malakias Hansen, Jørgen Nielsen.
