“Illoqarfissi uppernarsarpaa, ataqatigiinneq sunik pilersitsisinnaanersoq. Kinguaariit tulleriiaat ingerlanerini suliniutiminnik ingerlatitseqqiigaangata ataatsimooqatigiinneq annertusiartortarpoq, kisitsisiinnartigut illuutitigulluunniit taamaallaat missingersorneqarsinnaanngitsumik – taamaattorli maani inuunerup ullut tamaasa ingerlaavartumik inooqataaffigineratigut.
Taamaattumillu ullumikkut illoqarfiup oqaluttuarisaanera kisiat nalliuttorsiutiginngilarput. Ilissi innuttaasuususi maani najugallit nalliuttorsiutigaatsigit, aamma illoqarfiup ukiut 100-t ingerlaneranni attatiinnarneqarsinnaaneranut ineriartortinneqarsinnaaneranullu nukittussusermik, tulluusimaarnermik tunniutiinnajuissusermillu pigisaqarnikkut piviusunngortitsisinnaassuseqarnersi nalliuttorsiutigaarput. Nalliuttorsiorluni ataatsimoorneq taamaattoq tassaavoq nunamut inuinullu nersualaarinninnerusoq immikkuullarissorlu – ullumikkumullu killiffigisarsi sumiiffippassuarnit allanit isumassarsiorfigineqarsinnaavoq.”
Borgmesteri Avaaaraq Olsen Ittoqqortoormiit ukiuni 100-nngortorsiorneranut atatillugu septembarip sisamaani 2025-mi persuarsiornermi taama oqarpoq.
Nalliuttorsiorneq aallartillugu kommunep eqqaani erfalasulertoqarpoq, katersortarfimmilu ullaakkorsioqatigiittoqareermat biskoppi Paneeraq Siegstad Munk naalagiartitsivoq. Illoqarfiup oqaluttuassartaa pillugu saqqummersitsineq katersugaasivimmi ammarneqarpoq, kingornalu persuarsiornerit minihaalimi nanginneqarput.
Tassani nereqatigiittoqarpoq, nipilersortoqarluni qitittoqarlunilu, ullullu ingerlanerani nalliuttorsiorneq nuannersuutillugu meeqqerivimmiut, atuartut, illoqarfimmi piginnaanillit aamma eqqumiitsuliortut misilittagallit ataatsimoorfiusumik aliikkusersuipput.
Ittoqqortoormiini ukiuni 100-nngortorsiorluni nalliuttorsiorneq puigunaatsumik malunnartinneqarpoq – oqaluttuarisaaneq aamma ataatsimoorneq nalliuttorsiutigalugit kinguaariit ullormi tassani ataatsimoorput.
