Apriilimi Nordplus Juniorip suliniutaanit– ”Hear the Children”-imit aallartitat, meeqqeriveqarnermi meeqqat tamat oqartussaaqataanerannik ingerlatsinerni peqataatinneqarnerannik pitsanngorsaanissamik suliaqarnerminnut atatillugu Nuummiipput.
Aallartitat Islandimit, Estlandimit, Sverigemit, Litauenimit soorunalimi aamma Nunatsinnit sinniisunik inuttaqartut, suli atualinngitsut Meeqqat pisinnaatitaaffii pillugit isumaqatigiissummut naapertuuttumik tamat oqartussaaqataanerannik suliaqarnermik ineriartortitsinissaq pillugu suleqatigiinnermut siammasissumut ilaapput.
Aqutsisunik perorsaanermillu suliaqartunik ataatsimeeqateqarnermi ulluinnarni perorsaanermik suliaqarnermi meeqqat nipaannik ilaatitsinerunissaq anguniarlugu misilittakkanik periutsinillu avitseqatigiinneq ukkatarineqarpoq. Kommunip aaqqissuussisuunini soorunami nuannaarutigaa. “Tikeraarneq una akornatsinni ilikkagaqarfigeqatigiinnissatsinnut meerartattalu pisinnaatitaaffiisa isumaasalu tusarneqaannaratik pimoorunneqarnissaannik qulakkeerinneriaasissanik nutaanik ataatsimut ujartuinissamut periarfissatsialaavoq.” Meeqqanut Atuarfeqarnermullu Ingerlatsivimmi atuarfinnut siunnersorti Paarma Søvndal Holm oqarpoq.
Suliniummi meeqqat tamarmik mikinerminniilli naleqartutut tusaaneqartutullu misiginissaasa qulakkeerneqarnissaa anguniagaavoq. Suliniutip matuma nunat assigiinngitsut akornanni suleqatigiinnerup pingaaruteqassusaa naqissuserpaa tunngaviillu nunarsuaq tamakkerlugu atorneqartut qanoq najukkami iliuusinngortinneqarsinnaanerannut assersuutaalluni.
