Ulloq 15. maaji 2024-mi Kommuneqarfik Sermersuumi inunnut innarluutilinnut politikki nutaaq anguniagaqarluartoq Kommunalbestyrelsimit akuerineqarpoq. Politikkimi kommunimi suliassat inunnut innarluutilinnut tunngasut sutigut tamatigut eqqarsaatigalugit ilaatillugillu eqqarsaatigineqarnissaat takuneqarsinnaavoq.
”Inunnut innarluutilinnut politikki aqqutigalugu kommunimi naleqartitat pingaartitagut aalajangersassavagut. Tassaapput ataqqinninneq aamma innuttaasunut tamanut assigiimmik periarfissaqartitsineq. Politikki naleqartitanik taakkuninnga qanoq siunissami ungasinnerusumi iliuusinngortitsisinnaanissatsinnut najoqqutassiisuussaaq tamattalu siunissatsinnut iluaqutaassalluni” borgmesteri Avaaraq Olsen oqarpoq.
Inunnut innarluutilinnut politikki Kommuneqarfik Sermersuup najugaqarfigissallugu pitsaasuunissaanik takorluugaqarnermik tunngaveqarpoq aamma innuttaasut inuunertik tamaat inuuffiginissaanik, aamma innuttaasunut innarluuteqartunut. Politikkimi inuunermi pissutsit pingaarnerit tallimat pingaartinneqartut:
1. Meeqqat inuusuttullu inuunerat
2. Ulluinnarni inuuneq
3. Sunngiffimmi inuuneq
4. Ilinniarnermi inuussutissarsiornermilu inuuneq
5. Inuunermi ikaarsaarfiit
Suliassaqarfiit pingaartinneqartut politikkimut tunngaviliisuupput aamma inunnut innarluutilinnut suliassaqarfiup siammasissuuneranik ersarissisitsisuuvoq, aamma kommunimi immikkoortoqarfinni tamani suliassaqarfinni innuttaasut innarluutillit pisinnaatitaaffiinik suliaqarnissap pisariaqarnera ilanngullugu. Suliassaqarfinni ataasiakkaani suliassaqarfiit assigiinngitsut arlallit sammineqartut ilaapput takuneqarsinnaasut, peqataaffigineqartut, ilisimasanik avitsiffiusut, paasissutissat, piginnaasanik ineriartortitsineq allallu.
”Timikkut tarnikkullu innarluut assigiinngitsorujussuarnut tunngavoq inuppassuarnullu attuumassuteqarluni. Uani inunnut politikki pineqarpoq, aamma immitsinnut qanoq naligiilluta ataqqinnittumik pissusilersortarnissarput pillugu. Aamma inuunermi peqataanissamut tapersersorneqarnissaminnik qanoq tapersersorneqarnissaminnik pissarsisinnaanerat pillugu”, Suliffeqarnermut Isumaginninnermullu ataatsimiititami siulittaasoq Inge Olsvig Brandt oqarpoq.
Kingullermik inunnut innarluutilinnut politikkip 2017-imeersup kingornatigut inunnut innarluutilinnut suliassaqarfik malunnartumik siuariarfeqarlunilu allanngortoqarfiuvoq. Inunnut innarluutilinnut inatsisip 2019-imeersup ilaatigut kingunerivaa innarluuteqarnerup siammasinnerusumik paasineqarnera, tassunga ”inuit ataavartumik timikkut, tarnikkut, silassorissutsikkut imaluunniit malugisaqarsinnaanikkut piginnaanikillisimasut” ilanngunneqarmata, taamaalillunilu sullinniarneqartunut suliniutit amerlineqarlutik. Inunnut innarluutilinnut politikki siunissami ukiut sisamakkuutaarlugit nutarterneqartassaaq, suliassaqarfimmi ineriartortuarnerup malinnaaffigineqarnissaa qulakkeerumallugu.
Inunnut innarluutilinnut politikkitaami ataatsimut tunngavissaqarpoq, tassani kommune inunnut innarluutilinnut atugassaritinneqartunik ineriartortitsissaaq. Kommunimi ingerlatsiviit tamarmik suliniuteqassapput, takorluukkat anguniakkallu politikkimiittut pillugit.
“Suliassaq taanna suliassaasupilussuuvoq angisooq. Ajornartorsiutigisartakkavut aallaavigalugit suunersut paasiniartassavavut, assersuutigalugu sulisut ilinniarsimasut amigaataanerat. Tassani suut ajornartorsiorfiginerullugit pitsanngorsagassavut salliutissavagut, tunngavissatsinnillu patajaatsumik ingerlaqqiffigisinnaasatsinnik pilersitsilluta” Suliffeqarnermut Isumaginninnermullu Ataatsimiititami siulittaasoq Inge Olsvig Brandt oqarpoq.
Inunnut innarluutilinnut politikki akuutitsinertalimmik suliarineqarpoq. Innuttaasunik ataatsimiititsisoqartarpoq, inuit innarluutillit pillugit siunnersuisoqatigiit oqaloqatigineqarpoq aamma tamanut tusarniaaneq ingerlanneqarpoq kikkut tamarmik tusaaneqarnissaat qulakkeerumallugu.
”Innuttaasut tusaaneqarnissaat pingaaruteqarpoq aamma isummaminnik saqqummiussinissaat. Innuttaasut, peqatigiiffiit aamma suleqatigisat isumaannik nalituunik tunniussaqarnerannut, politikkip ilusilersorneqarneranut kommunillu politikkimik suliaqaqqinnissaanut tunngaviliisussanut peqataanerat pillugu qujajumavunga” borgmesteri Avaaraq Olsen oqarpoq.