Ulloq februaarip 11-anni imminut toqunnissamik pitsaaliuineq qitiutillugu paasisitsiniaalluni Nuummi Katersortarfimmi oqalugiartoqarmat, inuit 100-t tungaannut takkupput.
Kommuneqarfik Sermersooq aaqqissuussisuuvoq, iserneq akeqanngilaq soqutiginnittunullu tamanut ammasuulluni. Ilisimatusartoq Arnârak Patricia Bloch Innuttaasut Peqqissusiannik Ilisimatusarfimmeersoq (Center for Folkesundhed i Grønland) oqalugiartuuvoq. Oqalugiarnissaq pingaartorsiornermik aallartinneqarpoq, ualeq aallartilluarniarlugu Paninnguaq Pikilak-imit qulleq ikinneqarpoq, tassanilu ataatsimuussuseq qisuariaatillu pingaartinneqarlutik.
Arnârak imminut toqunnissamik pitsaaliuineq qitiutillugu ilisimatusarnermi paasisanik kingullernik saqqummiussivoq, pissusilersuutillu illersuutaasinnaasut pingaarnertut qitiutillugit, taakku imminut toqunnissamik ernumanartumiilersimanermik annikillisaataasinnaallutik. Paasissutissanik aallerfiusut marluk peqataapput, misigisimasatik pillugit aamma imminut toqunnissamik eqqarsarnermi suut illersuutigisimanerlugit ammasumik unneqqarissumillu oqaluttuarlutik.
Oqalugiarnermi ilaatigut siunertaavoq tassunga tunngasunik ilisimasanik misigisanillu avitseqatigiittoqarneratigut imminut toquttoqartarnera aamma imminut toqunnissamik eqqarsaateqarnerup oqaluuserineqarnerulernissaat. Taamatullu oqalugiaammi erseqqissarneqarluni pitsaasumik inuuneqarnissamut isumaliortaatsikkullu peqqissuunissamut inunnit ataasiakkaanit, ilaquttaniit pineqartumullu tunngasumik ataatsimoorussamik inuussutissarsiutigalugu ilinniarsimasumit ikorfartorneqarnissap pingaaruteqartuunera. Tassunga atatillugu Arnârak Patricia Bloch annertuumik qujassutissaqarfigaarput, paasissutissanillu aallerfigisimasai takkuttullu tamaasa aaqqissuussamut tunniussaqaqataallutik isumaqarnerulersitseqataasut qutsavigaavut, tamatumanimi ersersitsimmat Nunatsinni imminut toquttarnerup pitsaaliorneqarnerunissaanut aallussisoqaannarnissaa pingaaruteqartuusoq.