Nuummi qimminik nakkutilliisoq qimminik piginnittunut tamanut kajumissaarivoq: Qimmit paarilluaruk!
Tom Amtoft Nuummi qimminik nakkutilliisuuvoq, Kommuneqarfik Sermersoorlu suleqatigalugu qimminik qitsunnillu angalaaginnartunik tigooraasarluni, tassa pigineqanngitsut angerlarsimaffimmiillu qimaasimasunik.
”Maanna Atertami qimmeq qernertoq kajortorlu Nuummeersoq tiguneq ajulerpara, kisimiippoq qungasequteqaranilu. Arlaleriarluni kisimi angalaaginnartarpoq nerisassarsiorlunilu. Saloqaaq annilaangaqalunilu, taamaattumik tigujuminaappoq,” Tom oqaluttuarpoq.
Qimmilerisup qaammatini kingullerni qimmit angalaaginnartut amerleriaateqarsimasut nalunaarsorsimavai. Qimmit pigineqanngitsut, aammali qimmit piginnittuminnit qimaasimasut. Qimmimik piginnittutut inatsisitigut pisussaatitaavutit qimmit paarissallugu, minnerunngitsumillu pingaaruteqarluinnarpoq ukiumi taartumi angalaaginnartittassanngikkitit.
”Maanna nillertorujussuuvoq assullu quasalluni. Qimmeq annilaangasoq, kisimi sumi tamaani angalaaginnartoq angallannermut ulorianarlunilu ajoquserujussuarsinnaavoq. Aamma biilit qimmit aporaluarpagu ajoqusertunut akisussaatitaasinnaavutit,” Tom oqaluttuarpoq.
Itisiliivorlu: ”Amerlasoorpassuit kommunimut sianerlutit qimmilerisoq apeqqutigisarpaat, pitsaasuuvorlu sianertarnerat qimmit piginnittuminniit qimaasimagaangata. Tamannalu ingerlaannassaaq. Eqqissillutit qimmeq qitsulluunniit tigusinnaagukku ajunngilaq. Suliassaq uatsinnut oqinnerulertarpoq, qimmeq ersisoq tigunissaa ajornartarmat.”
Kommunip nittartagaani qimmimik piginnittutut pisussaaffitit kiisalu qimmeq angalaaginnartoq qimmilerisumit tiguneqaraangat qanoq pisoqartarnersoq annertunerusumik atuarsinnaavatit