Meeqqat hundredit sinneqartut Tasiilamiit, Ittoqqortoormiiniit, Nuummiit Paamiuniillu aggerfeqartut Kuluk Helmsimit workshopertinneqarlutillu takutitsipput, Kulturimut isumassarsiorfik qanimut suleqatigalugu italiamiut isiginnaartitsinermik suliaqartut Action Theatre suliaat “The Invisible Robber” malillugu isiginnaartitsisusiorlutik.
“The Invisible Robber” pissanganarsaarlugu oqaluttualiaavoq, dinosaurit katersugaasiviillu pillugit erinarsuusianik imaqangaatsiartoq. Uani suliami immikkuullarequtaanerpaasoq tassaavoq meeqqat piumassusersuat, illoqarfinni tamani meeqqat tamarmik isiginnaagassiami nipilersuutitavii malillugit erinarsorlutillu qitittarput, takorluuisinnaassusertik isumassarsiatillu atorluarlugit isiginnaartitsiviullu saavaniissinnaanermik misilittaallutik.
Illoqarfinni tamani meeqqat piareersaqqissaariarlutik workshopernerup ullup kingulliani isiginnaartitsipput, angajoqqaat, aanaakkut aataakkullu qatanngutaasullu najukkamilu isiginnaariat tulluusimaarutigeqisaannik. Kuluk Helms, pingaarnertut ilitsersuisuusoq Paamiuni Ivalu Skifte Labansenimit, Nuummi Malu Lynge-mit Milla Petersenimiillu aamma Tasiilami Ittoqqortoormiinilu Hanne Petersenimit ikiorneqarpoq.
“Kulturimut isumassarsiorfik illoqarfinni taakkunani taamatut neqerooruteqarluarnera angalanermilu meeqqat nutaaliorsinnaassusiat sikkerartutullusooq illuni saqqummernera takullugit tupinnaannarpoq. Workshopernerni taakkunani meeqqat piumassuseqarluarnerat takorluuisinnaassusiallu pingaarnerpaapput,” isiginnaagassiamik ilitsersuisuusoq Kuluk Helms oqarpoq.
