Business Services

We are Nuuk

Colourful Nuuk-p aqqa Visit Nuuk-mut allanngorpoq, tassanilu takornariaqarnermi suleriaaseq nutaaq Katuami saqqummersitsinikkut nalliussineqassaaq.

Aalisartup, iliniartitsisup pisiniartitsisullu assingi. Asserpassuit allat ilanngullugit Nuuk inuillu tassani najugaqartut ilisaritinneqassapput.

Assinik saqqummersitsineq ”We are Nuuk” 17. novembari tikillugu Katuamut takuniarneqarsinnaavoq. Saqqummersitsineq Visit Nuup-p illoqarfiup pingaarnersaata suuneranik paasiniaalluni anguniagaqarnerata ilagaa.

”Saqqummersitsinerup ammarneqarneratigut suleriaaserput nutaaq malunnartissavarput. We are Nuuk-mi Nuummiut takutinneqassapput. Nuuk tassaavoq uagut, maani najugaqartuusugut. Nuuk pillugu avammut oqaluttuarisatsinni tamani najukkatsinni nipit aallaavigissavagut”, Visit Nuuk-mi Destination Manager Sara Nissen oqarpoq.

”Ukiup affaata kingulliup ingerlanerani Visit Nuuk-miit innuttaasut suliniaqatigiiffiillu apersorsimavagut sammisaqartissimallugillu, “Nuuk sunaana” illoqarfiullu pitsaaqutai ersarissarniakkagut pillugit oqaasertaliiniarnitsinni ikiortissarsiorluta. Periuserineqartoq eqqorluinnartuusoq isumaqarpugut, inuit oqaluttuaat misilittagaallu Nuuk pillugu ilumoortumik piviusumillu misigititsisussaammata”, Sara Nissen oqarluttuarpoq.

Suleriaaseq nutaaq atorlugu Kommuneqarfik Sermersuup sumiiffimmik ilisarititsinerata aqqa Colourful Nuuk-miit Visit Nuuk-mut allanngortinneqarpoq, maannalu nittartagaq nutaaq una atulersinneqarpoq: www.visitnuuk.com.

Nittartakkami, takornarianut najugaqartunullu sammitinneqartumi sammisassat aaqqissuussinerillu tamarmik ataatsimoortinneqassapput, taamaalillunilu illoqarfimmi neqeroorutit tamarmik, soorlu tusarnaartitsinerit, saqqummersitsinerit, isiginnaartitsinerit, oqalugiarnerit, pisuttuarnerit, unnukkut nuersaaqatigiinnerit eqqissillunilu nalorusaarnerit ersarinnerulissapput.

Kommuneqarfik Sermersuumi borgmesterip takornariaqarnermut periusissiaq nutaaq tapersersortorujussuuaa.

”Nuummi innuttaasut illoqarfimmik immikkuullarittunngortitsimmata, tamattalu illoqarfitta avammut nittarsaannissaanut nalilinnik taperseeqataasinnaagatta isumaqatigaara. Tamatuma saniatigut nittartakkamik, takornarianut uatsinnullu maani najugaqartunut iluaqutaasinnaasumik pilersitsisinnaagatta nuannaarutigaara.

Saqqummersitsineq “We are Nuuk” 30. novembari tikillugu Katuamut takuniarneqarsinnaavoq.