Kommuneqarfik Sermersuumi Illoqarfimmi Inissianillu inerisaanermik immikkoortortaq Nunatsinni illunik ilusilersuinermik suliaqartarneq pissanganartoq pillugu ilisarititsinissamut qaaqqusivoq. Aaqqissuussaq marlunngornermi aggustip qulingiluaani Hotel Hans Egedemi pissaaq.
Illussanik ilusilersuisartoq Janina Zerbe, Kalaallit Nunaanni suliniutigineqartut, ilaatigut Nuummi atuarfittaassaq, pillugit oqaluttuarissavai.
”Soorlu takuneqarsinnaasutut illoqarfiup qeqqani Kalaallit Nunaanni atuarfinnik sanaartornerit annersaat ingerlanneqarpoq, taanna atuartunik 1200-nik atuartoqartussaavoq. Tamaammat atuarfiup ilusilersugaanera pillugu, imaluunniit Nunatsinni suliniutit allat pillugit tusagaqarusukkuit tusarnaariarsinnaavutit”, Kommuneqarfik Sermersuumi pilersaarusiornermi oqartussaqarfimmilu pisortaq Runa Sværd oqarpoq.
Aaqqissuussaq Nuummi Hotel Hans Egedemi, marlunngornermi aggustip qulingiluaani nal. 17.00-miit 18.30-p tungaanut pissaaq. Aaqqissuussaq toqqaannaq nutserneqarumaarpoq, tamanullu ammalluni.