Services

Tasiilami suliniut Naasunnguaq: Meeqqat qitiutillugit

Tasiilami Alivarpi aasap ingerlanerani nutaamik suliniummik aallartitsivoq, taannalu Kommuneqarfik Sermersuumit aningaasaliiffigineqarpoq. Suliniut Naasunnguamik taaguuteqarpoq, tassanilu atuarfimmi atuartut atugaasa ineriartortinneqarnerisa qulakkeerneqarnissaat pineqarpoq.

Ingerlalluarneq ineriartornissamut ilikkagaqarnissamullu pingaaruteqarluinnarpoq, tamannalu pillugu Tasiilami Alivarpimmit suliniut Naasunnguaq aallartinneqarpoq, tassuuna atuartut ilinniartitsisunit ikiorneqarlutik namminneq ineriartornissaminnut periarfissaqarnerulissapput.

Naasunnguaq najoqqutassaavoq, tassani meeqqat inersimasunit naapinneqartarput, inersimasullu meeqqat ataasiakkaat nukissaat aallaavigalugit isigisarpaat meerarlu qanoq ittuugaluarpat akuersaarlugu. Tamatuma saniatigut meeraq ”alliartornissaminut ineriartornissaminullu”, inuttut immikkuullarissutut, taamaattuummatami, inissaqartinneqartarput, taamaalillutillu klassiminni pitsaanerusumik atugaqalissallutik. Atuartut, ilinniartitsisunit innersuunneqarsimasut, Naasunngualerisumik “tunineqartarput”, taassumalu atuartut pisariaqartitaminnik tapersersorneqartarnissaat isumagisassavaa.

”Nuummi assingulaartumik peqarpoq, taakkulu taaguutigaat  ”Boost-klassit”. Atuartut siuariartittarpaat, imminnut tatiginninnerat, faginut ilisimanninnerit kiisalu eqqissisimanerulersittarlugit, matumanilu immikkut ittumik klassinut nuutinneqarnissaat pinaveersaartinniarneqartarpoq. Meeqqat inissisimaffiini naapinneqarnissaat ingerlallualernissaannullu ikiorneqarnissaat kissaataavoq. Taamaattumillu Naasunnguamut atatillugu KRAP-imik pikkorissaanerit ingerlanneqarnissaat aalajangerneqarpoq, taamaalilluni ilinniartitsisut pisariaqartitaminnik atortussanik pissarsiniassammata,” Meeqqanut Atuarfeqarnermullu Ingerlatsivimmi pisortaq Lone Nukaaraq Møller oqarpoq.

KRAP pillugu annertunerusumik uani atuarsinnaavutit

Naasunnguaq

Naasunnguamik taaguuteqarnissaanut isumassarsiaq pinngorpoq naasutut imerterneqarlutik seqinnerfigitillutillu ineriartortarnerat, taamaalilluni inuttut nukissat qaamanermut saqqummiunneqassapput, inerisarneqarlutik isumassorneqassallutillu sikkerarnissaminnut periarfissinneqassappata.

”Suliniummi siunertaavoq atuartut kissaammertillutik naleqqutinngitsumik iliuuseqannginneranni taamalu kingorna peqqissimissuteqannginniassammata iliuuseqarnissaq. Atuarfik ukiorpassuani aaqqiagiinnginnernut taakkuninngalu qulaajaanermut nukissanik annertuumik atuisarpoq, arlalitsigullu aaqqiissutit aaqqiagiinnginnermik annikillisaaneq ajorput – akerlianilli pisoqartarpoq, tassa pisut pissaanermik atuinermik kinguneqarajuttarmata ataasiakkaanilu atuarfimmiit anisinneqartarlutik. Tamakku qimakkusuppagut”, Tasiilami Alivarpimmi pisortaq Jørn Holbech oqarpoq.

Atuartut naasuupput ilinniartitsisullu Naasunngualerisuullutik – tassa naasunnguamik paarsisut. Ilinniartitsisut ilaat Naasunngualerisunngorniarluni aalajangersimasoq tassaavoq Anso Olsen-Larsen, taannalu Tasiilami Alivarpimmi timelæreriuvoq.

”Naasunngualerisutut atuartut 1.-10. klassimeersut assigiinngitsorpassuit isumagisarpagut, ilaatigullu oqimaassinnaasarpoq sulinerlu arriissinnaasarluni, ataatsimoorluta ataatsimiittarnitsinniit atuartut suliniummik tigusilluarsimasut takusinnaavara. Meeraq isumaginikuusara iperaqqammerpara, taamatullu pisoqaraangat nuannertuaannarpoq. Pissutigalugu aatsaat anguniakkagut angugaangatsigit meeraq iperartarparput, tassa meeraq ajornaquteqanngitsumut tiimini eqqissilluni peqataasaleraangat aallartinnermilu anguniagassat suliarisimasagut angusimagaangamigit”, Anso oqarpoq.

Maannakkut Tasiilami Alivarpimmi Naasunngualerisut arfineq-pingasuupput, taakkulu tamarmik immikkut tallimanik atuartunik tigummiaqarsinnaapput.