Services

Tasiilami Alivarpimmi aaqqiagiinnginnermi nalerisaanermi suliaqarnermut perorsaanikkut periuseq nutaaq

Tasiilami perorsaanikkut sulisut meeqqat ingerlallualernissaannut nutaamik atugassaqalerput. KRAP-imik suliniut aasaq aallartinneqartoq perorsaanikkut periusiuvoq ilaatigut meeqqanik sakkortuumik pissusilersortartunik sumiginnagaasimasunillu unammillernartissinnaassaannut tunngatillugu iliuuseqartarnerup pitsaanerulersinneqarnissaanik aallussineq.

KRAP tassaavoq Eqqarsartaatsikkut, Nukissanik aallussinikkut Akuersaarnermillu Iliuuseqartarneq (Kognitiv, Ressourcefokuseret aamma Anerkendende Praksis), tassa perorsaanermut periuseq assersuutigalugu ilinniartitsisut meeqqanik ilungersuuteqartunik iliuuseqarnissamut nutaanik periusissanik pissarsiffigisinnaasaat.

Maanna Tasiilami Alivarpi 500.000 koruuninik aningaasaliiffigineqarpoq, taamaalillutik perorsaanikkut sulisut, soorlu ilinniartitsisut psykologillu, meeqqat unammillernartuutiminnik qaangiinissaanut nutaanik iliuusissanik pissarsisinnaassapput.

”Ullumikkut meerarpassuit sumiginnagaasimanerminnik unamminiagassaqarput, tassanilu ilinniartitsisut meeqqat inissisimaffii aallaavigalugit naapinnissaannut atortussaqarnissaat qulakkeerusupparput. Meeqqanik, kamattarnermik aqutsinermillu, ilungersuuteqartunik naapitsinermi angusaqarfiungaarneq ajorpoq, tamannalu pinaveersaartinniarlugu suliniut iluaqutaassaaq,” Meeqqanut Atuarfeqarnermullu pisortaq Lone Nukaaraq Møller oqarpoq.

Ingerlatsiviup anguniakkani malitaasa ilagaat meeqqanik alapernaatsunik, tatituunik, peqqissunik nuannaartunillu pilersitsinissaq. Taamaattumik anguniakkanik naapertuuttunik suliniutinik atuutilersitsinissaq pingaartippaat.

Aaqqiagiinnginnermi nalerisaanermi suliaqarneq ersarinnerusoq

Tasiilami Alivarpimmi periuseq KRAP suliniummut Naasunnguamut atatinneqassaaq, tassunga tunngasoq pillugu annertunerusumik uani atuarsinnaavutit. Suliniutit taakku marluk ataqatigiissinnerisigut Tasiilami atuartut unammillernarsinnaasunut assigiinngitsunut ikiorserneqarnissaminnut amerlanernik periarfissaqalissapput.

”Naatsorsuutigaara neriuutigalugulu suliniutit taakku marluk atuarfimmi peqataanerulersitsisinnaassasut kiisalu atuarfik ineriartortitsisinnaanerulissasoq, taamalu aaqqiagiinnginnermi nalerisaanermut nukippassuit atorneqarunnaassasut. Iluaqutaasut akuersaarnerlu pingaarnerutinnerisigut meeqqanuinnaanngitsoq atuarfik pitsaanerusoq pilersinneqassaaq, ilinniartitsisulli sulinerminni avatangiisaat aamma pitsaanerulersinneqassapput,” Tasiilami Alivarpimmi pisortaq, Jørn Holbech, oqarpoq.