Borgmester Charlotte Ludvigsenip Qapiarfiusaami ukioqatigiinngiiaanut meeqqerivissamik sanaartornissaq malunnartinneqarmat nivariarnermut siullermut taarsiullugu qillerut tigoriarlugu qinneq siulleq qilleruppaa. Meeqqeriviup assinga aamma Inussiviup eqqaani sananeqassaaq, pilersaarutillu malillugit ingerlasoqassappat januaarimi atulerneqassapput.
Qulisimalluni siallerlunilu silarlukujukkaluartoq borgmesterip unissutiginngilaa.
”Taamatut sanaartornitsigut meeqqerivimmiut avatangiisii pitsaanerulersissavavut. Meeqqap inuunerani pingaaruteqarnerpaajummat, soorunami neriuutigaara meeqqeriviit nutaat taakku patajaassusermik pilersitsiffiullutillu sulisunit ilinniarsimasunit orniginartinneqarumaartut Nutaanik meeraaqqerivittaarnissaq meeqqerivittaarnissarlu politikikkut qangali anguniagaavoq, tamanna pillugu ullumikkut taama angusaqartigisimanerput nuannaarutigisorujussuuarput,” borgmesteri ilaatigut taama tusarnaartiminut 25-30 missaanniittunut oqarpoq.
Borgmesterip oqalugiarnissaa sioqqullugu Jens B. Frederiksen Siorarsiorfik – Nuuk City Developmenti sinnerlugu tikilluaqqusisuuvoq, taakku meeqqat meeqqerivimmut utaqqisut iliuuseqarfigineqarnissaannik politikikkut aalajangiinerata kingorna akisussaaffik tigunikuuaat.
Kommunimiit peqataasut saniatigut aamma ABC Pavilloner, immikkoortukkaartunik sanasuusut peqataasoqarput.
Immikkoortukkaarlugit sanaartorneq pitsaaqutitaqarpoq, suliaq ippassaammat aatsaat aallartinneqaraluartoq illup ilusissaa ilisarnarsereerpoq. Sanaartornerup sinnera taama sukkatigisumik ingerlaannassappat, meeqqat perorsaasullu siulliit januaarimi isertersinnaassapput.