Paamiuni katersugaasivimmi pisortaq Peter Lorentzen ukiuni 25-ini pisortani sulisimanermini nalliuttorsiutigineqarpoq, diplomimik tunissumillu tunineqarluni.
Peter Lorentzen ilaqutai, ikinngutai, suleqataalu ulloq 11.10.2019 Paamiut katersugaasivianni nersorniarlugu katersuupput.
Peter 1992-imi Paamiut katersugaasivianni sulilerpoq, 1996-imilu pisortanngorallarluni 1998-imi pisortanngorluni.
”Ulloq nuanneqaaq, tulluusimaarnaqaaq, ukiullu sukkasimaqaat, tassa suliffik nuannarigaanni taamaattarami”, Peter oqarpoq.
Peter massakkut suliffimmini kisimiilluni sulivoq, saqqummersitsinissamullu ulapputeqarluni, katersugaasiviullu illuutai nakkutigalugit.
”Suliffiga nuannareqaara. Ukiup tulliani 67-iliiguma pensionistinngortussaagaluarpunga, kisianni immaqa saniatigut sulilaartarumaarpunga, nuannarigakkumi”, Peter oqarpoq.
Kommuneqarfik Sermersooq Peter ilaqutaalu pilluaqquai, Peter sulilluarsimaneranut qujaffigalugulu.