Sermersuumi Eqqakkanik tigooraavik maanna eqqakkanik savimminernik kiisalu biilinik isateriikkanik akeqanngitsumik inuussutissarsiortut igitsinissaannik neqerooruteqarpoq. Eqqakkanik tunniussinissaq oktoberip 31-iata 2019 tungaanut atuuppoq
Sermersuumi Eqqakkanik tigooraaviup paasisimavaa, illoqarfimmi sumiiffinnni arlalinni eqqakkat savimerngit annertoorujussuit katersuussimasut. Ingammik suliffissuaqarfiit eqqaanni aamma inuussutissarsiortunut nunaminertani annertoorujussuarmik eqqagassaqarpoq, tamakkulu illoqarfik assut kusanaallisarpaat. Akeqanngitsumik eqqaanerup kingorna suliffeqarfiit nunaminertaatimik eqqaani suli eqqagassanik saviminiuteqarpata kommunip Avatangiisinut nakkutilliisoqarfianit pulaarneqarnissartik ilimagissavaat.
Sermersuumi Eqqakkanik tigooraaviup tamatumunnga peqatigitillugu paasissutissiissutigaa, Eqqakkanik tigooraavik Nuummi kisiartaalluni saviminernik eqqakkanik tigusisinnaasutut passussisinnaasutullu avatangiisinut akuersissummik peqartoq. Taamaalilluni maanna, eqqakkat taamaattut Nuummi iginniaraanni suliffeqarfinnut allanut tunniunneqarnissaat inerteqqutaavoq, Eqqakkanik tigooraavik kisimi tigusisinnaammat.
Eqqagassanik tunniussineq pissaaq Eqqakkanik tigooraavimmi tunniussisarfimmut. Annertuunik eqqagassanik aggiussiniaraanni, Eqqagassanik tigooraavik tunniussinnginnermi siunnersortinnissaq siunertaralugu attavigineqaqqaassaaq.
Eqqagassat pillugit malittarisassat
Eqqagassanik tunniussinermi malittarisassat nalinginnaasut malinneqassapput. Taamaattumik eqqagassat imaassapput:
- Immikkoortiterneqarsimassapput aamma saviminernut atasut piiarlugit savimiinnanngortinneqarsimassapput.
- Aggorneqarsimassapput, annerpaamik angissuseqassallutik 500 cm x 200 cm x 50 cm.
- Savimerngit ruujorit aanaveersakkat takissuseqassapput annerpaamik 250 cm.
- Biilit ulorianarunnaarsakkat (biilit isaterneqartussat)
Tunniussinermi suliffeqarfiup eqqaanermut kortia atorneqassaaq. Piffissami tassani tunniussat annertussusaat akiligassiissummi akilerneqartussaanngitsutut allassimassaaq.