Mittarfiliornissanut pilersaarutit danskinit aningaasaliiffiginiarneqarnerisa kinguneranik Partii Naleraq Naalakkersuisooqataajunnaarpoq, tamatumunngalu peqatigitillugu najukkani politikkikkut peqatigiiffinnut ataasiakkaanut oqaatsinik sakkortuunik atuiffigineqarlutik.
Naalakkersuisut danskillu naalakkersuisuisa akornanni isumaqatigiinniarnerit Kommuneqarfik Sermersuumi Kommunalbestyrelsimit maannakkut tamakkiisumik tapersersorpavut.
Ingerlariaqqissagutta nunanit allanit aningaasaliisoqarnissaa attaveqarnerlu pitsaanerusoq pisariaqartikkivut qularutiginngilluinnarparput, danskillu naalagaaffiannit piviusunngortinneqarsinnaappata neqeroorutaavoq asuliinnaq isigisassaanngitsoq soqutiginarluinnartoq.
Aningaasaliissutaasinnaasut suulluunniit immikkut nalilersorneqarnissaat isumaqarfigaavut. Atugassarititaasut, erniat aamma iluanaarutissatut piumasaqaatit aningaasaliinissamut nunatut akuerissanerivut imaluunniit itigartissanerivut aalajangiisuulluinnassapput.
Periarfissap Danmarkiminngaanneersuunera piinnarlugu itigartinnissaa anneruniartutut akissaqartinngikkipput isumamqarpugut.
Danskit mittarfiliornissanut aningaasaliiumanerat namminiilivinnissatsinnut qanillisitsissasoq upperaarput, ungasillisitsinavianngilaq. Kalaallit Nunaat nunatut namminersortuussappat, isertitaqarfiusinnaasut assigiinngitsut pisariaqartippavut , aammalu inuussutissarsiornerup takornariaqarnerullu pitsaasumik siuariartornissaannut pitsaanerusumik attaveqarnikkut atugassaqartitsineq pisariaqartillutigu.
Mittarfeqarnikkut aaqqissuussaanerput ukiorpassuarni oqallisaareerpoq, danskillu aningaasaliiumanerannut siunnersuut oqallinnerup sivitsortinnissaanut utoqqatsissutitut atorneqassanngitsoq neriuutigaarput. Nutaamik mittarfittaassagutta kommunitsinni suliffeqarfinnik pilersitsiortorusuttunik soqutiginnittoqarpoq, taamaattumik kinguartitseqqinnissatsinnut akissaqanngilagut.
Inussiarnersumik, Nuuk 10.09.2018
Charlotte Ludvigsen Peter Davidsen Justus Hansen
Gruppeformand IA Gruppeformand Siumut Gruppeformand Demokraatit
Asii Chemnitz Narup
Borgmesteri